Jowani 1 - Luyana Bible Translation

Eliywi sebeli litenda Omunu

¹ Ku simuluho kame kuna kwikala Eliywi, mi Eliywi kame lina kwikala ni Nyambe, mi Eliywi neeli Nyambe.

² Kame ana kwikala ku simuluho ni Nyambe.

³ Einu yonje kame ina tendiwa mwa yonyene, mi kweyi ina tendiwa kakwisa esinu no kwaa tendiwa yonyene.

⁴ Mwa yonyene kame kuna kwikala omooyo, mi omooyo neli eliseli no aanu onje.

⁵ Eliseli kame libenya mu uwi, mi ouwi kawasikoma eliseli.

⁶ Kame kuna kwikala omunu ona ku tumiwa okutunda kwa Nyambe, mi elitina lyaye neli Jowani.

⁷ Kame ana kwiyela oupaki, mukupaka eyi no liseli, nji mwa yonyene aanu onje apumene.

⁸ Kasa nji yokame eliseli kono kame ana kwiiya mu kupaka eino liseli.

⁹ Neli eliseli no niti elyo limonyekela omunu yonje woyo oiya mu litunga.

¹⁰ Na kwikala mu litunga, mi elitunga kame lina tendiwa mwa yonyene, mi elitunga kalisi ku mulimuka kale.

¹¹ Kame ana kwiiya ku naha yaye, mi aanu aye kasi kumu tambula.

¹² Kono kwa onyene onje ana kumu tambula, awo ana kupumena mu litina lyaye, kame anaabi amaata no kutenda aana a Nyambe.

¹³ Awo na kwa leiwa ku unyinga, simba etakazo no unu, simba oku singa kwa munu, kono oku singa kwa Nyambe.

¹⁴ Cwale Eliywi sebeli litendiwa omunu ni kuyaka mwaaci, yo iyalile esishemo ni niti, mi kame tuna kubuha ekanya yaye, eili ekanya eyi ilukela Omwana no libanda woyo otunda kwa Sitange.

¹⁵ Jowani kame ana ku paka eyaye niku kuweleza nji, “Yokame woyo nina kwamba nji, ‘Woyo oniiya munyima kame anibita, kakuli kame ana kwikalako oweli kwa mene.’ ”

¹⁶ Cwale mu kwiyala kwaye kame tuna wana tonje, esishemo esi siekeza ba sishemo.

¹⁷ Kakuli omulawo na ukwiiya mu libaka lya Mushe, esishemo ni niti kame ineeyi mu libaka lya Jesu Kilesite.

¹⁸ Kakwisa omunu onaku monabo Nyambe. Konji Omwana feela, woyo oli ba saali sa Sitaye, yo kame woyo ona mutende nji alimukiwe.

Elin̄usa lya Jowani Omukolobezi

¹⁹ Cwale uno oupaki wa Jowani, aendisi no Majuda aba ana kutuma apulisita ni Malebi okutunda ku Jelusalema okwiiya muku mwibanguta nji, “Tiwe anyine?”

²⁰ Jowani sebeli opumena, kasikukana, kono sebeli wamba nji, “Kasa mene Kilesite.”

²¹ Cwale sebeli amwibanguta nji, “Iikene cwale?” “Tiwe Eliya?” Jowani sebeli wamba nji, “Kokuulwa kasa mene,” “Tiwe omunuhi wa Nyambe?” Mi sebeli otambula nji, “Kokuulwa.”

²² Cwale sebeli aamba kwa yonyene nji, “Tiwe anyine, nji tu limuke omo sa tu tambwele awo anatu tumu. Ikene cwale wamba mulibaka lyowe?”

²³ Jowani sebeli otambula nji, “Time eliywi eli likuweleza mu lihalaupa, eli lyamba nji, Mu lukise endila ya MBUMU, kanyi omo anambele omunuhi wa Nyambe Isaya.”

²⁴ Cwale awo ana kutumiwa kame ana kutunda kwa Afalisi,

²⁵ cwale sebeli aibanguta Jowani nji, “Cwale iikene aba okolobeza nji kasa wene Kilesite, simba Eliya, simba omunuhi wa Nyambe?”

²⁶ Jowani sebeli waatambula nji, “Mene kame ni kolobeza ni meyi, kono omo mwaanyi kame kwimanine omunu mwaayii.

²⁷ Simba yonyene woyo oiiya munyima yange, ka nitwese oku nungutula etikwele no etinjangwa taye.”

²⁸ Eyo yonje kame ina ku tendahala mu Betani mu linjaliya lya Jodani, omo ana kwikala Jowani yo kolobeza.

