YOANO 4 - Disambi Dipyadipya

¹ PAKALUBUKWA Fumu lolo mwakakwombwa baFalixi ene, Yisu adika Yoano yi kweyesa yi kunumeya beyi,

² (kaninga Yisu akadi kasonumeya mikyenci, kate beyi banci),

³ akaxiya Yudiya yi akancuka kuya kabidi ku Ngalili.

⁴ Yi akadi yi dibambu dia kudika mu Samalia.

⁵ Akalwa lolo ku bula bwa Samalia bwabikidibwa ene, Sukala, pepe yi mbata akapa Yakobo mwananci Yosefe.

⁶ Yi mpokolo a Yakobo akadi koku ; mbwôso Yisu akadi yi bokôkô bwalo bwa lwendo lwanci, akaxikama nako ku mpokolo. Kwakadi pepe yi ola amusambomo.

⁷ Mwamukaxi akalwa, muna Samalia, kulwa suna mai ; Yisu akamwambila ene, Mpi mai a kunwa.

⁸ Bwalo bwakamaya beyi banci ku bula kuya ola bidya.

⁹ Mwamukaxi a Samalia akamutôyela lolo ene, Owe muna Yuda ungwalombela mai beci ? udi mwamukaxi a Samalia ; bwalo butasoputolañana bena Yuda yi bena Samalia.

¹⁰ Yisu akapingasa yi akamwambila ene, Ximbi wamalubukwa dilongi dia Ncembi yi you amakutôyela ene, Mpi mai a kunwa, owe uxemulomba, yi yei uxekupa mai a môyo.

¹¹ Mwamukaxi akamwambila ene, Mukyelengi, kuna yi kintu kia kusuna yinakio, yi mai adi kulekule twakô  ; mbwôso owe wapwangata mai aa a môyo ku kidi kai ?

¹² Owe wamadika tetecu Yakobo bunene, akatupa mpokolo, yi akanwa momu mikyenci yi bana banci yi bibôbô bienci ?

¹³ Yisu akapingasa, akamwambila ene, Muntu mwoso unonwa mai aa noku unakwombwa nyota kabidi ;

¹⁴ kaninga muntu mwoso unonwa mai anamupa, kanakwombwa kabidi nyota nyô ; kate mai anamupa analwa munda mwanci mpokolo a mai, amatamba tamba ku môyo ă kô kô.

¹⁵ Mwamukaxi akamwambila ene, Mukyelengi, mpi mai aa, bintasokwombwa nyota, bintasolwa kunu kulwa suna mai.

¹⁶ Yisu akamwambila ene, Yaka ya bikili bayebe, nunalwa kunu.

¹⁷ Mwamukaxi akamupingasa ene, Kiena yi bayami. Yisu akamwambila ene, Waputôya sôsolwo ene, Kiena yi mwamulumi ku bayami.

¹⁸ Bwalo bwakadi yi babalumi batano, yi you apwangata nkyekyu kiena bayebe ; nako waputôya sôsôlwo.

¹⁹ Mwamukaxi akamwambila ene, Mukyelengi, ngwamona owe udi mudimuxi.

²⁰ Batetecu bakaxingila ku lupongo lolu, yi nonu nwatôya ene, Munda mwa Yelusaleme mudi kidi kixexingila muntu.

²¹ Yisu akamwambila ene, Mwamukaxi, ungwetabusi, ola ulu kulwa ununaxingila Tete kumoni ndo ku lupongo lolu, ndo ku Yelusaleme.

²² Nonu nwaxingila kinutabiyi ; coco twaxingila kitubili, bwalo bulolwa kipandilu kia môyo kudi bena Yuda.

²³ Kaninga ola ulolwa, udiko lolo, unaxingila Tete baxingidi ba sôsôlwo ku mwoxixi yi ku sôsôlwo ; bwalo bwapalala lolo Tete bantu ba noku ndo kwakala baxingidi banci.

²⁴ Ncembi udi Mwoxixi, yi bobo bamwaxingila baxemuxingila ku mwoxixi yi ku sôsôlwo.

²⁵ Mwamukaxi akamwambila ene, Ngwalubukwa ene, Mesiya ulolwa, abikidibwa ene, Kalistu ; panakala yei amalwa, unatwambila malo moso.

²⁶ Yisu akamwambila ene, Meme kayou, atôya yinebe.

²⁷ Ku kikondo kieki kwakalwa beyi banci, yi bakakama bwalo bwakatoyayi yi mwamukaxi, kaninga kakwakadi muntu amatôya ene, Wapalala kai ? ndo ene, Kukai wamakwambilañana yinanci ?

