YOANO 19 - Disambi Dipyadipya

¹ MBWOSO Pilata akangata Yisu yi akamukuma bintu.

² Yi masalai akaluka kilongo kia mieba, yi akakiapeya kulu kwa mucwe ănci, yi akamulatisa mwombonda ă tululu a bwinu ;

³ yi akalwa kudiyi ene, Bwatetela, fumu a bena Yuda ; yi akamukuma kuma mapi.

⁴ Yi Pilata akabatuka kunci kabidi, yi akabatôyela ene, Mona, ntanamubatusa kunudi binuxelubukwa ene, kisosañana bwalo bubi yinanci pô.

⁵ Yisu lolo akabatuka kunci, ulete kilongo kia mieba, yi mwombonda ă tululu a bwinu. Yi akabambila ene, Numoni muntu.

⁶ Mbwôso pakamumona makanda manene yi tupalai, bakakwamena ene, Umukopeki ku nkulusu, umukopeki. Pilata akabambila ene, Numwangati mikyenu, numukopeki ku nkulusu, bwalo buntasosañana bwalo bubi yinanci.

⁷ Bena Yuda bakamupingasa ene, Coco tudi yi mulangu, yi ku mulangu ou ndo kuxefwayi bwalo bwamaditekayi Mwana a Ncembi.

⁸ Mbwôso pakakwombwa Pilata diyi dedi, akadika kucina ;

⁹ yi akabwela mu kisambolelu kabidi, yi akakwambila Yisu ene, Owe udi muna kupai ? Kaninga Yisu kamupingaxili diyi.

¹⁰ Pilata lolo akamwambila ene, Kusompa diyi ? Kusolubukwa ene, meme ndi yi bumanya bwa kukupaula, yi ndi yi bumanya bwa kukukopeka ku nkulusu ?

¹¹ Yisu ene, Kuxeakala yi bumanya ku bwalo bwamene kutena bwamakupebwa kulu ; mbwôso you amangulongola kudi udi yi kwona kwadika bungi.

¹² Pôi kikondo kieki pakapalaia Pilata kumupaula ; mo bena Yuda bakakwamena ene, Ndo wapaula muntu you, kuna kimbila kia Kyesa. Muntu mwoso udiateka fumu amatanda yi Kyesa.

¹³ Mbwôso Pilata, pakakwombwayi meyi aa, akabatusa Yisu yi akaxikama ku nkwasa a kisambolelu, ku kidi kiabikilabo ene, Dibanca dia mabwe, kaninga ku luna Ebeleo ene, Ngabata.

¹⁴ Kwakadi lolo kilungikilu kia Kidikixilu ; kwakadi pepe yi ola amusambomo ; yi akakwambila bena Yuda ene, Numoni fumwenu.

¹⁵ Mo bakakwamena ene, Umunculi, umunculi, umukopeki ku nkulusu. Pilata akabambila ene, Nkopeki fumwenu ? Makanda manene akapingasa ene, Katuna yi fumu utena Kyesa.

¹⁶ Kunyuma lolo akabalongolelayi, ayi kopekyebwa ku nkulusu. Mbwôso bakakwata Yisu,

¹⁷ yi yei akabatuka, udi mu kwombulula nkulusu anci, kuya ku kidi kiabikilabo ene, Kidi kia kibwongwasa, kiabikidibwa ku luna Ebeleo ene, Ngolongota ;

¹⁸ kwakamukopekabo, yi bamo yinanci babidi, you ku lubalu lolu, you ku lubalu yilwa, yi Yisu pakacikaci.

¹⁹ Yi Pilata akafunda mukanda kabidi, yi akauteka pelu pa nkulusu. Papa pakafundibwa ene, Yisu a Nasalete, Fumu a bena Yuda.

²⁰ Mukanda ou lolo ăkabalabo kudi bena Yuda bangi, bwalo bwakadi kidi kieki kiakakopekyebwa Yisu pepe yi bula ; yi ăkafundibwa luna Ebeleo, yi luna Latini, yi luna Ngiliki.

²¹ Mbwôso makanda manene a bena Yuda akakwambila Pilata ene, Kufundi ene, Fumu a bena Yuda, kate ene, Yei akatôya ene, Meme ndi fumu a bena Yuda.

²² Pilata akapingasa ene, Binapufunda, napubifunda.

