गलातितोर 5 - माडिया गोंड पवित्र सास्त्रम1 ओसो माट अडोना इळ्न ओर्युलतोरा लेह्का मनदनदायो इन्जिये, किर्स्तु माक पिह्ट अर्हतोग़. अदिनेनाह्कु मीवा विस्वसते मीटु मेग़्किस मन्ह्टु, मति मीट ओर्युलतोरा लेह्का, पूहतद अडोना जुवा कांजमाटु. डायना रिवज केमाटु! 2 ननान पोलुनन मीक वेहतह्नन, बेस केंजाटु! मीट यहुदिरा डायना रिवजतुन नोममाटु. अह कीसि सेतेमतोर आयलाह ऊळतेके, किर्स्तुना मोकि मीकु बातय पाय्दाता आयो आयग़ा. 3 पया डायना रिवज माळवालोरिह्क सिरप इद अडोतुन आयो, मति यहुदिराङ कतमे अडोन नोमिय पोयतग़ा इन्जि, नना सेतेम वेहतह्नन. 4 मीट अडोन नोमिसि सेतेमतोर आयलाह ऊळवालोरिर, किर्स्तुनाहि अलग आतिर, ओना दयातुन पोहचीतिरे! 5 नना इद्रम बाराह्क इह्नन? माट विस्वसिरल इतेके किर्स्तुन नमिसिये सेतेमतोरल आतल; सेतेमतोरेनाह्कु देवुळि तासतद बर्कतता आसाते माट मह्नल. इद आसा देवुळता जीवातग्डाहिये वास्ता. 6 इतेके किर्स्तु येसुन नमतेके, डायना रिवज कीयनदु बार आयो, केवद वन बार आयो; येसुनगा विस्वस तासिसि, दुस्रोरिन जीवा कीयना, इदे मोदुल पोल्लो आंदु. 7 मीट मुने विस्वसते बेस विततप आंदिर. मति इंजेक इसि, बोग़ो मीवा अग़दे अडम वाताह्के, येसुना सेतेम अग़दे मीट ताकविर, इद बेस आयो! 8 इद्रमता नाळेह कीयनद बुदि इतेके, मीक आचतद देवुळताहि वावो. 9 ओय्पिह कीतद इचुने पिंडटुन, कोपामेंड नाहतद पिंडटगा काल्ह्पतेके, पूरा पिंडि ओयिह्ता, इद पोल्लो इतेके मीट केंजतिरे;(ओरा जोल कबुरतुन नमतेके अहे आयग़ा.) 10 मीट वने नावा पोल्लोतुन कबुल कीकिरे इन्जि, देवुळतेनाहि नावा बर्वस मन्ह्ता. मीक तिपल केवाल पया, बोग़े मनेग़, ओन्क देवुळता सिक्सा दोर्कग़ाये. 11 इंजेके नाक इंका डायना रिवजता पोकुर कीस्तोग़ इन्जि, उय्तुर इन्ह्तोर. मावोरिर, नना इद्रम पोकुर कीतन इतेके, यहुदिर नाक विरुद केवोर आवेर. हव्कनागुटातगा येसुसामि ईतद मोकतेनाह्के पिसमुळ दोर्किह्ता इन्जि, नना पोकुर कीताह्केने, यहुदिर नाक पका ओङ आस्तोर. 12 मीक डायना रिवज कीम्ह्टु इनजोर तिपल केवालोरु, तम्क कुदिय कतमे डायिस पोहतेके, बाय्लालोर लेह्का आतेक बेस आवालि! मन्कना बुदि ओसो देवुळता जीवाता बुदि 13 मति मावोरिर, मीक इतेके, अडोना जुवाताहि पिह्ट अरयलाह देवुळ केयता. अदिह्कु नना इद्रम रासिह्नन. मीट मात्रम माट विचर वातप कीकोम, इद्रम इनदनदायो मति, जीवा कीसि मीट ओर्विना-ओर्वोग़ सेवा-साकुर कीम्ह्टु. 