YAKOBO 5 - Disambi Dipyadipya

¹ NWOMBWI nkyekyu, nonu badidi ; nudili yi nuntentuki yi bidilu bwalo bwa mpeya idi mu kulwa kunudi.

² Bodidi bwenu bwamabola ; yi bilamba bienu biamadibwa bixi.

³ Olo enu yi mpalata enu biamakwata bodingo ; yi bodingo bunakala ntôbô ku bwalo bwenu, yi bunadya munyu ěnu bea mudilu. Nwamabumba bima bienu ku matuku a ku sula.

⁴ Mona mafuto a bena midimo benu bakabuka mixekye mu bibidi bienu, anwamaximba ku bumanya kanana, adi mu kwamena ; yi biia bia bantu bakabuka biamabwela mu macu a Fumu a Sabaoto.

⁵ Nwamalekola yi kuxekyelela pa loboko, yi nwamaianda budibi bwoso ; nwamabuiundisa micima yenu ku dituku dia kixipilu.

⁶ Nwamabela, nwamaxipa muna nkwami ; yei kasotanda yinenu.

⁷ Mbwôso nwakali yi bwika, bakunyi, pôi kilulu kia Fumu. Mona, muna mudimo amakungila muxekye unengela ă loboko, udi yi bwika ku mucwe ău, binakala amangata mbula ya buxi yi mbula ya kunyuma.

⁸ Nonu kabidi nwakali yi bwika ; nusubisi micima yenu ; bwalo budi kilulu kia Fumu pepe.

⁹ Kanupindudilanani bakunyi, binutaxebelebwa ; mona, musambodi amakwemana ku mbelo.

¹⁰ Ndo kwelekyesa kwombwa kwa kusama yi kicwandundu bakunyi, nutebeli badimuxi bakatôya ku dina dia Fumu.

¹¹ Mona, twabikila bantu bamakwombwa yi bwika ene, balwangwasanibwi ; nwamakwombwa dia bwika bwa Yobo, yi nwamamona kisudeyelu kia Fumu, mwapwakala Fumu yi mwengo tô, yi bonkangi.

¹² Kulu kwa manga malo moso bakunyi, kanuteyi biteyi, ndo bwalo bwa diulu, ndo bwa loboko, ndo kinga kiteyi kioso ; mo ya enu akali ene, ya ; yi kumoni enu akali ene, kumoni ; binutaxepona muxi mwa lopelo.

¹³ Kwenu kudi muntu mwoso amafinibwa ? Alombi. Kudi muntu mwoso yi kiango ? A-embikisi misambu.

¹⁴ Kwenu kudi muntu mwoso ombombwa kusama ? Abikili babakulu ba kikokye ; balombi ku bwalo bwanci, bamuxingi manyi mu dina dia Fumu ;

¹⁵ yi lulombu lwa kwetabusa lunapandisa you ombombwa kusama, yi Fumu unamubisa ; yi akali amakwona malo, kwona kunamulekyelebwa.

¹⁶ Mbwôso nusakolanani mabi enu muntu kudi muna kwanci, muntu kudi muna kwanci ; yi nulombelanani binuxepandixibwa masama, Mulombelelu ă kucwa ă muna nkwami ăpwakala yi ngulu mingi.

¹⁷ Eliya akadi muntu a butonga bumobumwe yinecu ; yi akalomba ku lulombu ene, mbula kayiloki ; yi mbula kalokyeli ku loboko lwedi lwa mbula isatu yi ngondo isambomo.

¹⁸ Yi akalomba kabidi ; yi diulu diakalokyesa mbula, yi loboko lwakalelañana bidibwa.

¹⁹ Bakunyi bamene, ndo muntu mwoso kwenu amaungaunga ku sôsôlwo, yi muntu umwapingasa,

²⁰ alubukwi ene, you amapingasa mwoni ku kwona kwa ncila anci unapandisa kidimu lufu, yi unancibika kibumbu kia mabi.