YOANO 2 - Disambi Dipyadipya

¹ KU dituku diamusatu kwakadi dibakwa ku Kana mu Ngalili, yi Yisu mamanci akadi koku.

² Yi Yisu akaswadibwa yi beyi banci ku bidya bia dibakwa.

³ Yi pakasaka finyo, Yisu mamanci ndo akamwambila ene, Kabena yi finyo,

⁴ Yisu akamwambila ene, Nkisi yinebe kai, mwamukaxi ? Ola amene kafikili.

⁵ Mamanci akakwambila basadi ene, Kintu kioso kinanwambilayi, nonu nukienci.

⁶ Koku lolo kwakakwemana mabungu manene a mabwe asombomo, luna biakusula kusula bena Yuda bintu yinao, alelekyela yi macwala ndo abidi ku dibungu ndo asatu.

⁷ Yisu akabambila ene, Nwolubisi mabungu mai. Yi bakakwolubisa tô tô tô.

⁸ Yi akabambila ene, Nusuni nkyekyu, nucwali kudi fumu a kidyaki. Yi bakacwala.

⁹ Yi fumu a kidyaki, pakakikisayi mai akakulumunibwa ku finyo, yi akadi kasolubukwa kwakalwao, (kate basadi bakasuna mai bakalubukwa,) fumu a kidyaki akabikila mwangaci a dibakwa

¹⁰ yi akamwambila ene, Muntu mwoso amateka finyo unengela buxi ; oka lolo bantu bamanwa loko, kunyuma finyo a kanana ; owe pako wamabumba finyo unengela pôi nkyekyu.

¹¹ Bubangabanga bobu bwa bilayixilu bienci ndo bwakakwenca Yisu ku Kana mu Ngalili, yi akakwebesa dikai dienci ; yi beyi banci bakamwetabuxila.

¹² Kunyuma kwakapwekayi ku Kapenaumu, yei yi mamanci yi bena kwanci yi beyi banci ; yi bakasala koku matuku atena mangi.

¹³ Kidikixilu lolo kia bena Yuda kiakadi pepe, yi Yisu akaximuna ku Yelusaleme.

¹⁴ Yi akasañana bantu mu tempelo badi mu kwodisa ñombi yi mikwakwa yi bimbenga, yi basumbanyi ba mpalata baxikamini momu ;

¹⁵ yi akakwenca mwobangabanga ă mixinga, yi akatenyeka bungi bwabo mu tempelo, yi mikwakwa yi nombi ; yi akapangulula mpalata ya basumbanyi, yi akapudeya mesa yabo ;

¹⁶ yi akatôyela bodixi ba bimbenga ene, Nunculi bintu bebi momu ; kanuteki ncibo a Tetemi ncibo a kisalu.

¹⁷ Yi beyi banci bakakwela lukanyi mwakafundibwa ene, Mulukutu ă ncibo ebe ămangudya.

¹⁸ Mbwôso bena Yuda bakakulumuna yi bakamwambila ene, Owe utwebesa kilayixilu kai ? bwalo bwakisa bintu bebi.

¹⁹ Yisu akapingasa yi akabambila ene, Nuxipi tempelo you, yi nakumubisa kabidi ku matuku asatu.

²⁰ Bena Yuda bakatôya lolo, ene, Ku mbula masangi anai yi mbula isambomo ndo kwakakwabakibwa tempelo you, yi owe unamubisa ku matuku asatu ?

²¹ Kaninga yei akatôya dia tempelo a mumbidi ănci.

²² Mbwôso pakadi amabixibwa kudi bafu, beyi banci bakakwela lukanyi mwakatôyayi nako, yi bakakwetabusa mukanda ă Ncembi, yi diyi diakatôya Yisu.

²³ Pakadiyi lolo ku Yelusaleme ku Kidikixilu, ku kitula, bantu bangi bakakwetabuxila dina dienci, bamatebela bilayixilu bienci biakakwencayi.

²⁴ Kate Yisu mikyenci akadi kasobetabuxila bienci, bwalo bwakalubukwayi bantu boso,

²⁵ yi bwalo butakwabilayi muntu a kumutôbôlela dia muntu ; bwalo bwakalubukwayi mikyenci munda mwa muntu mudimu.