बळयिर 1 - माडिया गोंड पवित्र सास्त्रम

बळयिरेनाह्‌क आक्रिता पोल्‍लो

^1-2 तियुपिलु साय्ब! नावा मुनेता कागिदते येसुसामिनाङ कबस्किन रासिस तासतन, (तान निमा अर्वतिने). येसुसामिन देवुळि (हामुरताहि तेग़्किह कीसि) पोग़ोन देवुळदीपतगा ओतद दिया एवनाह, इद बूमते मनदनस्के ओग़ बाताल बाताल कीतोग़, बाताल बाताल काग़्हतोग़, इव सबेटविन अगा रासतन. देवुळि येसुन पोग़ोन ओयनामुने, ओग़ आचतोरु तनाङ बळयिरिन, इद्रम इद्रम कीम्ह्‌टु इनजोर, देवुळता पवित्र जीवा वेहतपु उकुम ईतोग़.

³ ओग़ तिपल आस डोलिसि, ओसो जीवा अरतोग़, अस्केडाहि रेंड वीसाङ दियाङ आनाहि, ओरिह्‌क ऊक-ऊके नना जीवा अरतन, इंजेके जीवात मह्‌नन इन्जि, बेस नेह्‌ना तोहतोग़. ओसो देवुळि लोकुरगा तना राजेम ताकिह कीयनद पोल्‍लोतुन ओरा संगे वेहन्दोग़.

^4-5 उंद दिया ओग़ ओरा संगे मतस्के, ओरिन जमा कीसि, इद्रम उकुम ईतोग़, “देवुळता पेदिरते मीहवाल योहन, लोकुरिन एते मीहन्दोग़. मति वेल्‍ला दिया आयो, देवुळि तना पवित्र जीवाते मीक मीहतग़ा. इदिन कीकन इन्जि, बाबाल पोल्‍लो विळ्सिस मतोग़ इनजोर, नना मुनेन मीक वेहच मतन. अदिह्‌क मीट येरुसलेम सहरतुन विळ्समाट मति, अद जीवातेनाह्‌कु केपाट,” इनजोर वेहतोग़.

देवुळि येसुन जीवात मनेके पोग़ोन ओस्ता

⁶ पया येसुनाङ बळयिर ओनगा (जय्तुन इनदनद मेटातगा जमा आसि,) इद्रम ताल्ह्‌कतोर, “सामि! बह निमा इदे तूकने (रोम राजेमतुनआरे कीसि,) मावा इस्रयेल जाततोर लोकुरिह्‌कु, मावा राजेमतुन मल्स निल्पिह कीकिना?” इनजोर इतोर.

⁷ येसु इतोग़, “इव सबे पोल्‍लोङ आयना वेलातुन, कालमतुन, नावा बाबाले तना अदिकरते तासतोग़. तान मीक पुनदा एवोग़.

⁸ मति मियगा देवुळता जीवाता दळ्म अरतापया, मीक लाव दोर्कग़ा. अद लावते येरुसलेम सहरतगा, पूरा यहुदा पटटगा, सामरिया पटटगा, ओसो बूम मारेंगा एवनाह, नावा पोल्‍लोता साक्सितोरिर मनदकिर,” इन्जि वेहतोग़.

⁹ ओग़ इद्रम वेहतापया, ओर ऊळनेक-ऊळनेके, देवुळि येसुन पोग़ोन देवुळदीपतगा ओता, ओतस्के मोयुल अडम आसि, ओनु ओरिह्‌क दिसवाह मुचता.

¹⁰ ओग़ पोग़ोन दायह्‌पा, ओरु कोंडा मिळ्हवा ऊळसोर मनेके, पांड्रि गेंदेङ उहतोरु इर्वुर मन्कलोर दोम्ह्‌क्ने ओरगा नितोर.

¹¹ निचि ओरिन इद्रम इतोर: “ए गालिल पटटोरिर! बाराह्‌क पोग़ोन ऊळसोर नितिर? देवुळि येसुन पोग़ोन देवुळता जागातगा ओता. मीट ऊळनाह बेद्रम ओग़ पोग़ोन अतोग़, अद्रमे उंद दिया ओसोवन मल्स वायनोग़,” इतोर.

यहुदाना जागाते दुस्रोग़ बळयि

¹² पया येसुनाङ बळयिर जय्तुन इनदनद मेटाताहि, येरुसलेम सहरते मलतोर. (अद मेटा येरुसलेम सहरताहि वळ्गा कोस जेक मता.)

