इब्रितोर 1 - माडिया गोंड पवित्र सास्त्रमदेवुळि तना पूरा कबुरतुन तना मग़ना मेटे मारिह कीता 1 मुनेता कालमते देवुळि मावाङ तादोर-बाबोरा संगे वळ्ह्किंदु. ओरिन (पिङम-पङम वळ्ह्को; मति) तना कबुरतोरा मेटे, ऊक-ऊके अलग-अलग रीतिने, तना पोल्लो वेहंदु. 2 मति इंजेके, इद आक्रिता कालमते बार, तना मग़िन लोहता, लोहचि ओना मेटे मावा संगे वळ्ह्कता. ओनाय मेटे इळ्ता, पोग़ोटा बूमतगा मनदनव सबेटविस्किन पंडटा. पंडिसि ओनाये अदिकरते सबेटविन ईसीता. 3 ओनगा देवुळता डीसा दींचिह्ता, देवुळि बेद्रमता इन्जि, ओनगाने माक बराबर दिसिह्ता. ओग़ तना पोल्लोता लावते सबेटविन आव्रे कीस्तोग़. मन्कलोरा पापमतुन एडिह कीतापया, पोग़ोन मनदनद बेरा डीसाता देवुळता तिनळ बाजे, राजेम ताकिह कीयलाहि उदतोग़. देवुळता मग़िये सबे देवतुल्किह्काय बेरोग़ु 4 इद्रमलेह्का देवुळि तना मग़िह्कु, देवतुल्किह्काय एक्वा अदिकर ईता, इतेके ओग़े देवतुल्किह्काय पका बेरोग़. 5 देवुळि तना मग़ना लोप्पा इद्रम इता: “निमा नावा मग़निन, नेटाहि नना नीवा तपेनन.” इनजोरे ओसो, “नना ओना बाबानन मनदकन, ओग़ नावा मग़ मनदनोग़.” इनजोर वने पोग़ोटाङ देवतुल्किन, बेदिने बेस्केन देवुळि इनो. 6 ओसो, तना बेरा अदिकरता मग़िन,देवुळता जागातगा ततह्पा, देवुळि इता, “नावाङ सबे देवतुल्क ओन दंडुम अरयिङ,” इनजोर इता. 7 देवतुल्कना लोप्पा बारा इद्रम इन्ह्ता: “नावा सेवा कीयनव नावाङ देवतुल्किन, वळ्दा लेह्कान पंडटन, मळ्गनद किसता लेह्कान पंडटन,” इनजोर इन्ह्ता. 8 मति तना मग़िन बार इद्रम इता: “ए देवुळतिन, नीवा राजकुर्सि अमेसातेनाह्क मनदग़ा, नीवा राजेम कीयनद सेतेम मन्ह्ता. 9 सेतेम नीक बेस विचर वास्ता, लाग्वद नीक मुर्तिय विचर वावो. अदिनेनाह्क नना नीवा देवुळतन, नीवा संगेतोरग्डाहि, नीके गिर्दा वानाह राजाल आयलाह आचतन. 10 सामि! सुरुमुने निमान पूरा बूमता जोता दोहतोनिन, निमान पोग़ोटा बूमतगा मनदनव सबेटविन पंडटोनिन. 11 निमा अमेसा मनदकिन; मति निमा पुटिह कीतव मायनुङ. सबे पाळ्नाङ गेंदेन पोहतना लेह्का, अविस्किन पोहमुळ आयग़ा; 12 पाळ्ना गेंदेतुन ऊर्हतना लेह्का, निमा अविस्किन ऊर्हचि मळता वाटकिन. गेंदेनु बद्ले कीयना लेह्का, अविस्किन बद्ले कीकिन मति निमा मुर्तिय बद्लेम आयविन आयकिन. निमा अमेसा-अमेसातुह्क मनदकिन.” इनजोर इता. 13 इदिन ओसो सीता कीम्ह्टु: देवुळि तना मग़िन इतद इद पोल्लोतुन, तनाङ बेवे देवतुल्किन बेस्केन इद्रम इनो: “बेचानाह नना नीवा कोटुलतोरिन, नीवाङ काल्कना इळ्न तच एवोन, अचानाह नावा तिनळ बाजेता राजगादेतगा उदिस मन,” इनजोर इनो. 14 पोग़ोटाङ देवतुल्क राजेम कीयनव आयोङ, देवुळता सेवा कीयनव जीवाङ. बोर-बोरिह्क देवुळता पिसमुळ दोर्किह्ता, ओरा सेवा कीयलाहे, अद लोहतनव जीवाङ आंदुङ. |
© 2021, Wycliffe Bible Translators, Inc. All rights reserved.
Wycliffe Bible Translators, Inc.