YOANO 17 - Disambi Dipyadipya

¹ MALO aa ndo akatôya Yisu, akasangola meso anci lwa diulu yi akatôya, ene, Tete, ola apufika ; tumbisa Mwanebe, bixekutumbisa Mwanebe ;

² bea biamamupa bumanya kulu kwa munyu mwoso, api bantu boso môyo bakamupa Owe, ă kô kô.

³ Yi kunu kudi môyo ă kô kô, bobo kukulubukwa Ncembi umoumwe a sôsôlwo, yi Yisu Kalistu akatuma Owe.

⁴ Meme namakutumbisa paxi, bwalo bunamamana mudimo ăkangupa Owe kukisa.

⁵ Nkyekyu lolo, Tete, ungutumbisi yinebe mikyebe yi dikai dinakadi yinadio yinebe buxi bwakadi loboko kalunako.

⁶ Namakwebesa bantu dina diebe bakangupa Owe mu loboko. Bakadi bebe, yi wakangupabo, yi bamanama diyi diebe.

⁷ Nkyekyu bamalubukwa ene, bintu bioso biakangupa Owe biamalwa kudi ;

⁸ bwalo bwa mambi akangupa Owe, meme namabapao, yi bobo bamangata, yi bamalubukwa sôsôlwo ene, nakabatuka kudi ; yi bamakwetabusa ene, Owe wakangutuma.

⁹ Ngwapangusa ku bwalo bwabo ; kisokwapangusa bwalo bwa loboko, kate walo bwabo bwa bantu bamangupa Owe ; bwalo budibo bantu bebe,

¹⁰ yi bintu bioso bidi biamene bidi ndo biebe, yi biebe bidi biamene, yi meme namatumbixibwa munda mwabo.

¹¹ Meme lolo kisoakala ku loboko kabidi nyô, mo baba badi ku loboko, yi meme ndolwa kudi. Tete a babala, ubanami ku dina diebe diamangupa Owe, bakali umoumwe bea bitudi.

¹² Panakadi yinabo, meme nakabanama ku dina diebe bakangupa Owe ; meme namabasamunina, yi kakusoncimina muntu abo umoumwe kutena you mwana a buncimini, bixefikixibwa mukanda ă Ncembi.

¹³ Nkyekyu lolo ndolwa kudi ; yi naputôya bintu bebi ku loboko, bixeakalabo yi kiango kiamene kiamakukanana munda mwabo tô.

¹⁴ Meme namabapa diyi diebe, yi loboko lwamabanyañana bwalo butasoakalabo bena loboko, bea bintasoakala meme muna loboko.

¹⁵ Kisokwapangusa ene, ubanculi ku loboko, kate ene, ubanamuni ku bubi.

¹⁶ Bobo kabena bena loboko bea bintasoakala meme muna loboko.

¹⁷ Ubabaloli ku sôsôlwo ebe ; diyi diebe didi sôsôlwo.

¹⁸ Bea biakangutuma meme ku loboko, ndo binamabatuma ku loboko.

¹⁹ Yi ku bwalo bwabo ndo kundiabalola mikyemi bixebalolebwabo bobo kabidi ku sôsôlwo.

²⁰ Kisokwapangusa bwalo bwabo butupu, kate ku bwalo bwa bantu bangwetabuxila ku diyi diabo ;

²¹ bixeakalabo umoumwe bungi bwabo, bea bidi Owe Tete munda mwamene, yi meme munda mwebe, bixeakalabo umoumwe kabidi munda mwecu ; bixekwetabusa loboko ene, Owe wakangutuma.

²² Yi dikai diakangupa Owe, meme namabapadio, bixeakalabo umoumwe bea bitudi umoumwe ;

²³ meme munda mwabo, yi Owe munda mwamene, bixelundixibwabo umoumwe, bixelubukwa loboko ene, Owe wakangutuma, yi ene, Owe wamabananga bea biamangunanga.

²⁴ Tete, bwalo bwabo bwa bantu bamangupa Owe, ngwakyeba ene, ku kidi kingwakala mikyemi, bobo kabidi baxeakala koku yinami, bixemonabo dikai diamene diamangupa Owe, bwalo bwakangunanga buxi bwa kibangolelu kia loboko.

²⁵ Tete a nkwami, loboko kalwakulubukwa, mo meme nakakulubukwa ; yi bantu baba bakalubukwa ene, Owe wakangutuma.

²⁶ Namabalubukisa lolo dina diebe, yi nakubalubukisadio ; bixeakala nyinga munda mwabo yamangunanga Owe yinayo, yi meme munda mwabo.