YUDE 1 - Disambi Dipyadipya

¹ YUDE, musadi a Yisu Kalistu, Yakobo mwakunyenci, kudi bantu bamabikidibwa, yi bamanangibwa mu Ncembi Tete, yi bamabumbibwa munda mwa Yisu Kalistu ;

² mwengo ăkali yinenu yi polo yi nyinga bungi bungi.

³ Banangibwi, binakadi mu kulukuta mulukutu mwoso bwalo bwa kunufundila dia kupandixibwa kwecu kwa bungi bwecu, nakabambibwa dibambu dia kunufundila ndo kunubondabonda ene, nutandili kwetabusa yi ngulu kwakalongolebwa bena babala dilongola dimodimwe dyendeli nya.

⁴ Bwalo bwamabwela banga bantu ku busoko, isanga bantu bakalongolebwa kalikali ku lopelo lolu ; bantu batena yi bowa bwa Ncembi, bamakulumuna lwoxixi lwa Ncembi ku budibi, yi bababa Mukyelengi ecu umoumwe mwabu, yi Fumu, Yisu Kalistu.

⁵ Ngwakyeba lolo kunwelesa nkanyi, isanga nwamalubukwa bintu bioso dyendeli nya ; ene, Fumu, pakadi amapandisa bantu mu mbata a Ecipito, akaxipa bantu kunyuma batakwetabusa.

⁶ Yi bangele batanamini mwakadilu ăbo ă buxi buxi, yei amababumba mu nkanu ya kô kô, muxi mwa mwedima pôi ku lopelo lwa dituku dinene.

⁷ Mo nako Sodomo yi Ngomola, yi mala akadi pepe yinabo, bwalo bwakadilongolabo nako ku budibi, bamakwebexebwa luna kiebexelu, badi mu kutata lopelo lwa mudilu ă kô kô.

⁸ Kaninga mo nako kabidi baloti ba melu baba bamapindisa munyu, yi bamakisa bufumu lukisu, yi bamatangola bikupu.

⁹ Mo Mikayele, mulopwe a bangele, pakatandayi yi diabolo diakakwelesayi mbata yinadio bwalo bwa mumbidi ă Mosese, akacina kumucwadila lopelo lwa mwotangu, kate akatôya ene, Fumu akukami dikamu.

¹⁰ Mo bantu baba bamakisa bintu bioso nkisu bitasolembetelabo ; yi bintu biamalembetelabo bwalo bwa buntu bwabo, bea luna bipangu bitena yi nkanyi, mu bintu bebi ndo mwamadisalulabo.

¹¹ Mpeya kudibo ! bwalo bwakakwendabo mu ncila a Kyene, yi bakaya mbilu mbilu mu kwona kwa Balama ku bwalo bwa sayi, yi bakafwa mu mpeto ya Kôla.

¹² Baba badi bea mabwe masokoka mu mai mu mbaki yenu ya nyinga padedyabo yinenu, tulama twa mikwakwa twamadidisa mikyeatu kutena kucina bowa ; badi mabaxi atena mai, amapumbuxibwa ku mpepele ; badi mici ya nkakasala yitena yi mamoma, yamafwa ngufu ibidi, yamatudibwa macina ;

¹³ badi diele dia bubi dia mai manene, badi mu kuncula mpulolu ya bundu bwabo ; badi mitoto yamaungaunga, yamatekyebwa mwedima ă mungila fu ku bwalo bwayo ku mwociya ă kô kô,

¹⁴ Yi Enoko kabidi, muntu a sambwali kunyuma kwa Adami, akadimusa bwalo bwa bantu baba, ene, Mona, Fumu akalwa yi bantu banci ba babala, masangi a nkone, masangi a nkone ;

¹⁵ kulwa fikisa lopelo kulu kwa bantu boso ; yi ndo kutongola bantu boso batena yi mwosambu ă Ncembi bwalo bwa makisa abo atena yi mwosambu ă Ncembi amakwencabo kutena mwosambu ă Ncembi, yi bwalo bwa malo moso akola amatôya boni batena yi mwosambu ă Ncembi ku bwalo bwanci.

¹⁶ Baba badi bapindudi ba mapindo, bakabani ba mikabanu, bamalabela xindilu yabo, badi yi musuku ăbo ătôya meyi manene a ngulu, badi mu kuyila bantu kikanda bwalo bwa kutetowa.

¹⁷ Mo nonu, banangibwi, nweli meyi nkanyi amatôyebwa buxi kudi batumibwi ba Fumwecu Yisu Kalistu ;

¹⁸ mwakanutôyelabo ene, Ku kikondo kia ku sula kunakala bakyeci, badi mu kulanda xindilu yabo yitena bowa bwa Ncembi.

¹⁹ Kababa ndo bantu bamadibalola mikyeabo, bena mwosambu ă bantu, batasoakala yi Mwoxixi.

²⁰ Mo nonu, banangibwi, pa kudiabaka mikyenu kulu kwa kwetabusa kwenu kwamadika babala, yi pa kulomba mu Mwoxixi a babala,

²¹ nudibumbi mikyenu mu nyinga ya Ncembi, nudi mu kutebelela mwengo ă Fumwecu Yisu Kalistu pôi ku môyo ă kô kô.

²² Yi ku bwalc bwa banga bantu bamakwelesa mbata, nubatongoli ;

²³ banga, nubapandisi, nudi mu kubapaula mu mudilu ; banga lolo, nubasambanini yi bowa ; nudi mu kwombwela isanga kilamba nkyetekyete kiamakwelebwa mantobo ku munyu.

²⁴ Mo kudiyi ubili kununama kanuponi, yi kunuteka ku mpala a dikai dienci kutena bwalo bubi mu kiango kiamadika bungi,—

²⁵ kudi Ncembi umoumwe mutupu a bwinu, Mupandixi ecu, kwakali dikai kudi Yisu Kalistu, yi bunene, yi mpinyu, yi bumanya, buxi bwa kikondo kioso, yi nkyekyu, yi ku mieciya mioso. Amen.