YOANO 3 - Disambi Dipyadipya

¹ KANINGA muntu akadiko a baFalixi, dina dienci ene, Nikodemo, muntu munene a bena Yuda ;

² yei akalwa kudiyi ku butuku, yi akamwambila ene, Labi, twalubukwa ene, Owe udi mweyexi amalwa kudi Ncembi, bwalo butasolubukwa muntu kukisa bilayixilu bebi biakisa Owe kutena Ncembi udi yinanci.

³ Yisu akapingasa yi akamwambila ene, Sôsolwo, sosôlwo, nkwatôyela ene, Kutena muntu amalelebwa kabidi, kabiyi kumona bufumu bwa Ncembi.

⁴ Nikodemo akamwambila ene. Muntu unalelebwa beci panakala udi kinunu ? Ubili kubwela diamubidi mu difu dia mamanci kulwa lelebwa ?

⁵ Yisu akapingasa ene, Sôsôlwo, sôsôlwo, nkwatôyela ene, kutena muntu amalelebwa kudi mai, yi kudi Mwoxixi, kabiyi kubwela mu bufumu bwa Ncembi.

⁶ Kintu kioso kiamalelebwa kudi munyu kidi munyu ; kioso pako kiamalelebwa kudi Mwoxixi kidi Mwoxixi.

⁷ Kukamini munapukutôyela ene, Nudi yi dibambu dia kulelebwa kabidi.

⁸ Mwoxixi ndo ăpupuya kwoso kwanangau, yi owe wombombwa diyi diau, kate kusolubukwa kulolwau yi kuyeyau ; kudi nako yi muntu mwoso amalelebwa kudi Mwoxixi.

⁹ Nikodemo akapingasa yi akamwambila ene, Bintu bebi binakala beci ?

¹⁰ Yisu akapingasa yi akamwambila ene, Owe ndo mweyexi a Isalele yi kusolembetela bintu bebi ?

¹¹ Sôsôlwo, sôsôlwo nkwatôyela ene, Coco twatôya malo atwalubukwa, yi twatôbôla ntôbô ya malo atwamamona, yi nonu kanusoangata ntôbô yecu.

¹² Ndo napunutôyela malo a paxi yi nonu kanusokwetabusa, nunakwetabusa beci ndo nakunutôyela malo a diulu ?

¹³ Muntu kienako amaximuna ku diulu utena you akapweka mu diulu, Mwana a muntu utani mu diulu.

¹⁴ Yi byaka biakakwombulula Mosese nyoka mu mbata a kisobe bidi Mwana a muntu yi dibambu dia kwombuludibwa,

¹⁵ bitaxepya muntu mwoso umwetabuxila kate uxeakala yi môyo ă kô kô.

¹⁶ Bwalo bwakananga Ncembi loboko nako biakapayi Mwananci a Ditôi, ene, muntu mwoso umwetabuxila kaxepya, kate uxeakala yi môyo ă kô kô.

¹⁷ Bwalo butatumini Ncembi Mwananci ku loboko kulwa bela loboko, kate bixepandixibwa loboko kudiyi.

¹⁸ You umwetabuxila kasobelebwa ; you pako utasokwetabusa amabelebwa nkyekyu, bwalo butakwetabuxilayi dina dia Mwana a Ncembi a Ditôi.

¹⁹ Kunu kudi lopelo ene, obo amalwa ku loboko, yi bantu bamananga mwedima, kumbni obo ; bwalo bwakadi makisa abo mabi.

²⁰ Bwalo bwanyañana muntu mwoso obo encenca bubi, yi kasolwa ku obo ximbi makisa anci axetongolebwa.

²¹ Mo you encenca sôsôlwo ulolwa ku obo bixekwebexebwa makisa anci ene, amakwencebwa mu Ncembi.

²² Kunyuma kwa bintu bebi, kwakalwa Yisu yi beyi banci ku mbata a Yudiya ; yi akakala koku yi akanumeya bantu.

²³ Yoano kabidi akadi mu kunumeya numeya ku Enono, pepe yi Salimi, bwalo bwakadi mai mangi koku ; yi bakalwa, yi bakanumeyebwa ;

²⁴ bwalo bwakadi Yoano ukidi kasokwelebwa mu ncibo a lukanu.

²⁵ Mbwôsô bakakwelesañana mbata kudi beyi ba Yoano yi muna Yuda dia kukusudibwa.

²⁶ Yi bakalwa kudi Yoano yi bakamwambila ene, Labi, you akadi yinebe ku dixia dia Yôdana, akatôbôlela owe ntôbô, mona, yei ndo anumeya numeya, yi bantu boso balolwa kudiyi.

²⁷ Yoano akapingasa, ene, Muntu kabiyi kwangata kintu pô, kutena kwamamupebwa ku diulu.

²⁸ Nonu mikyenu nungwatôbôlela binakatôya ene, Meme kiena Kalistu, kate ene, namatumibwa ku buxi bwanci.

²⁹ You utani yi muna dibakwa udi mwangaci a dibakwa ; mo kimbila kia mwangaci, kiamakwemana yi kiamamwombwa, ndo kiaxekyelela kiango bwalo bwa diyi dia mwangaci a dibakwa ; mbwôso kiango kiamene kieki noku kiamafika.

³⁰ Yei udi yi dibambu dia kutumba, meme mpwekyeleli.

³¹ You ulolwa kulu udi kulu kwa bantu boso. Muna paxi udi a loboko, yi dia loboko ndo diatôyayi ; you abatuka mu diulu udi kulu kwa bantu boso.

³² Bwalo lolo bwamamonayi yi bwamakwombwayi ndo bwatôbôlayi ; yi kakuna muntu amangata ntôbô yenci.

³³ You amangata ntôbô yenci amanamacisa kilembetelu kienci ene, Ncembi udi sôsôlwo.

³⁴ You aputuma Ncembi ndo atôya meyi a Ncembi bwalo butasopayi Mwoxixi yi bunya.

³⁵ Tete amananga Mwana, yi amalongola bintu bioso ku kianca kienci.

³⁶ You etabuxila Mwana udi yi môyo ă kô kô ; you pako utasokwedeya Mwana kanamona môyô, kate bisusu bia Ncembi biamasala kulu kwanci.