कुलुसितोर 1 - माडिया गोंड पवित्र सास्त्रम

मुनेता पोल्‍लो

^1-2 नना पोलुनन, देवुळता विचर मतपु, येसु किर्स्तुना बळयिनन आंदन. कुलुसि सहरते मनवालोर देवुळता मन्कलोरिर मीक इद सीटि रासलाह आतन. मावा तोळतोग़ विस्वसि तिमोति वने, इगा नावा संगे मीक जय येसु वेहतह्‌तोग़. मीट किर्स्तुन विळ्सवा विस्वस कीय्ह्‌निर इनजोर माट पुतोम. मावा देवुळबाबानाहि मीक सुकमि, देय्वा दोर्कि.

कुलुसितोरेनाह्‌क पोलु पार्तना कीस्तोग़

^3-5 देवुळता बेसता कबुरि, सेतेमता पोल्‍लो आंदु. अद पोल्‍लोतुन मीट मुने केंजतिर, केंजताह्‌कु पोग़ोन देवुळदीपतगा जागा दोर्कनद आसा मियगा पुटटा. अद आसातेनाह्‌कु, येसु किर्स्तुन विस्वस कीसोरेन मह्‌निर, ओसो देवुळता सबेटोर लोकुरिन जीवा कीय्ह्‌निर. अदिनेनाह्‌क माट मियेनाह्‌क ऊक-ऊके पार्तना कीय्ह्‌नोम अस्के, मावा येसुसामि किर्स्तुना बाबाल देवुळतुन अमेसा जोहर कीय्ह्‌नोम.

^6-8 अद बेसता कबुरतुन, इपपरास इनवाल मियगा एव्सिह कीसीतोग़. ओग़ सामिना सेवाते मावा ऐंगेटोग़ ओसो बेस गोततोग़ आंदोग़, अहे बर्वसलायकतोग़ आंदोग़. (माट मीवा सहरतगा एवया पग़वोम,) मति मावा जागाते ओग़ मीक सेतेम बुदते किर्स्तुना कबुरतुन काग़्हचि, मीवा सेवा कीतोग़. देवुळता जीवा मियगा जागा आताह्‌कु, मीट ताना मन्कलोरिन जीवा कीय्ह्‌निर इनजोर, ओग़े माक वेहतोग़. मीट ओनग्डाहि बेसता कबुरतुन केंजतिर, ओसो देवुळता दयाता पोल्‍लो सेतेम मन्ह्‌ता इनजोर पुतिर. पुतस्के, अद कबुरता पोल्‍लो मीवा जीवातुन बद्ले कीयलाह आता. अद्रमलेह्‌काने अद कबुर बूममेंड आबुर आसि, वेल्‍लाटोर आस्क-कोय्तोरा जीवातुन बद्ले कीयलाह आता.

^9-10 अदिनेनाह्‌क माट इपपरासनाहि मीवा कबुरतुन केंजतग्डाहि, मियेनाह्‌क ऊक-ऊके पार्तना कीसोर मह्‌नोम. मियेनाह्‌क देवुळता बाताल विचर मन्ह्‌ता, इद मीक तेळियना इन्जि, देवुळता जीवा मीक पूरा बुदि ईयि इनजोर, पार्तना कीयलाह आतोम. बाराह्‌क इतेके, देवुळि मियेनाह्‌क विचर कीस तासतद पोल्‍लोतुन पुतेक अचोन, सबे पोल्‍लोने येसुसामिन मान ईसि, ओन्क विचर वानाह ताककिर. इतेके मीट सबे रीतिनाङ बेसताङ कबस्क कीसोर, देवुळतुन बेस पुनजोर दाकिर.

^11-12 ओसो इद्रम वने पार्तना कीयलाह आतोम: मीक बेदाय तिपल वातेक वने, मीट आरेम आयवा, ओङ आयवा, विस्वसते निच मनदलाहि, देवुळि तना पका बेरा डीसाते मीक लाव ईयि. ओसो मीट बेस गिर्दाते देवुळतुन जोहर कीसोर मनदना इनजोर, पार्तना कीयलाह आतोम. बाराह्‌क इतेके, पोग़ोन तना वेह्‌चतगा पिसवालोर ओना मन्कलोरेनाह्‌क, मावा देवुळबाबाल वेल्‍लाय बर्कत तासतोग़. ओसो मीक वने अग्डा तूस दोर्कना लायकतोर कीतोग़.

¹³ ईकळते मतप लेह्‌कान, देयह्‌कना कयदे मतल. मति देवुळि माक देयह्‌कना कयदाहि विळ्सिह कीसि, तना पका जीवा कीतोग़ मग़ना राजेमतगा तचीता.

¹⁴ ओग़े माक विळ्सिह केवाल आंदोग़, ओनाय मोकतेनाह्‌कु मावा पापमता मापि आता.

किर्स्तु बोग़ु? ओग़ माक बाताल कीसीतोग़?

¹⁵ देवुळबाबाल दिसोग़ मति, ओना मग़ि येसुन ऊळतस्के, देवुळबाबान ऊळतपे आंदु. दुनियाते पंडटव सबेटविना पोग़ोन येसुनाय अदिकर मन्ह्‌ता.