Jesu Omukoko wa Nyambe

²⁹ Eliywaa lina ku tatamako Jowani sebeli omona Jesu yoiya kwa yonyene, mi sebeli wamba nji, “Komumone, uno omukoko wa Nyambe woyo utundisa esibi no litunga!

³⁰ Woyo yokame nina kwamba nji, ‘Woyo oniiya munyima kame anibita, kakuli kame ana kwikalako oweli kwa mene.’

³¹ Ni mene kanisi kumu limuka, kono aba ni neeyi mu ku kolobeza ni meyi, neeli nji amonahale kwa Isilaele.”

³² Mi Jowani sebeli omupaka nji, “Kame nina mono Emebo ina tundu ku wilu ikufekile kanyi elikwici mane sebeli liikala ba yonyene.

³³ Mene kani sikumu limuka, kono woyo onani tumu muku kolobeza ni meyi kame ana nambele nji, ‘Woyo so mone Emebo ishetumuka kwa yonyene niku mwikala beulu, yokame woyo so kolobeza ni Mebo No Kukena.’

³⁴ Cwale kame nina mono, mi kameni paka nji yokame Omwana a Nyambe.”

Aiyetwa a Jesu no Weli

³⁵ Eliywaa lina kutatamako kame Jowani sebeli oimana na iyetwa aye ayiili,

³⁶ mi aba anaku mona Jesu yoenda sebeli wamba nji, “Komumone omukoko wa Nyambe!”

³⁷ Aiyetwa ayiili sebeli amuyupa yoamba eyi mane sebeli akon̄a Jesu.

³⁸ Jesu aba ano kutemuna, cwale sebeli waamona amukon̄a, mi sebeli wamba kwa onyene nji, “Iikene mu saela?” Cwale sebeli aamba kwa yonyene nji, “Labbi” (okutalusa nji Mwiyeti,) “Kubine wikala?”

³⁹ Jesu sebeli waatambula nji, “Mwiiye mumone.” Sebeli aiya niku mona oko ana kwikalanga, mi sebeli aikala naye eliywaa elyo, kakuli neli enako no likumi ni tutanu ni kamweya (4 okuloko) no mangolwaa.

⁴⁰ Adiliyasi minaye Simoni Pitolosi, neli omunjili kwa iyetwa ayiili woyo ona kuyupa Jowani yo amba, mi sebeli amukon̄a.

⁴¹ Kame ana kutateka oweli okuwana Simoni omukulwaye ni kwamba kwa yonyene nji, “Kame tuna wana Mesiya” (okutalusa nji “Kilesite”.)

⁴² Adiliyasi sebeli olita mukulwaye kwa Jesu. Jesu sebeli omwaliketa ni kwamba nji, “Tiwe Simoni omwana a Jowani, kame soisanwe nji Kefasi.” (Okutalusa nji, “Pitolosi.”)

Jesu yo Isana Filipi ni Natanaele

⁴³ Eliywaa lina kutatamako Jesu sebeli osinganyeka okuta ku Galileya. Cwale sebeli owana Filipi ni kwamba kwa yonyene nji, “Onikon̄e!”

⁴⁴ Cwale Filipi kame ana ku tunda ku Betisaida, omulenen̄i wa Adiliyasi ni Pitolosi.

⁴⁵ Filipi sebeli owana Natanaele ni kwamba kwa yonyene nji, “Natumu wana woyo ona n̄oliwa eyaye kwa Mushe mu mulawo mane ngeseo ana kun̄ola anuhi. Jesu no Nazaleta, omwana a Josefa.”

⁴⁶ Natanaele sebeli omwibanguta nji, “Kwa sili esinjili no kuwaba esisa si tunde ku Nazaleta?” Filipi sebeli wamba nji, “Wiiye, omone.”

⁴⁷ Jesu sebeli omona Natanaele yoiya kwa yonyene, sebeli wamba eyaye nji, “Komumone omwisilaele no niti, mi mwa yonyene kakwisa esi sinyazahala!”

⁴⁸ Natanaele sebeli wamba kwa Jesu nji, “Ngasibine omo onani limukele?” Jesu sebeli omutambula nji, “Filipi yokasi kwisana kale, me oikalile munji no sitondo no mukuyu kame nina kumono.”

⁴⁹ Natanaele sebeli omutambula nji, “Labbi, tiwe Mwana Nyambe! Ombumu no Isilaele!”

⁵⁰ Jesu sebeli otambula Natanaele nji, “Kakuli kame nina kwambele nji kame nina kumono oikalile munji no sitondo no mukuyu, bokame aba opumena? Mbumono einu no kuneneba okubita eyi!”

⁵¹ Jesu sebeli omwambela nji, “Niti luli kame nikwambela nji mbumono eliwilu eliyatulukile, mi amangeloi a Nyambe akambama mane niku shetumukela beulu ya Mwana no Munu.”