²⁸ Mwamukaxi lolo akaxiya dibungu dienci yi akaya ku bula ; yi akatôyela babalumi ene,

²⁹ Nulwi mona muntu amangwambila malo moso anamakwenca, ki yei ndo Kalistu ?

³⁰ Bakancuka lolo ku bula, yi bakadi mu kulwa kudiyi.

³¹ Kaninga beyi bakalwa papo kulwa mwapangusa ene, Labi, dyaka.

³² Mo yei akabambila ene, Meme ndi yi bidya bia kudya binutabiyi nonu.

³³ Mbwôsô beyi bakatôyelañana ene, Ape muntu apumucwadila kintu kioso kia kudya ?

³⁴ Yisu akabambila ene, Bidya biamene bidi ndo kukisa nyinga yenci ya you amangutuma, yi kumana mudimo ănci.

³⁵ Ka nonu nwatôya ene, Ngondo yikidi inai ; kunyuma kunalwa kikondo kia kibukilu ? Mona meme nwatôyela ene, Nusangoli meso, numoni bibidi, bwalo budibio lowa isanga nkyekyu kubuka.

³⁶ You abuka kangata difuto, kakokyeya muxekye ku môyo ă kô kô, bixexekyelelañana you akuna yi you abuka.

³⁷ Mo nako, diyi didi sôsôlwo, ene, Muntu umoumwe ndo akuna, munga ndo abuka.

³⁸ Meme nakanutuma kuya buka kunwakadi kanusokwenca mudimo ; banga bamakwenca mudimo yi nonu nwamabwela ku mudimo ăbo.

³⁹ Mo bena Samalia bangi ba ku bula bobu bakamwetabuxila bwalo bwa diyi dia mwamukaxi akatôbôla ntôbô ene, Akangwambila malo moso anamakwenca.

⁴⁰ Mbwôso pakalwa bena Samalia kudiyi, bakamulomba asali yinabo, yi akasala koku matuku abidi.

⁴¹ Yi banga bakakwetabusa bangi bangi bwalo bwa diyi dienci,

⁴² yi bakakwambila mwamukaxi ene, Kumoni kabidi ku bwalo bwa kutôya kwebe ndo kutwapwetabusa, bwalo butwamamwombwa mikyecu, yi twalubukwa ene, you udi Mupandixi a loboko sôsôlwo.

⁴³ Mo kunyuma kwa matuku abidi aa, kwakabatukayi koku kuya ku Ngalili,

⁴⁴ bwalo bwakatôbôla Yisu mikyenci ntôbô ene, Mudimuxi kiena yi nkumbu mu mbata anci mikyenci.

⁴⁵ Mbwôso pakalwayi ku Ngalili, bena Ngalili bakamwangata bwalo bwakamonabo bintu bioso biakakwencayi mu Yelusaleme ku kitula, bwalo bwakayabo kabidi ku kitula.

⁴⁶ Ndo biakalwayi kabidi ku Kana a Ngalili, kwakakulumunayi mai ku finyo. Koku kwakadi muna kikupu, akadi yi mwananci yi kusama ku Kapenaumu.

⁴⁷ Yei pakakwombwayi ene, Yisu amancuka mu Yudiya kulwa ku Ngalili, akaya kudiyi yi akalomba ene, apwekipo kulwa pandisa mwananci, bwalo bwakadiyi pepe yi kufwa.

⁴⁸ Biakamutôyela Yisu ene, Kutena nwamona bilayixilu yi bikamakama, kanunakwetabusa pô.

⁴⁹ Muna kikupu akamwambila ene, Mukyelengi, pwekapo buxi bunafwa mwanami.

⁵⁰ Yisu akamwambila ene, Yaka ; mwanebe udi yi môyo. Yi muntu akakwetabusa diyi diakamutôyela Yisu, yi akaya mu ncila anci.

⁵¹ Mo pakadi ukiapweka, basadi banci bakapomanañana yinanci bamamucwadila diyi ene, Mwanebe udi yi môyo.

⁵² Mbwôso akabapanguxila pa ola akancincilayi. Yi bakamwambila ene, Mankyelo ku ola a sambwali ndo kwakamuncuka mudilu.

⁵³ Tetenci lolo akalubukwa ene, kwakadi ola you akamwambila Yisu ene, Mwanebe udi yi môyo, yi mikyenci akakwetabusa yi nkumbu anci bungi bwabo.

⁵⁴ Kilayixilu kieki kabidi kiamubidi ndo kiakakwenca Yisu, pakadi amalwa mu Yudiya kulwa ku Ngalili.