¹³ ओर सहरते मल्सि, तमा रोमनद लोते, पोग़ोटा मिदेता अरातगा अतोर. (ओर बळयिर अक्रा मुलु बोर आंदुर इतेके,) पत्रु, आंद्रेयाल वेर तमोग़ इर्वुर, योहनि, याकुब वेर तमोग़ इर्वुर, पिलिप, तोमाल, बार्तोलोमि, मत्याल, अल्पुना मग़ि याकुबि, सिमोनि (ओग़ रोम सर्करता अडम पार्टितोग़), दुस्रोग़ याकुबना मग़ि यहुदाल, (इच्वुर बळयिर अगा मतोर).

¹⁴ वेर सबेटोर बळयिर उंदिय विचरते, देवुळतुन पार्तना कीसोरेन मंदुर. ओसो वेरा संगे उचुक आस्कु, येसुना तलोग़ मरियाल, ओसो ओनाङ तमोर मतोर.

¹⁵ अवे दियाने, उंद दिया येसुन विस्वस कीतोरु, सबेटोर जोक-जोक आरुङ वीसाङ मन्कलोर, अगा जमा आस मतोर. अस्के पत्रु ओरा नडुम निच वेहतलाह आतोग़:

^16-17 “मावोरिर, यहुदा इस्केर्योति बार, माट ऐंगेन कलियिस सेवा कींदोम इन्जि, मीट पुतिर. तेला मति ओग़े येसुन दोहच ओयलाह वातोरिह्‌क तोळ ईतोग़. अदिह्‌के देवुळता पवित्र जीवा वेहतपु, दाविद राजाल मुनेन सास्त्रमते यहुदाना लोप्पा बेद पोल्‍लो रासिस तासतोग़, अद पोल्‍लो करल आयनदे मता.”

¹⁸ (यहुदाल तना कीतद लाग्वा कबळताङ कोताङ एतोग़. अव कोताने उंद पोलम असिस मतोग़. मति अदे पोलमतगा, ओग़ पोग़ोटाहि कप मुळ्न्दिस अरतोग़, अरतस्के ओना पोटा पग़्क विरियिस, पोर्ह्‌क पेसताङ.

¹⁹ येरुसलेम सहरतोर सबेटोर लोकुरिह्‌क इद पोल्‍लो एर्का आता. अदिह्‌के अद पोलमतुन ओरा पोल्‍लोते “हकलदमा” इतेके “नेतुरता पोलम” इन्जि, पेदिर तासतोर.)

²⁰ (पत्रु ओसो इतोग़, “बेद पोल्‍लो दाविद राजाल यहुदाना लोप्पा) देवुळताङ पाटानगा रासतोग़ अद इह मन्ह्‌ता: ओना लोन पग़लोन आयि! अगा बोग़े मनमाकेग़ इन्जि रासतद मन्ह्‌ता. ओसो दुस्रा पाटातगा: ओग़ कीयना सेवातुन दुस्रोग़ कीयेग़ इनजोर रासतद मन्ह्‌ता.

^21-22 अदिह्‌क येसुसामि हामुरताहि जीवा अरतोग़ इन्जि, मावा संगे साक्सि मनवाल बळयि आयलाहि,(डोलतोग़ यहुदाना जागातगा) ओर्वोग़ मन्कन आचनदु. योहन लोकुरिन देवुळता पेदिरते एग़ मीहतस्केडाहि, देवुळि येसुन मयग्डाहि पोग़ोन ओनाह्‌जोम, माट ओना संगे वेलियसोर मतोम. बेचोक दियाङ माट वेलियसोर मतोम, अचोक दियाङ मावा संगे मतोर मन्कलोरग्डाहि, ओर्वोग़ मन्कन आचनदु,” इनजोर इतोग़.

²³ पया जमा आतोर विस्वसिर इर्वुर मन्कलोराङ पेदिर्क वेहतोर. ओर्विना पेदिर योसेपि बार्सबा आंदु, ओन युसतुस वने इंदुर. दुस्रोना पेदिर मतियाल आंदु.

^24-25 ओराङ पेदिर्क वेहचि, येसुसामिन इद्रम ताल्ह्‌कतोर, “सामि! यहुदाल बेसतल अग़दुन विळ्सिसि, लाग्वद अग़दुन पोयतोग़, अह आसि डोलतोग़; डोलिसि तना दायना मतद सिक्साता जागातगा अतोग़. सबे मन्कलोरा पोटालोप्पाडाङ गोटिङ निमा पुतिने. अदिनेनाह्‌क ओना जागातगा इद सेवा कीयलाहि, नीवा बळयि आयलाहि, वेर इर्वुरग्डाहि निमा बोन आचतिन, तेन माक तोहचीम,” इनजोर ताल्ह्‌कतोर.

²⁶ पया ओर इर्वुराङ पेदिर्क रासिसि सीटिङ वाटटोर. बेद सीटि पेसता, अद सीटटगा मतियाना पेदिर मता. अदिह्‌क मतियाल येसु किर्स्तुना अक्रा बळयिरगा कलियतोग़.