2 कुरिंततोर 13 - माडिया गोंड पवित्र सास्त्रमपोलुनाङ आक्रि पोल्लोङ 1-2 देवुळता सास्त्रम वेहतपु, कमसेकम इर्वुर-मुवुर मन्कलोरा साक्सिते, नीवा पोल्लो करल आयि. अद्रमलेह्काने मीक रेंड मल्काङ, मीवा पापमतुन विळ्साटु इन्जि, वेहच मतन. नना दुस्रा मल्काते मियगा वास मतन, अस्के पापम कीतोरिन, अहे सबेटोरिन, रेय्पिह कीस मतन. इंजेक नना मियग्डाह जेक मह्नन. मति केंजाट, इद सीटटे मीट सबेटोरिन वेहतलाह आतन, नना मुचाकेपाते मियगा वायकन. वातस्के मीट अद्रमलेह्काने पापमते मतेके, नना बोने विळ्सोन आयकन! 3 “नीवा तोडटे किर्स्तु वळ्ह्किह्तोग़ इनजोर, बह पुतोम?” इह्निर. नना ओना अदिकरते पापम कीतोरिन सिक्सा ईकन, अस्के किर्स्तु नावा तोडटे वळ्ह्किह्तोग़ इनजोर पुनदकिर. मीक सिक्सा ईया पग़वाह, किर्स्तु लावलेवोग़ आयोग़. 4 निटमे किर्स्तुन लाव लेवस्के, हव्कनागुटातगा वेळ्हतोर; मति इंजेके ओग़ देवुळता लावते जीवात मन्ह्तोग़. किर्स्तु मतप लेह्कान, माट वने लावलेवोरोमे. मति माट मियगा वासि, मीक सुद्रे कीकोम अस्के, माट वने देवुळता लावते, किर्स्तुना संगे जीवात मह्नोम इन्जि ऊळकिर. 5 मीट नाक पर्ह्किस ऊळना वाटो, मीवा विस्वस निटम मन्ह्ताया इन्जि, मीट कुदतुने पर्ह्किस ऊळाट. अद्रम ऊळतस्के, मीवा जीवातगा येसु किर्स्तु मन्ह्तोग़ इनजोर, पुनमुळ आस्ता. अद्रम लेवेके, मीट ओना लोकुरिर आयविरे कोनि. 6 अद्रम पर्ह्किस ऊळतेके, मयगा वने बळयिरा अदिकर निटम मन्ह्ता इनजोर, मीट पुनदकिर बहे. 7 मीट मावाङ केंजवा, बाताले लाग्वा कबळ कीयना आयो इनजोर, मियेनाह्क देवुळतुन पार्तना कीय्ह्नोम. मयगा किर्स्तुनाङ बळयिरा अदिकर मन्ह्ता इनजोर, मीट रेयिस ताकलाह, इदिन इनोन. अद अदिकर माट मीक तोहवेक वने बार आयो, मति मीट सेतेमते ताकनदे, माक विचर वास्ता. 8 मीट सेतेम काग़्हमुळतुन माळतेके, माट मीवा विरुद बेद्रम आयकोम? माट अद्रम आयवा, मीवा तोळे मनदकोम! 9 माट लावलेवोरोम दिसतेक बार आयो, मीट लावतोर मतेक, माट गिर्दा आय्ह्नोम. मीट मीवा ताकमुळते तपतव पोल्लोन सुद्रे कीसि, देवुळतुह्क विचर वानाह पिसना इनजोर, पार्तना कीय्ह्नोम. 10 मीवा विस्वसतुन बेर्सिह कीयलाहि, सामिनाहि माक अदिकर दोर्कता, तान बूळे कीयलाहि आयो. मियगा वातस्के, इद अदिकरते मीक कळकते वेहतनाह आयमाकि इनजोर, इंजेक मियग्डाह जेक मनदह्पा, इव पोल्लोन रासलाह आतन. 11 मावोर विस्वसिरिर! इव नावाङ आक्रिताङ पोल्लोङ आंदुङ: बेस गिर्दाते मन्ह्टु, सुद्रेम आसोर मन्ह्टु, सुकमते मन्ह्टु, उंदिय विचरते मन्ह्टु, ओर्विह्क-ओर्वोग़ कलियिस-मेलियिस मन्ह्टु. अस्के माक जीवा कीयनद, सुकम ईयनद देवुळि, मीवा ऐंगे मनदग़ा. 12 मीट देवुळता लोकुरिर इन्जि, ओर्विह्क-ओर्वोग़ जीवा वाटसोरे जोहर कीम्ह्टु. 13 इग्डोर देवुळता मन्कलोर सबेटोर, मीक जय येसु इन्ह्तोर. 14 मीक सबेटोरिह्क येसुसामि किर्स्तु देय्वा ईयेग़, देवुळि जीवा कीसोर मनि. ताना पवित्र जीवा मियगा कलियसोर मनि. |
© 2021, Wycliffe Bible Translators, Inc. All rights reserved.
Wycliffe Bible Translators, Inc.