TITO 2 - Disambi Dipyadipya

¹ KANINGA tôya owe malo amalelekyela yi kweyesa kwa loko ;

² ene, babalumi badi binunu bakali bena mulangu, bena buxitu, bena bweso ; bena loko ku bwalo bwa kwetabusa, bwa nyinga, bwa bwika.

³ Babakaxi badi binunu bakali mo nako yi mwosambu ămalelekyela yi babafa, kumoni bena mietangu, kumoni bena nkolwa ya malufu, beyexi ba bwalo budi bunengela ;

⁴ bixekwekyelesabo babakaxi batena binunu banangi babayabo, yi banangi bana babo ;

⁵ bakali bena bweso, yi mwosambu ă susu, badi yi mulukutu ă mudimo ă ncibo, banengela, bedeya edeya babayabo yi diedya, bitaxetangolebwa diyi dia Ncembi.

⁶ Mapulwa kabidi, ubabondibondi bakali bena bweso.

⁷ Ku bintu bioso udiebesi mikyebe kielekyexelu kia makisa anengela ; ku kweyesa kwebe, kumoni musalu, mo buxitu,

⁸ mutôyelu ă loko, utasolubukwa kubelebwa ; bixefwayi bundu udi ku bunga bwalo, bwalo butenayi yi kintu kioso kibi kutôya ku bwalo bwecu.

⁹ Basadi badipwesi mikyeabo kudi bafumu babo, bakali yi nonu mu bintu bioso ; kumoni bena mpeto ;

¹⁰ kumoni bena misaka ; kate badi mu kwebesa kibaku kioso kinengela bixebongesabo kweyesa kwa Ncembi Mupandixi ecu mu bintu bioso.

¹¹ Bwalo bwamamoneka lwoxixi lwa Ncembi ; ludi mu kucwala kupandixibwa kwa môyo kudi bantu boso ;

¹² ludi mu kutweyesa tunyanani bwalo bwoso butena yi mwosambu ă Ncembi, yi xindilu ya loboko, yi twakali yi bweso, yi nkwami, yi mwosambu ă Ncembi mu mwociya ou ă nkyekyu ;

¹³ tudi mu kudingidila mudingidilu ou ă kiango, yi kimonekyelu kia Ncembi ecu munene yi Mupandixi Yisu Kalistu ;

¹⁴ akadilongola ku micwe yecu, bixetupikulayi ku kwona kwoso, yi bixeditekyelayi bantu yi babala bakali bantu banci mikyenci, badi yi mulukutu ă kulukutila makisa anengela.

¹⁵ Tôya malo aa, yi bondabonda, yi kama makamu, yi bumanya bwoso. Muntu mwoso kiutamuni.