14 बाराह्क इतेके, मोसानाङ सबे अडोङ सास्त्रमता उंदिय पोल्लोते माळतप आताङ, अद बेद इतेके निमा कुदतुन जीवा कीतपु, दुस्रोरिन जीवा कीम. 15 मति मीट ओर्विह्क-ओर्वोग़ नल्हतना, कोह्कना, वह्चना कीसोर मह्निर! इदिनेनाह्कु आक्रिते मीट ओर्विन-ओर्वोग़ बूळे कीयनदायो इन्जि, उसरते मन्ह्टु. 16 इंजेके नना वेहतह्नन, बेस केंजाटु! देवुळता जीवा मीक बह ताकिह कीस्ता, अहे ताकाटु; अस्के मीवा मन्कना बुदते, मीट मुर्तिय ताकविर आयकिर. 17 बह इतेके मावा मन्कना बुदि, देवुळता जीवाता अडम मन्ह्ता; ओसो देवुळता जीवा इतेके, मावा मन्कना बुदता अडम मन्ह्ता. इव रेंड इतेके बेस्केन ओंडोङ, अदिह्कु मीक बेद कीयना विचर मन्ह्ता, अदिन मीट कीया पग़विर. 18 पया बेचानाह मीक देवुळता जीवा ताकिह कीस्ता, अचानाह मीट अडोना इळ्न इलविर. 19-21 इंजेके मावा मन्कना बुदताङ कबस्किन माट पुह्नले. अव आंदुङ सिंड्रि-साट्याल आयना, लजालेवा विचर वातप कीयना, बोमापूजा, ओदे, कोंटेङ, वह्चळि, कोंडा वेयना, ओङु, दुस्रोरा सीता केवा कुदताये पाय्दातुन ऊळनदु, मुडा नडुम पूटपट कीयना, कुळ्सा, कल लोटि आयना, इद्रमताङ वेल्लाङे पोल्लोङ मन्ह्ताङ. इद्रमताङ कबस्किन केवालोरिह्क इतेके, देवुळता राजेमते जागा मुर्तिय दोर्को आयग़ा. इद पोल्लो नना मुनेन वेहतन, अद्रम इंजेक ओसो मीक वेहतह्नन. 22-23 देवुळता जीवा बारा, मावा जीवातगा मोन्ह्टटेके, मयगा इद्रमता पंटा पुटिह्ता: माट दुस्रोरिन जीवा कीय्ह्नल, माट गिर्दाते मह्नल, सुकमते मह्नल, बेदाय पोल्लोतुह्क चट्ने ओङ आयवा मह्नल, दुस्रोरिन जीवा वाटिह्नल, माट चिव्टमलेवा मह्नल, माट पोल्लो विळ्सतपे कीय्ह्नल, कुलुल बुदते ताकिह्नल, कुदतुन आव्रे कीय्ह्नल. इद्रम ताकतेके, माक यहुदिराङ अडोङ अडम आयोङ. 24 इंजेके किर्स्तु येसुन नमवालोर इतेके, तमा मन्कना बुदतुन, हव्कनागुटातगा बूळे कीतपे मन्ह्तोर; अद मन्कना बुद डोलता इतेके, माट तानाङ लाग्वाङ विचर्कने ताकवल. पवित्र जीवाता पेग़्के ताकना 25 इद्रमलेह्का देवुळता पवित्र जीवाते माट पिसिह्नल, अहे अद जीवा माक ताकिह कीतपु, माट ताना पेग़्के ताकिङ वने. 26 नना बेरोनन इन्जि, माट मनवल आयकल, इतेके ओर्विन-ओर्वोग़ लजा केवल, ओर्विह्क-ओर्वोग़ कुळ्सा केवल. |
© 2021, Wycliffe Bible Translators, Inc. All rights reserved.
Wycliffe Bible Translators, Inc.