1 पत्रु 1 - माडिया गोंड पवित्र सास्त्रमपत्रु विस्वसिरिन जोहर कीस्तोग़ 1 नना पत्रुनन, येसु किर्स्तुना बळयिनन, इद सीटि रासिह्नन. पुंतुस, गलाति, कपदुकिया,आसिया ओसो बितुन्या, इव रोम राजेमताङ पटिने बिरोबटो आसि मतोरु, इद दुनियाते रेंड दियाङ मनवालोरु, 2 देवुळ आचतोर लोकुरिह्कु रासिह्नन. मावा देवुळबाबाल मीक मुनेने आचिसि, तना पवित्र जीवाता मेटे, मीकु तना पवित्र लोकुर कीतोग़. बाराह्क इतेके, मीट येसु किर्स्तुना पोल्लो केंजिसि ताकना, ओसो हव्कनागुटातगा मियेनाह्क पोवतद ओना नेतुरते, मीवा पापम एडना इन्जिये, देवुळ मीकु आचता. देवुळताहि मीकु लेकालेवा सुकमि, देय्वा दोर्कसोर मनि! अमेसाता मनमुळता आसा 3 मावा सामि येसु किर्स्तुना देवुळबाबाह्कु जोहर आयि! ओग़े माकु पका जीवा लोपताह्कु, माकु पूना मनमुळ दोर्कता. इद बेद्रमता मनमुळ इतेके, देवुळबाबाल येसुसामिनु हामुरताहि जीवा अर्ह्चीताह्कु, माकु उंदि बेस्केन मायवद आसा दोर्कता. 4-5 ओसो मयेनाह्कु इन्जि, देवुळदीपते बेरा उंदि जीवाता बर्कत तासतद मन्ह्ता. अद उंदि बेस्केन बूळेम आयवदु, माचलेवदु, वाग़वदु बर्कत आंदु. इद बर्कत आक्रिता दियाते देवुळि सबेटोर विस्वसिरिह्क तोहतग़ा. अदु बर्कत मीक दोर्कनाह्जोमु, देवुळि तना लावते मीकु काप आडग़ा, बाराह्क इतेके, मीटु देवुळता पोग़ोन बर्वस तासिह्निर इनजोरे. 6 अदिनेनाह्कु मीट पका गिर्दा आम्ह्टु. इंजेके गय्क मीकु तिपलते रीतरीतिनाङ दुकह्किन आप पोयतग़ा; तेला मति गिर्दा आम्ह्टु. 7 इव दुकह्कु मीवा विस्वसता पट ऊळिह्ताङ. बह इतेके वेल्ला दाराता बंगरि, किसतगा वाटिस जूत कीतेक तेला, आक्रिते बूळेम आस्ताये. मति मीवा विस्वस इंका बंगरतुह्काय एक्वा दाराता. अदिनेनाह्कु अदु मीवा विस्वस, किसलेह्काडा तिपलताहि दीराते पेसिस वाता इतेके, मीट असलतोरिर इन्जि, देवुळि मीकु वेल्ला कदर ईयग़ा. इद बेस्के आयग़ा इतेके, येसु किर्स्तु पूरा दुनियातोरिह्क दिससोरे वायनोग़, अस्केने. 8 मीटु येसुसामिन बेस्केने ऊळवेकाय, ओन जीवा कीय्ह्निर; ओग़ दिसवेकाय ओन नमिह्निर. मीट नमिसि, वेहता वावप अचोन गिर्दा आय्ह्निर. 9 मीट ओन नमताह्के, ताना पाय्दा इन्जि, ओग़ मीवा जीवातुन पिसिह कीस्तोग़. 10 इद पिसिह कीयना पोल्लोता लोप्पा, देवुळता देय्वा मीक दोर्कग़ा इन्जि, मुनेता कालमतेने ताना कबुरतोर वेहचि; मति ओरिह्क वने इद पोल्लो पूरा तेळियवाय मता. अदिह्के ओरु इद बहु इनजोरे, आचसोरे पर्ह्किंदुर. 11 अस्के किर्स्तु बह तिपल आसि हायनोग़, ओसो ताना पया बह ओन्कु देवुळदीपते देवुळतेनाह कदर दोर्कग़ा इनजोरे, ओर कबुरतोरा लोप्पा मतदु किर्स्तुना जीवा ओरिह्क वेहता. मति ओरु इद पोल्लो बेद कालमते आयग़ा, ओसो बेद्रम आयग़ा इनजोर, आलिह कींदुर. 12 इव गोटिङ मात्रम ओरेनाह्क आयोङ, मति वायना कालमतोरेनाह्क इतेके, मियेनाह्कु मन्ह्ताङ इन्जि, देवुळि ओरिह्क पुन्पिह कीता. अद्रमे मावा कालमते अव सबे गोटिनु, येसुना मेटे बेसता कबुर वेहवालोर, देवुळदीपताहि लोहतद देवुळता पवित्र जीवाता लावते, मीकु वेहतोर.