Filimoni 1 - Luyana Bible Translation

¹ Okutunda kwa mene Paulusi elipantiti mulibaka lya Kilesite Jesu ni Timoteya omwabetu, Kame tun̄olela kwa wene Filimoni omusingiwa ni mwabetu mu musebezi

² ni kwa Afiya mandetu ni Akipasi, omwabetu omusole ni keleke mu ndoo yowe.

³ Esishemo siikale nanyi ni kozo itunda kwa Nyambe Sitetu ni kwa Jesu Kilesite.

Elilato ni Tumelo ya Filimoni

⁴ Kame ni kutumelanga kwa Nyambe enako yonje aba nimi pulukanga mu titapelo tange.

⁵ Kakuli kame niyupa eyi no lilato ni tumelo eyo uli nayo kwa Mbumu Jesu ni kwa asikupumena onje a Nyambe.

⁶ Kame ni lapela nji okutabela no tumelo yowe ifanene okukulisa ezibo no uwa wetu wonje mwa Kilesite.

⁷ Kakuli kame niwabelelwe onene ni kombaombiwa okutunda mu lilato lyowe omwabange. Kakuli emicima no aasikupumena kame ninatende eyi no ubya mwa wene.

Paulusi yo Kumbela Filimoni nji Atambule wino Onesimasi

⁸ Abo cwale simba nji kame nili ni undume mwa Kilesite kame nitwisa oku milaela okutenda eso mufanena oku tenda.

⁹ Mulibaka no lilato kame ni singa okukumbela kwa wene mene Paulusi omunume mukulu mi bano nili elipantiti kame mulibaka lya Kilesite Jesu,

¹⁰ Kame ni kumbela kwa wene mulibaka lya mwanange Onesimasi woyo inakutenda sitaye abo menili mu tolongo.

¹¹ Ku matatekelo kasikwikalanga ni tuso kwa wene, kono bano niwautokwa luli kwa wene ni kwa mene.

¹² Kame nimuusa kwa wene, okumutuma yo mucima wange wonje.

¹³ Simba nji kame ninakusinga okwikala naye kuno, mulibaka nji ani sebeleze mu sibaka sowe mu nako no kunungiwa kwange mulibaka no liywi no kuwaba.

¹⁴ Kono kame nina kusinga okwatenda esinjili me kawasilimuka oweli. Nji ouwa sotende olese kuutenda mu kukandimekwa kono outende mu kusinga kowe.

¹⁵ Mwendi eli elibaka ana kutundela Onesimasi kwa wene mu nako icana nji cwale wikale naye okuta oku no kwaabwa,

¹⁶ cwale kasa kanyi mubika kono okubitelele omubika, omwabetu osingiwa, onene kwa mene, kono cwale ngasibine kwa wene, bamweya mu lutu mane ni mwa Mbumu.

¹⁷ Cwale nji kamo nishimba nji kame nili omukowe mu musebezi, niyonyene omutambule omoso tambwele mene.

¹⁸ Nji kame anaku kufoseze onene simba oku kukolotela esinu sonje, osibalele sitende omubonda wange.

¹⁹ Mene Paulusi kame nin̄ola eyi ni lyoko lyange, mi mbani siteneke. Kulese okwambiwa esinjili ku sikoloti sange mane ni sowe.

²⁰ Ee mwabange, kame nisinga nji onitendeleko esi mwa Mbumu. Okatuluse omucima wange mwa Kilesite.

²¹ Mu kusepa okuyupela kowe kame nikun̄olela muku limuka nji mbutende okubitelela eyi ninaamba.

²² Ba nako imweya onilukisete omuzuzu, kakuli kame nisepa mu titapelo tenu mba nimiusetwe.

Omulaano no Mamaneneno

²³ Epafalasi omwabange lipantiti mwa Kilesite Jesu, kame amikeeta.

²⁴ Mane ni Maleka, Alisitakasi, Demasi ni Luka akwange ni belekanga noo.

²⁵ Esishemo sa Mbumu Jesu Kilesite siikale mu myoyo yenu.