²³ Masalai lolo, pakadi amakopeka Yisu ku nkulusu, akangata bilamba bienci, yi akakwabanya makapa anai, muntu dienci dikapa, muntu dienci dikapa ; yi mucwala munene kabidi. Kaninga mucwala ăkadi kauna yi disambi, ăkalukibwa buncima bwau pôi kulu pôi muxi,

²⁴ Mbwôso bakatôyelañana ene, Katupandi, kate tuculi lubexi, unawangata ñani ; bixefikixibwa diyi dia mukanda ă Ncembi, diatôya ene, Bakakwabanyañana bilamba biamene, yi bwalo bwa mucwala ămene ndo bwakacwabo lubexi. Biakakwenca masalai bintu bebi.

²⁵ Ku nkulusu a Yisu lolo kwakakwemana mamanci, yi mamanci mwakunyenci, Mali a Kyeleopasa, yi Mali a Mangadala.

²⁶ Yisu, pakamonayi mamanci, yi mweyi amakwemana koku akanangayi, akatôyela mamanci ene, Mwamukaxi, tebela mwanebe.

²⁷ Akatôyela lolo mweyi ene, Tebela mabebe. Yi pôi kikondo kieki, pakamucwala mweyi you kwanci.

²⁸ Kunyuma, pakalubukwa Yisu ene, bintu bioso biamapwa nkyekyu, bixefikixibwa diyi dia mukanda ă Ncembi ndo akatôyayi ene, Ndi yi nyota.

²⁹ Koku lolo kwakadi mpamba a finika amakwolubila tô, yi pakadi bamakwolubisa supunci finika, bakamubandisa ku musuku ănci.

³⁰ Mbwôso pakadi Yisu apwangata finika akatoya ene, Kwamapwa ; yi akakwenama mucwe ănci yi akalongola kidimu kienci.

³¹ Mbwôso, bitaxesala mimbidi ku nkulusu ku Sabado, (bwalo bwakadi kilungikilu, yi diba dia Sabado you diakadi diba dinene), bena Yuda ndo bakalomba Pilata, mikolo yabo yinyowebwi, yi bafu mikyeabo bancudibwi.

³² Mbwôso masalai akalwa nyowa mikolo ya muna buxi yi ya munga akakopekyebwa yinanci ku nkulusu ;

³³ kaninga pakalwabo kudi Yisu, biakamumonabo afufwa buxi, bakadi kabasonyowa mikolo yenci,

³⁴ kate disalai dimodimwe diakabongola lubalu lwanci dikonga, yi koku kwakancuka maxi yi mai mangwoso.

³⁵ Yi you akamona akatôbôla ntôbô, yi ntôbô yenci idi sôsôlwo, yi mikyenci amalubukwa ene, amatôya sôsôlwo, binuxekwetabusa nonu kabidi.

³⁶ Bwalo bwakakwencebwa bintu bebi bixefikixibwa diyi dia mukanda ă Ncembi ene, Kakunanyowebwa mufwa ănci umoumwe.

³⁷ Dimo diyi kabidi dia mukanda ă Ncembi diamatôya ene, Banamuxixima akabongolabo.

³⁸ Kunyuma kwa bintu bebi, Yosefe a Alimatia, akadi mweyi a Yisu, kaninga ku busoko bwalo bwa bowa bwa bena Yuda, akalomba Pilata ene, Nculi mumbidi ă Yisu ; yi Pilata akakwetabusa. Mbwôso akalwa ncula mumbidi ănci.

³⁹ Yi Nikodemo akalwa kabidi, you akalwa kudiyi ku buxi buxi ku butuku, amacwala boputo bwa mô yi aloso, pa lwedi lwa nkama a pundu.

⁴⁰ Mbwôsô bakangata mumbidi ă Yisu yi bakaudinga mbuxa ya susu yi boputo bwa manonu, bea bidi muncikilu ă bena Yuda kuncika.

⁴¹ Mo munda mwa kidi kiakaxipibwayi mwakadi kibidi ; yi munda mwa kibidi mwakadi lukita lupyalupya lutaladikibwa muntu munda pô.

⁴² Mbwôso, bwalo bwa kilungikilu kia bena Yuda, yi bwalo bwakadi lukita pepe, ndo bwakancikabo Yisu koku.