YOANO 14 - Disambi Dipyadipya

¹ MUCIMA ěnu kautepexebwi ; nwamakwetabuxila Ncembi, nungwetabuxili meme kabidi.

² Mu ncibo a Tetemi mudi ngumbu mingi ; kutena mwakadi noku, nxenwambila, bwalo buntanaya kuya nulungikila kidi.

³ Yi ndo nakuya nulungikila kidi, ndolwa kabidi kulwa nwangata kundi mikyemi, binuxeakala nonu kungwakala meme.

⁴ Yi kuntanaya, nonu nwamakulubukwa, yi nwamalubukwa ncila.

⁵ Tomasa akamwambila ene, Fumu, katubiyi kuyeya ; tubili ncila lolo beci ?

⁶ Yisu akamwambila ene, Meme ndi ncila, yi sôsôlwo, yi môyo ; kakuna muntu ulolwa kudi Tete kutena kundi meme.

⁷ Ximbi nwamangulubukwa nuxelubukwa Tetemi kabidi ; pôi nkyekyu numwalubukwa, yi nwamamumona.

⁸ Filipi akamwambila ene, Fumu, utwebesipo Tete, nako kunatukuka.

⁹ Yisu akamwambila ene, Napwakala yinenu kikondo bungi noku, yi kusongulubukwa Filipi ? You amangumona amamona Tete ; owe watôya noku beci ? ene, utwebesi Tete.

¹⁰ Kusokwetabusa ene, Meme ndi munda mwa Tete, yi Tete udi munda mwamene ? Meyi anwatôyela, kisoatôya biamene kanana, kate Tete asala munda mwamene, yei ndo encenca makisa.

¹¹ Nungwetabusi meme ene, ndi munda mwa Tete, yi Tete munda mwamene ; kaninga ndo kumoni, nungwetabusi ku mucwe ă makisa mikyeao.

¹² Sôsôlwo, sôsôlwo, nwatôyela ene, You ungwetabuxila meme, makisa angwencenca meme ndo anakwencayi kabidi ; yi amo adika aa noku manene ndo anakwencayi, bwalo buntanaya kudi Tete.

¹³ Yi kintu kioso kinunalomba ku dina diamene, nakukienca, bixetumbixibwa Tete mu Mwana.

¹⁴ Ndo nunalomba kintu kioso ku dina diamene, meme nakukikisa.

¹⁵ Ndo nungwananga, nunami milangu yamene.

¹⁶ Yi meme nakwapangusa kudi Tete yi unanupa munga Musamunini bixeakalayi yinenu kô kô,

¹⁷ Mwoxixi a sôsôlwo,utabiyi loboko kwangata, bwalo butasomumonalu, yi bwalo butasomulubukwalu ; kaninga nonu numwalubukwa, bwalo bwasalayi yinenu, yi unakala munda mwenu.

¹⁸ Kinanukadeya bana ba xiyi ; ndolwa kunudi.

¹⁹ Mo kakondo kabende yi loboko kalusongumona kabidi ; kaninga nonu nungwamona ; bwalo bungwakala yi môyo meme, nonu kabidi nunakala yi môyo.

²⁰ Ku diba dedi nonu nunalubukwa ene, meme ndi munda mwa Tetemi, yi nonu nudi munda mwamene, yi meme ndi munda mwenu.

²¹ You udi yi milangu yamene, uyanama, yei ndo muntu ungwananga ; yi you ungwananga unanangibwa kudi Tetemi, yi meme nakumunanga, yi nakudiebesa mikyemi kudiyi.

²² Yudaxi, (kumoni you a Ixikalioto), akamwambila ene, Fumu, ape unadiebesa mikyebe kutudi beci, yi kumoni kudi loboko ?

²³ Yisu akapingasa yi akamwambila ene, Aka muntu mwoso ungwananga unanama diyi diamene, yi Tetemi unamunanga, yi tunalwa kudiyi yi tunakwenca ncibo ecu yinanci.

²⁴ You utasongunanga kasonama meyi amene ; yi diyi dinwombombwa kadina diamene, kate dia Tete akangutuma.

²⁵ Namanwambila malo aa, pakala nkidi yinenu.

²⁶ Kaninga Musamunini, Mwoxixi a babala, unatuma Tete ku dina diamene, yei unanweyesa malo moso, yi unanwelesa malo moso nkanyi anamanwambila.

²⁷ Ngwaxiya polo yinenu ; nupapa polo amene mikyemi ; kumoni bea bipapa bena loboko ndo binupapa meme. Mucima ěnu kautepexebwi, kaucini.

²⁸ Nwamakwombwa binapunwambila ene, Ngwancuka, yi ndolwa kunudi. Ndo nwamangunanga, nuxexekyelela bwalo buntanakwenda kudi Tete, bwalo bwamangudika Tete bunene.

²⁹ Nkyekyu lolo namanwambila buxi butafikili noku ; binuxekwetabusa pako panakala kwamafika.

³⁰ Kinakwambila yinenu kabidi wungi wungi nyô, bwalo bulolwa fumu a loboko lolu, yi munda mwamene kamusoakalayi yi kintu kimokimwe pô.

³¹ Kate bixelubukwa loboko ene, ngwananga Tete, yi bea biakangulanga Tete, ndo bingwencenca noku. Nwemani, tuncuki kunu.