YAKOBO 1 - Disambi Dipyadipya

¹ YAKOBO, musadi a Ncembi yi a Fumu Yisu Kalistu, kudi malungu disangi yi abidi adi Lucakacaka, môyo ěnu.

² Nubali bwalo kiango kitupu, bakunyi bamene, panwapona mu bielekyexelu bia ntonga yi ntonga ;

³ bwalo bunwalubukwa ene, kiebexelu kia kwetabusa kwenu kiamakwenca bwika.

⁴ Mo bwika bwakali yi mudimo ăbu dyendeli, binuxeakala nwamakuka, yi nudi bileli, kutena kusaka yi kintu kioso.

⁵ Mo ndo muntu enu mwoso amasaka yi bwinu, alombi kudi Ncembi upapa bantu boso bintu yi mucima ă loko, yi kasokama măkamu ; yi bunamupebwa.

⁶ Mo alombi yi kwetabusa kutena mwoxituxitu mwoso ; bwalo budi muna mwoxituxitu bea diele dia mai manene diamakwendexebwa kudi lupepele, yi diamatepexebwa.

⁷ Muntu you noku kakixi ene, unangata kintu kioso kudi Fumu ;

⁸ muna nkanyi ibidi amacingacinga mu miesambu yenci nioso.

⁹ Mo mwakunyi mubende ani mwanu bwalo bwa kubandixibwa kwanci ;

¹⁰ yi mwodidi ani bwalo bwa kupwexebwa kwanci ; bwalo bunadikayi bea disusu dia bilo.

¹¹ Bwalo bwamabanda diba yi kilungu kia mudilu, yi diamakwomesa bilo ; yi disusu diabio diamapona paxi, yi lwoxixi lwa butonga bwadio lwamafwa ; mo nako kabidi kunakwoma mwodidi mu ncila yenci mioso.

¹² Mulwangwasanibwi ndo mwamulumi you udi yi bwika mu bielekyexelu ; panakaia amakwalakanibwa, unangata kilongo kia môyo kiamabaxiyila Fumu kilaka bamwananga.

¹³ Muntu katôyi pa kwelekyexebwa ene, Namakwelekyexebwa kudi Ncembi ; bwalo butena Ncembi yi kielekyexelu kia kwelekyexebwa ku malo mabi, yi yei mikyenci kasokwelekyesa muntu mwoso.

¹⁴ Momuntu mwoso amakwelekyexebwa panakala amasomonebwa, yi amapucibwa bea ku lundolu, ku luxindilu lwanci mikyenci.

¹⁵ Kunyuma, luxindilu panakala lwamakwembita, ludi yi bubi ku mwana ; yi bubi, panakala bwamalunda, bwamalela lufu.

¹⁶ Kanuungixibwi, bakunyi bamene banangibwi.

¹⁷ Kupa kwoso kunengela, yi dilongi dioso diamalelekyela, biamalwa kulu, biamapweka kudi Tete a obo mioso. Munda mwanci kamuna mucimbucimbu pô, ndo mudingidingi ă yilayila.

¹⁸ Ku nyinga yenci mikyenci ndo kwakatulelayi ku diyi dia sôsôlwo, bituxeakala luna somo a buxi a bipangu bienci.

¹⁹ Nwalubukwa noku, bakunyi bamene banangibwi. Mo muntu mwoso akali yi lungwoso lwa kwombwa, yi bukodyu bwa kutôya, yi bukodyu bwa bisusu ;

²⁰ bwalo butasokwenca bisusu bia muntu nkwami ya Ncembi.

²¹ Mbwôso nwekyeyi mbindu mioso, yi mwoxingi ămapulcwa ku bungi, yi nwangati diyi yi diedya diamasokyeyebwa munda, dibili kupandisa micima yenu.

²² Mo nwakali bakixi ba diyi, yi kumoni bombwi batupu, nudi mu kudidimba mikyenu.

²³ Bwalo ndo muntu mwoso udi mwombwi a diyi yi kumoni mukixi, udi luna muntu amatebela mpala anci mu diba ;

²⁴ bwalo bwamaditebelayi mikyenci, yi amancuka, yi amakwelwa mangwoso butonga bwa muntu budiyi.

²⁵ Mo you amatebela mu mulangu ou ămakuka, ou ă bwana bwa bula, yi amaxina yinau, yi kiena mwombwi amakwelwa bwilwa, kate mukixi amakisa mudimo, muntu you unalwangwasanibwa ku kukisa kwanci.

²⁶ Aka muntu mwo so udi yi mpala a muna kixingilu, mo kasoximba ludimi lwanci kate amadimba mucima ănci, kixingilu kia muntu you kidi kanana.

²⁷ Kixingilu kia babala kitena mbindu ku mpala a Ncembi Tetecu kidi noku ; kuxexela bana ba xiyi yi bakaxi ba bafu mu buxitu bwabo, yi kudinama mikyenci ku loboko kutena kantobo.