YAKOBO 4 - Disambi Dipyadipya

¹ MBITA yilolwa kupai, yi bitumba kunudi ? Ka bilolwa kunu, isanga kudi mixekyelelu yamafwilañana mu bicini bia mimbidi yenu ?

² Nudi yi xindilu ya bintu, yi kanusoakala yinabio ; nwamaxipa yi nwamakwolubila yi mietumbu, yi kanubiyi kwangata ; nwamatanda bitumba yi mbita ; kanusoangata, bwalo bunutasolomba.

³ Nwamalomba yi kanusoangata, bwalo bunwalomba yi mucima mubi, binuxedya ku mixekyelelu yenu.

⁴ Bena mendela, kanusolubukwa ene, bumbila bwa bena loboko budi nkyetekyete yi Ncembi ? Mbwôso muntu mwoso amananga kwakala kimbila kia loboko udiateka mikyenci mutandanani yi Ncembi.

⁵ Nonu nwakanyakanya ene, mukanda ă Ncembi ămatôya kanana ? Mwoxixi amaxikikayi munda mwa micima yecu amaxindila lolo isanga ku mwokunyo ?

⁶ Mo yei upapa lwoxixi lwamadika bungi. Ndo biatôyayi ene, Ncembi ndo atanda yi bena masasa, mo upapa bantu baiebela lwoxixi.

⁷ Mbwôso nwedeyi Ncembi ; mo nutandi yi diabolo yi yei unacina kunudi.

⁸ Nukokyeii pepe yi Ncembi, yi yei unakokyela pepe yinenu. Nukusuli makaci enu, boni ; yi nususuli micima yenu, bena micimbucimbu.

⁹ Nwombwi mpeya, nudili, nunculi masonci ; tuxoko twenu tukulumunibwi ku bidilu, yi kiango kienu ku buxitu.

¹⁰ Nudipwesi mikyenu ku meso a Fumu, yi yei unanubandisa.

¹¹ Kanutangolanani, bakunyi. You amatangola muna kwanci amatangola bwadi yi amabeia bwadi ; mo ndo wabela bwadi, kuna mukixi a bwadi, kate musambodi.

¹² Mo umoumwe mutupu udi mupi a bwadi yi musambodi ; you ubili kupandisa yi kuxipa ; mo owe udi nani wamasambola muna kwebe ?

¹³ Nwombwi nkyekyu, nonu bamatôya ene, ndo lelo ndo mankyelo tunaya mu bula bobu, yi tunaxikama momu mbula muncimancima, yi tunaleka yi tunatetowa yi bintu ;

¹⁴ nonu pako batasolubukwa bwalo bunakala mankyelo. Môyo ěnu udi beci ? Bwalo budiu lubungi, lwamamoneka kakondo kabende, yi kunyuma lwamancimina.

¹⁵ Ki nuxetôya ene, Ndo Fumu ananga, tunakala yi môyo yi tunakwenca noku yi noku.

¹⁶ Mo nkyekyu nudi mu kwana mu mianu yenu ; kwona kwosa kwa noku kudi bubi.

¹⁷ Mbwôso you ubili mwa kwenca kunengela, yi kasokwenca, ku bwalo bwanci nako kudi kwona.