YOANO 18 - Disambi Dipyadipya

¹ PAKADI Yisu amamana malo aa kutôya, akabatuka yi beyi banci dixia dia muxilu ă Kyedelono, kwakadi kibidi kiakabwelayi munda, mikyenci yi beyi banci.

² Yudaxi kabidi akamwenga akalubukwa kidi, bwalo bwakaya Yisu momu matuku mangi yi beyi banci.

³ Mbwôso Yudaxi, pakadi amangata kibumbu kia masalai, yi tupalai kudi makanda manene yi kudi baFalixi, akalwa momu yi minda, yi makolobo, yi bipiko.

⁴ Mbwôso Yisu, akalubukwa bintu bioso bixemuponena, akabatuka yi akabambila ene, Nwapalala ñani ?

⁵ Bakamupingasa ene, Yisu a Nasalete. Yisu akabambila ene, Meme kayou. Yudaxi kabidi akamwenga akakwemana yinabo.

⁶ Pakabambilayi lolo ene, Meme kayou, bakapokapoka kunyuma yi bakapona paxi.

⁷ Mbwôso akabapangusa kabidi ene, Nwapalala ñani ? Yi bakatôya ene, Yisu a Nasalete.

⁸ Yisu akapingasa ene, Napunwambila ene, Meme kayou. Ndo lolo nungwapalala, nulekyeli bantu baba, bancuki ;

⁹ bixefikixibwa diyi diakatôyayi ene, Bwalo bwabo bwa bantu bamangupa Owe, kiancimisa muntu abo umoumwe.

¹⁰ Mbwôso Ximono Pita, akadi yi mwele, akausomona, yi akakuma musadi a bokanda bunene, akamuxaka dicu dienci dia kidyo. Dina lolo dia musadi ndo Malakusu.

¹¹ Yi Yisu akatôyela Pita ene, Sokyeya mwele ěbe mu lupapa ; mpamba amangupa Tete, ki meme nxemunwa ?

¹² Mbwôso masalai yi kiliaka, yi tupalai twa bena Yuda, bakakwata Yisu yi bakamusuka ;

¹³ yi bakamucwala kudi Anasa buxi, bwalo bwakadiyi bukwondi bwa Kayafa, bokanda bunene bwa ku mbula you.

¹⁴ Kayafa lolo ndo you akakwamina bena Yuda mpanga ene, Kwamalelekyela ndo muntu umoumwe uxefwa ku mucwe ă bubila bobu.

¹⁵ Ximono Pita lolo akalabela Yisu yi munga mweyi. Mo you mweyi akalubukibwa kudi bokanda bunene, yi akabwela yi Yisu munda mwa lumbu lwa bokanda bunene ;

¹⁶ mo Pita akakwemana ku mbelo kunci. Mbwôso mweyi munga akalubukibwa kudi bokanda bunene akabatuka yi akatôya yi munami a babakaxi a mbelo, yi akabwesa Pita.

¹⁷ Muxika lolo, akanama mbelo, akatôyela Pita ene, Owe kabidi udi muna kwabo a beyi ba muntu you ? Yei ene, Kañana.

¹⁸ Mo basadi yi tupalai, pakadi bamanamika mudilu ă makala bwalo bwa maxika, bakakwemana yi bakakwota mudilu ; yi Pita akadi yinabo kabidi, amakwemana, udi mu kwota mudilu.

¹⁹ Mbwôso bokanda bunene bwakakwapangusa Yisu dia beyi banci yi dia kweyesa kwanci.

²⁰ Yisu akamupingasa ene, Namakwambila loboko ku mpala ; namakweyesa matuku moso mu kixingidilu yi mu tempelo mwakokama bungi bwa bena Yuda ; yi ku busoko ndo kuntasotôya bwalo bumobumwe.

²¹ Kukai ungwapanguxila meme ? Apangusa bantu bamakwombwa, binakabambila ; mona, bobo balubukwa malo anakatôya.

²² Kaninga pakadi amatôya nako, kanga kabo ka tupalai twakakwemana papa, kakakuma Yisu lupi ene, Wapingasa bokanda bunene nako ?

²³ Yisu akamupingasa ene, Ndo naputôya bubi, tôbôlela bubi ntôbô ; kaninga ndo loko, kukai ungwakuma ?

²⁴ Mbwôso Anasa akamutuma musuka kudi Kayafa bokanda bunene.

²⁵ Mo Ximono Pita akakwemana, udi mu kwota mudilu. Mbwôso bakamwambila ene, Owe kabidi udi muntu a beyi banci. Yei akakwaba ene, Kumoni.

²⁶ Munga musadi a bokanda bunene, kilungu kia muntu you akaxaka Pita dicu dienci, akatôya ene, Ki napukumona mu kibidi yinanci ?

²⁷ Mbwôso Pita akakwaba mwabu kabidi, yi ntala akakwela diyi mangwoso.

²⁸ Bakacwala Yisu lolo kudi Kayafa kuya ku kisambolelu ; kwakadi butwatuku pexe. Yi bobo mikyeabo bakadi kabasobwela mu kisambolelu bitaxepindixibwabo, kate bixedyabo kitula kia Kidikixilu.

²⁹ Mbwôso Pilata akabatuka kudibo, yi akatôya ene, Kusanya kwa beci ndo kunwasanya muntu you ?

³⁰ Bakapingasa yi bakamwambila ene, Kutena muntu you apwakala mwoni, katuxemulongola kudi.

³¹ Biakabambila Pilata ene, Numwangati mikyenu, numusamboli bea bialelekyela yi bwadi bwenu. Bena Yuda bakamwambila ene, Kakusolelekyela coco kuxipa muntu mwoso ;

³² bixefikixibwa diyi dia Yisu diakatôyayi dia kwebesa butonga bwa lufu luxefwayi.

³³ Mbwôso Pilata akabwela kabidi mu kisambolelu, yi akabikila Yisu, yi akamwambila ene, Owe udi fumu a bena Yuda ?

³⁴ Yisu akapingasa ene, Owe wamaditôyela noku biebe, sungu ndo banga bamakwambila noku ku bwalo bwamene ?

³⁵ Pilata akapingasa ene, Meme ndi muna Yuda ? Bubila bwebe yi makanda manene bamakulongola kundi ; wapwenca kai ?

³⁶ Yisu akapingasa ene, Bufumu bwamene kabuna bwa loboko lolu ; ximbi bufumu bwamene bwapwakala bwa loboko lolu, basadi bamene baxetanda bintaxelongolebwa kudi bena Yuda ; kate nkyekyu bufumu bwamene kabuna bwa kunu.

³⁷ Biakamutôyela Pilata ene, Owe udi Fumu lolo ? Yisu akatôya ene, Owe waputôya ene, meme ndi fumu. Ku bwalo bobu ndo kunamalelebwa, yi ku bwalo bobu ndo kunamalwa ku loboko binxetôbôlela sôsôlwo ntôbô. Muntu mwoso udi muna sôsôlwo ndo ombombwa diyi diamene.

³⁸ Pilata akamwambila ene, Sôsôlwo udi kinani ? Yi pakadi amatôya noku akabatuka kabidi kudi bena Yuda yi akabatôyela ene, Meme kisosañana bwalo bubi yinanci pô.

³⁹ Kaninga nonu nudi yi mwosambu, meme nulekyeleli muntu umoumwe ku Kidikixilu ; nwakyeba lolo nulekyeleli fumu a bena Yuda ?

⁴⁰ Mbwôso bakakwamena bo-a-bwoso ene, Kumoni muntu you kate Balaba. Mo Balaba akadi musancanani.