YAKOBO 2 - Disambi Dipyadipya

¹ BAKUNYI bamene, kanwakadi yi kwetabusa kwa Fumwecu Yisu Kalistu, Fumu a dikai, yi kuyila kwa kikanda.

² Akali muntu amabwela mu kixingidilu kienu udi yi kikyeta kia ôlo yi bilamba bia dikai dingi, yi mwokombi amabwela kabidi udi yi bilamba bia kanana ;

³ yi nonu nwelela you meso amalata bilamba bia dikai dingi yi nwamatôya ene, Xikama owe kunu ku kidi kinengela ; yi nwamatôyela mwokombi ene, Emana owe koku, ndo ene, Xikama muxi mwa katanda kamene ;

⁴ ki nudi mu kuxiyañanisa bantu kunudi, yi nwamafwa basambodi badi yi nkanyi mibi ?

⁵ Nwombwi, bakunyi bamene banangibwi. Ki Ncembi amasungula bakombi ku bwalo bwa loboko lolu, bena madidi ku bwalo bwa kwetabusa, bena miekito ba bufumu bwamabaxiyilayi kilaka bamwananga ?

⁶ Mo nonu nwamakisa mwokombi lukisu. Ki bena madidi bamanufina ñna ? Ki mikyeabo bamanuputulula ku bimu ?

⁷ Ki bamatangola Dina dedi dia kinemu diamatambibwa kulu kwenu ?

⁸ Kaninga ndo nwanama bwadi bwa bufumu luna biamatôya mukanda ă Ncembi ene, Unananga muna kwebe bea mikyebe, nwencenca loko ;

⁹ mo ndo nwamayila bantu kikanda, nudi mu kukisa bubi, yi nwamakwebexebwa boni ku bwadi.

¹⁰ Bwalo ndo muntu mwoso unanama bwadi buncimancima, kaninga ndo unapona ku diyi dimodimwe, amalwa muna bwalo ku mucwe ă bungi bwabu.

¹¹ You akatôya ene, Kwendedi mukaxi abene, akatôya kabidi ene, Kuxipi. Akali lolo owe kusokwendela mukaxi abene, mo ndo wamaxipa, wamalwa mwoni a bwadi.

¹² Nutôyi nako, yi nukisi nako, bea bantu bamalanda kusambolebwa ku bwadi bwa bwana bwa bula ;

¹³ bwalo bunabelebwa you lopelo lutena mwengo utasokwebesa mwengo. Mwengo ndo ănana mwanu ku mpala a lopelo.

¹⁴ Kutetowa kudi beci bakunyi bamene, ndo muntu amatôya ene, udi yi kwetabusa, mo kiena yi makisa ? Kwetabusa kubili kumupandisa ?

¹⁵ Akali muna kwenu a babalumi ndo a babakaxi udi yi butaka, yi amasaka yi bidya ku dituku ku dituku,

¹⁶ yi munga muna kwenu amabambila ene, Nuyi polo ; nwoti mudilu, nwokuti ; mo kasobapela bintu biamasakabo bwalo bwa mumbidi, kutetowa kudi kupai ?

¹⁷ Mo nako kwetabusa, ndo kakuna yi makisa, kudi kufu pabwaku.

¹⁸ Kate munga unatôya ene, Owe udi yi kwetabusa, yi meme ndi yi makisa ; ungwebesi kwetabusa kwebe kutena makisa, yi meme nakukwebesa kwetabusa kwamene ku makisa amene.

¹⁹ Wamakwetabusa ene, Ncembi udi umoumwe. Wamakwenca loko. Bidimu bibi kabidi biamakwetabusa, yi biamaxixumuka.

²⁰ Mo owe wananga kulubukwa, muna kimbombo, ene, kwetabusa kutena makisa kudi kufu ?

²¹ Ki Abalami tetecu akasuwixibwa ku makisa pakadi amalongola Isaka mwananci kulu kwa kilongolelu ?

²² Wamona mwakakwencañana kwetabusa yi makisa anci, yi ku makisa kwakakukixibwa kwetabusa kwanci.

²³ Yi mukanda ă Ncembi ăkafikixibwa ămatôya ene, Abalami akakwetabusa Ncembi, yi kwakamubadidibwa nkwami ; yi akabikidibwa ene, Kimbila kia Ncembi.

²⁴ Nwamona, ku makisa ndo kwamasuwixibwa muntu, yi kumoni ku kwetabusa kutupu.

²⁵ Ki noku kabidi Layaba mudibi akasuwixibwa ku makisa, pakadi amangata mikyenci yi amababatusa munga ncila ?

²⁶ Bwalo bea bidi mumbidi mufu utena yi kidimu, ndo bidi kwetabusa kufu kabidi kutena makisa.