देवतुल्क इंका इव असलताङ गोटिङ बेद्रम आस्ताङ, इदिन पुनदलाह ऊळसोरेन मन्ह्ताङ! पवित्र आम्ह्टु! 13 अदिनेनाह्कु मीटु बेस बुदते मन्जि, उसरते मन्ह्टु. ओसो येसु किर्स्तु मल्स वायना वेलाते, मीकु दोर्कना बर्कततगा पूरा आसा कीस मन्ह्टु. 14 मीटु देवुळताङे मग़्क-मयास्क आय्ह्निर इन्जि, ताना पोल्लो केंजाटु. मुने मीटु देवुळतुन पुनवाह्कु, पापमताङ विचर्कने ताकिंदिर. इंजेक ओसो पापमता अग़दे मल्स अनमाटु. 15 मति मीक आचतद मीवा देवुळि बेचोन पवित्र मन्ह्ता, अद्रमे मीट वने मीवाङ सबे कबस्कने, विचर्कने पवित्र मन्ह्टु. 16 पवित्र सास्त्रमते वने देवुळि इहे वेहतह्ता, नना पवित्र मह्नन इन्जि, मीट वने पवित्र आम्ह्टु. 17 मीटु “ए बाबा!” इन्जि केयिसि मोळ्कनद देवुळि, बेस्केने मोकम ऊळिसि नेयम केवो, अद मीवा ताकमुळतुन ऊळिसि नेयम कीस्ता. अदिह्के मीटु इद दुनियाते पय्नम अनवाना लेह्का आसि, रेंड दियाङ मनदह्पा, देवुळतुन रेयिसि ताकाटु. 18-19 मीवाङ तादोर-बाबोराङ अङ्ळमताङ उतुर्कनाहि, देवुळ मीकु बह कीसि विळ्सिह कीता, तान मीट पुह्निर. अदु मीकु बूळेम आयनदु बंगरताङ, वेंडटाङ कोताना जमानत कीसि, विळ्सिह केवो. मति बेदे डागिललेवदु, कसुरलेवदु मोक आयनद गोरेपिलालेह्काडोग़ किर्स्तु, ओना नेतुरता जमानत कीसि, मीकु विळ्सिह कीता. 20 इदे कबळतुह्क इन्जि, देवुळि येसुनु इदु बूमि पुटनामुनेने, आचिस मता; मति इंजेके इव आक्रिताङ दियानेन, येसु मियेनाह्कु इन्जि, इद बूमते वासि, दुनियातोरिह्क दिसतोग़. 21 येसु मियेनाह्क बाताल कीतोग़, तान ऊळिसि मीटु देवुळता पोग़ोन विस्वस तासिह्निर. देवुळि येसुनु हामुरताहि जीवा अर्हचि, ओन्कु बेरा पेदिर ईसि तासता. तासताह्कु, मीटु देवुळता पोग़ोन विस्वस तासिसि, करलता आसाते मह्निर. 22 येसुना सेतेमता कबुरतुन केंजिस ताकताह्कु, मीटु पापमताहि एडटिर. अदिह्कु मीटु ओर्विह्क-ओर्वोग़ सेतेमते जीवा कीया पग़यह्निर. अद्रमे इंजेके मीवा लेह्का विस्वसिर आतोरिन, मीटु पूरा जीवाताह जीवा कीम्ह्टु. 23 येसुना कबुर केंजिस नमताह्कु, इंजेके मीटु पूना पुटटप आतिर. तलोग़-तपेराहि पुटटद जीवा डोलिह्ताये; मति देवुळता अमेसा मनदनदु बेस्केन मिळ्न्दवदु पोल्लो केंजताह्कु, माक पूना जीवा दोर्कता, अद बेस्केन डोलो. 24-25 इदिन माट पुह्नल बाराह्क इतेके देवुळता कबुरतोग़ ओर्वोग़ वेहतोग़: माने-मन्कलोर रोंडाये ओरा डीसा पुंगेह्के. रोंडा इंका वतिह्ता पुंगेह्क इंका रालिह्ताङ, मति देवुळता पोल्लो अमेसा-अमेसातुह्क मन्ह्ता! अदे मीटु केंजतदु येसुना लोप्पा बेसता कबुरि. अहे, इंगो! |
© 2021, Wycliffe Bible Translators, Inc. All rights reserved.
Wycliffe Bible Translators, Inc.