¹⁶ बाराह्‌क इतेके, देवुळि ओनाय मेटे सबे पुटिह कीता. पोग़ोटा बूमताङ, इळ्ता बूमतग्डाङ, दिसनवु, दिसववु, राजेम कीयनव देयह्‌क-बूतह्‌क, लाव तोहतनव देवतुल्कु, अदिकरते मनदनव पेन्कु, इव सबेटविन ओनाय मेटे पुटिह कीता. ओन्के मान दोर्कना इन्जि, देवुळि इद्रम कीता.

¹⁷ सबेट्काय ओग़े मुनेतोग़ु, ओना मेटेन सबे पंडटव निच मन्ह्‌ताङ.

¹⁸ ओसो माट विस्वसिरा मुलु मेंदुलता लेह्‌काडोरल, किर्स्तु तान ताकिह कीयनद तलाता लेह्‌काडोग़ु, ओनाय मेटे माट पिसिह्‌नल. हामुरताहि जीवा अरवालोरग्डाहि, ओग़े मुनेतोग़ आंदोग़, इद्रमलेह्‌का सबे पोल्‍लोने ओग़े मुनेतोग़.

¹⁹ देवुळता पूरा बुदि ओनगा जागा आयना इन्जि, देवुळता गिर्दा मता.

²⁰ मन्कना पापमतेनाह्‌कु, इद बूमता सबे नरुळ आयि, ओसो पोग़ोटा बूमताङ आयिङ, सबेटव देवुळताहि जेक आताङ. मति ताना मग़ि किर्स्तु, हव्कनागुटातगा नेतुर पोहच डोलताह्‌कु, इव सबेटविन ओना मोकतेनाह्‌कु, तना संगे कलियिह कीयलाहि, देवुळि विचर कीता.

²¹ मीट मुने मीवाङ लाग्वाङ विचर्कने, देवुळता संगे विरुद आस एग़तप लेह्‌का मंदिर, अहे लाग्वाङ कबस्क कीसोर मंदिर.

²² अद्रम मन्जाय मति, ताना मग़ि मन्कना मेंदुल अग़्के, बूमतगा वास मियेनाह्‌क डोलताह्‌कु, देवुळि मीक तना संगे कलियिह कीता. मीट ताना मुनेह नितस्के पवित्र मनदना, बाताले डागिललेवा मनदना, बाताले कसुरलेवा मनदना इनजोर, तना संगे कलियिह कीता.

²³ मति मीट मेलियवालेवा, मेग़्किसि विस्वस कीसोर मनदना गावले, ओसो बेसतल कबुरतुन केंजताह्‌कु, मीवा जीवातगा पुटटद आसातुन, विळ्सवालेवा मनदना गावले. मीट केंजतद बेसतल कबुर पूरा बूमतगा पोकुर आयलाह आता. नाक वने, अदे सेवा कीयलाहि देवुळि निल्पिह कीता.

विस्वसिरेनाह्‌क पोलु पप्ळेम आस्तोग़

²⁴ माट विस्वसिरा मुलु, किर्स्तुना मेंदुलता लेह्‌कान मह्‌नल. तना मेंदुलतेनाह्‌कु, किर्स्तुना तिपल इंका मारोये, ओना तिपलते नना वने कलियिह्‌नन. अदिनेनाह्‌क नावा मेंदुदगा तिपल आतेक तेला, गिर्दातेन मह्‌नन.

^25-27 नना सबे जातिनोरगा वेहतलाह आतन, अद पोल्‍लोतुन मुनेता कालमते, अस्केडोर मन्कलोरिह्‌क, देवुळि पुन्पिह केवा मता. मति इंजेके अद पोल्‍लोतुन, तना मन्कलोरिह्‌क पुन्पिह कीयलाह विचर कीता. इद बाताल पोल्‍लो आंदु इतेके, किर्स्तु मीवाङ जीवानगा जागा आस्तोग़; अदिनेनाह्‌क देवुळि मियेनाह्‌क, पोग़ोन तासतद पका बेसतल बर्कतता तूस मीक दोर्किह्‌ता इनजोर, मीक वने इंजेके आसा दोर्कता, इदे अद पोल्‍लो आंदु. मीवा पाय्दातेनाह्‌कु देवुळि तना पूरा पोल्‍लोतुन तपवालेवा पोकुर कीयनद कबळतुनु, नावा कयदे कीसीता. कीसीताह्‌के नना विस्वसिरा मुडा सेवकनन आतन.

²⁸ ओग़े किर्स्तुन माट सबे जातिनोरिह्‌क, पोकुर कीयलाह आतोम. किर्स्तुना संगे तुंडिस मनवालोर सबेटोरिन किर्स्तुनगा बेस विस्वसते मेग़्किह कीसि, देवुळता मुनेह निल्पिह कीयना इनजोर, माटु देवुळ ईतद बुदते सबेटोरिन काग़्हतह्‌नोम, सुद्रे कीय्ह्‌नोम.

²⁹ इदे पोल्‍लोतेनाह्‌क नना एपुर पेसनाह कबळ कीसि, पप्ळेम आयलाह आतन. किर्स्तुना बेरा लाव नाक ताकिह कीताह्‌कु, नना कह्‌टेम कीयलाह आतन.