YOANO 7 - Disambi Dipyadipya

¹ KUNYUMA kwa bintu bebi, Yisu akakwenda mu Ngalili, bwalo bwakanyafianayi kwenda mu Yudiya, bwalo bwakapalala bena Yuda kumuxipa.

² Kitula lolo kia bena Yuda kia bitanda kiakadi pepe.

³ Mbwôso bena kwanci bakamwambila, ene, Ncuka kunu, yaka ku Yudiya, bixemona beyi bebe kabidi makisa ebe akisa kisa Owe.

⁴ Bwalo butasokwenca muntu kintu kioso ku busoko, pakala mikyenci lolo amapalala kululukibwa ku mpala ya bantu. Ndo wakisa bintu bebi, udiebesi mikyebe ku loboko.

⁵ Bwalo butamwetabuxila isanga bena kwanci.

⁶ Mbwôso Yisu akabambila ene, Kikondo kiamene kikidi kakifikili, mo kikondo kienu kiamafika dituku dioso.

⁷ Loboko kalubiyi kununyañana, kaninga meme ndo amanyañanalu, bwalo bungwatôbôla ku bwalo bwalu, ene, makisa alu adi mabi.

⁸ Nuximuni nonu ku kitula. Meme kisobeximuna ku kitula kieki, bwalo butafikili kikondo kiamene.

⁹ Pakadi amabatôyela bintu bebi, akasala mu Ngalili.

¹⁰ Kaninga pakadi bena kwanci bamaximuna, kunyuma yei kabidi akaximuna ku kitula, kumoni ku mpala ya bantu, kate bea ku busoko.

¹¹ Mbwôso bena Yuda bakamupalala ku kitula, yi bakatôya ene, Yei udi kupai ?

¹² Yi bopindo bungi bwakapindudibwa ku bwalo bwanci kudi bimbukuma. Bamo ene, Udi kunengela ; bamo ene, Kañana ; kate adimba bantu.

¹³ Kaninga kakwakadi muntu umoumwe akatôya dyendeli ku bwalo bwanci, bwalo bwa bowa bwabo bwa bena Yuda.

¹⁴ Mo pakadi batani nkyekyu pakacikaci pa kitula, pakaya Yisu munda mwa tempelo yi akakweyesa.

¹⁵ Mbwôso bena Yuda bakakama ene, You muntu ubili mikanda beci ? bwalo butakweyayi pô.

¹⁶ Mbwôso Yisu akabapingasa ene, Kweyesa kwamene kakuna kwamene, kate kwanci kwa you akangutuma.

¹⁷ Aka muntu akyeba kwenca nyinga yenci, unalubukwa dia kweyesa, ndo kudi kwa Ncembi, sungu ndo namaditôyela biamene kanana.

¹⁸ You udiatôyela bienci, amapalala kinemu kienci ; mo you apalala kinemu kienci kia you akamutuma, yei udi sôsôlwo, yi disalu kadina munda mwanci.

¹⁹ Ki Mosese akanupa bwadi, yi kakuna muntu enu umoumwe encenca bwadi. Kukai nonu nwamapalala kunguxipa ?

²⁰ Kimbukuma kia bantu bakatôya ene, Udi yi kidimu kibi ; ñani amapalala kukuxipa ?

²¹ Yisu akapingasa yi akabambila ene, Meme nakakwenca dikisa dimodimwe, yi nonu nwamakama bungi bwenu.

²² Ndo biakanwelesa Mosese bwadi, (kaninga kabuna ndo bwa Mosese, kate kudi babakulu ba kalikali), yi nonu nwelela muntu bwadi ku sabado.

²³ Ndo muntu elebwa bwadi ku sabado, bitaxexipibwa bwadi bwa Mosese, nonu nwamangwombwela bituku bwalo bunamancincidisa muntu nya ku sabado ?

²⁴ Kanusambodi ku meso kanana, kate nusamboli kusambola kwa nkwami.

²⁵ Banga lolo ba bena Yelusaleme bakatôya ene, Ki yei ndo muntu apalalabo kumuxipa ?

²⁶ Mona, atôya ku mpala, yi kabasomutôyela bwalo. Bantu banene lolo bamalembetela sôsôlwo ene, you udi Kalistu ?

