YOANO 21 - Disambi Dipyadipya

¹ KUNYUMA kwa bintu bebi, kwakadiebesa Yisu mikyenci kabidi kudi beyi ku mai a Tibeliasa. Akadiebesa mikyenci nako.

² Ku kidi kieki kwakadi Ximono Pita, yi Tomasa abikilabo ene, Didimusu, yi Natanyele a ku Kana mu Ngalili, yi bana ba Sebede, yi bamo beyi banci babidi.

³ Ximono Pita akabambila ene, Nceya kwata yixi. Bakamwambila ene, Coco kabidi tulolwa yinebe. Bakaya kondela lolo mu kibusu, yi ku butuku bobu bakadi kabasokwata yixi umoumwe.

⁴ Yi pakadi butuku butanakya, Yisu akakwemana ku mbongo ; kaninga beyi bakadi kabasolubukwa ene, udi Yisu.

⁵ Mbwôso Yisu akabambila ene, Bana, nudi yi kintu kia kudya ? Bakamwambila ěne, Kumoni.

⁶ Akabambila ene, Nweli matei ku mwanca ă kibusu ku kidyo, yi nunasañana yixi. Biakakwelabo, yi nkyekyu bakadi kabasoponyañana yi kwaya, bwalo bwa yixi bungi bungi.

⁷ Mbwôso you mweyi akananga Yisu akakwambila Pita ene, You ndo Fumu. Ximono Pita lolo, pakakwombwayi ene, kudi Fumu, akalata mucwala ănci (bwalo bwakadiyi butaka), yi akadiela mikyenci mu mai.

⁸ Mo banga beyi bakalwa mu kibusu kibende, bwalo butakadibo kulekule yi mbata, kate bea kubiti nkama ibidi, badi mu kwaya matei yi yixi.

⁹ Pakasabukabo lolo ku mbata, bakamona mudilu koku ă makala, yi yixi pelu pau, yi mampa.

¹⁰ Yisu akabambila ene, Nucwali yixi yinwapukwata mo nkyekyu.

¹¹ Ximono Pita akaya kwaya matei ku mbata, amakwolubila yixi minene, nkama yi masangi atano yi yixi isatu ; mo isanga yakadi bungi noku, matei akadi kasopandibwa.

¹² Yisu akabambila ene, Nulwi, nudi. Kaninga kakwakadi mweyi umoumwe akaponya yi kumwapangusa ene, Owe ndo ñani ? bwalo bwakalubukwabo ene, udi Fumu.

¹³ Yisu akalwa yi akangata mampa, yi akabapa, yi yixi mo nako kabidi.

¹⁴ Kieki ndo kikondo kiamusatu kiakakwebexebwa Yisu kudi beyi, pakadi amabika kudi bafu.

¹⁵ Mbwôso pakadi bamadya, Yisu akatôyela Ximono Pita ene, Ximono a Yona, owe wamadika baba noku yi kungunanga ? Akamwambila ene, E, Fumu ; Owe walembetela ene, namakuleyaleya. Akamwambila ene, Disa bana ba mikwakwa bamene.

¹⁶ Akamutôyela diamubidi ene, Ximono a Yona, wamangunanga ? Akamwambila ene, E, Fumu ; Owe walembetela ene, namakuleyaleya. Akamwambila ene, Nama mikwakwa yamene.

¹⁷ Akamutôyela diamusatu, ene, Ximono a Yona, wamanguleyaleya ? Pita akakabana bwalo bwakamwambilayi diamusatu, ene, wamanguleyaleya ? yi akamwambila ene, Fumu, Owe walembetela bintu bioso ; Owe walubukwa ene, namakuleyaleya. Yisu akamwambila ene, Disa mikwakwa yamene.

¹⁸ Sôsôlwo, sôsôlwo, nkwatôyela ene, Pakadi ukidi mubende, wakadikoba mikyebe, yi wakakwenda kwoso kwakakyeba ; kaninga panakala owe udi kinunu, unaxombola bianca biebe, yi munga unakukoba, unakucwala kutasokyeba.

¹⁹ Kaninga akatôya noku ndo kwebesa butonga bwa lufu luxetumbisayi Ncembi yinalu. Pakadi amatôya noku, akamwambila ene, Ungulandudili.

²⁰ Pita akakulumuka, akamona mweyi akananga Yisu udi mu kulandudila kunyuma ; you akakwengama ku kiedi kienci ku bidya, akatôya ene, Fumu, ñani you ukwengenga ?

²¹ Pita, biakamumonayi, akakwapangusa Yisu ene, Fumu, ape bwalo bwa muntu you ?

²² Yisu akamwambila ene, Aka meme namananga asali pôi kikondo kindolwa, bwalo budi ndo bwebe ? Owe ungulandudili.

²³ Mbwôso mwoximo ăkacakana kudi bakunyi ene, You mweyi kanafwa. Kaninga Yisu akadi kasomutôyela ene, Kanafwa ; kate ene, Aka namananga asali pôi kikondo kindolwa, bwalo budi ndo bwebe ?

²⁴ You ndo mweyi amatôbôla bintu bebi ntôbô, yi akafunda bintu bebi ; i yi twalubukwa ene, ntôbô yenci idi sôsôlwo.

²⁵ Binga bintu bidi bingi bingi kabidi biakakwenca Yisu ; ximbi biamafundibwa bungi bwabio, ngwencenca ene, isanga loboko mikyeiu kaluxekuka mikanda yixefundibwa.