²⁷ Kaninga you noku, tumubili kulolwayi. Kate Kalistu, bilolwayi, kakuna muntu umubili kulolwayi.

²⁸ Mbwôso Yisu akakwamena munda mwa tempelo, udi mu kweyesa yi kutôya ene, Nungwalubukwa meme, yi nwalubukwa kundolwa ; yi kisodilula mikyemi, kate you akangutuma udi sôsôlwo, unutasolubukwa nonu.

²⁹ Meme mubili, bwaio bundolwa kudiyi, yi yei akangutuma.

³⁰ Biakapalalabo kumukwata, kaninga kakwakadi muntu umwabaka kianca, bwalo butafikili kikondo kienci.

³¹ Mo bena kimbukuma bangi bakamwetabuxila, yi bakatôya ene, Kalistu, oka ulolwa, unadika iwedi lwa bilayixilu kwenca biamakwenca muntu you ?

³² BaFalixi bakakwombwa kimbukuma badi mu kupindudila malo aa ku bwalo bwanci, yi makanda manene yi baFalixi bakatuma basadi, ene, bamukwati.

³³ Biakatôya Yisu ene, Kakondo kabende kakiasala kantani yinenu yi nceya kudiyi akangutuma.

³⁴ Nunangupalala yi kanunangusokolola, yi kungwakala, nonu kanubiyi kulwa.

³⁵ Mbwôso bena Yuda bakatôyañana ene, Ape unaya kupai kututasomusokolola coco ? Unaya kudi bantu ba Lucakacaka kudi bena Ngiliki kuya eyesa bena Ngiliki ?

³⁶ Diyi kai dedi diatôyayi ene, Nunangupalala yi kanunangusokolola ; yi kungwakala, nonu kanubiyi kulwa ?

³⁷ Ku dituku dia ku sula, ku diba dinene dia kitula, kwakakwemana Yisu yi akatôya ene, Aka muntu mwoso ombombwa nyota, alwi kundi, anwi.

³⁸ You ungwetabuxila meme, bea biatôya mukanda ă Ncembi, mu difu dienci munakyela ncedi ya mai a môyo.

³⁹ Kaninga akatôya noku dia Mwoxixi, uxeangata bantu bakamwetabuxila ; bwalo bwakadi Mwoxixi ukidi kafikili, bwalo butabandixibwa Yisu kulu ku kikondo kieki.

⁴⁰ Mbwôso banga bena kimbukuma, pakakwombwabo malo aa, bakatôya ene, You udi mudimuxi sôsôlwo.

⁴¹ Bamo ene, You udi Kalistu. Banga ene, Kalistu lolo abatuka mu Ngalili ?

⁴² Ki mukanda ă Ncembi ămatôya ene, Kalistu ulolwa kudi bana ba Dafidi ? yi ku bula bwa Beteleme, kwakadi Dafidi ?

⁴³ Mbwôso bakanamukanana bonamu kudi bantu ku bwalo bwanci.

⁴⁴ Mo banga bakakyeba kumukwata ; kate kakwakadi muntu umwabaka bianca.

⁴⁵ Mbwôso basadi bakalwa kudi makanda manene yi kudi baFalixi ; yi bobo bakabambila ene, Kukai nwakadi kanusomucwala ?

⁴⁶ Basadi bakatôya ene, Kalikali muntu kutôya noku nyô, bea biatôya muntu you.

⁴⁷ BaFalixi lolo bakapingasa ene, Nonu kabidi nwamadimbibwa ?

⁴⁸ Muntu udiko a bantu banene amamwetabuxila, ndo a baFalixi ?

⁴⁹ Kate kimbukuma kieki kia bantu batabiyi bwadi badi bena mulau.

⁵⁰ Nikodemo akabambila (you akalwa kudiyi buxi, akadi muntu abo mikyeabo)

⁵¹ ene, Bwadi bwecu bwabela muntu, buxi bwa kumwombwa mikyenci, yi buxi bwa kulubukwa mwencencayi ?

⁵² Bakamupingasa yi bakatôya ene, Owe kabidi udi muna Ngalili ? Palala yi lembetela ene, mu Ngalili kamusobatuka mudimuxi.

⁵³ Yi bakancuka muntu ku ncibo anci, muntu ku ncibo anci.