NGALATIA 5 - Disambi Dipyadipya

¹ BWALO bwa bwana bwa bula ndo bwamatupaula Kalistu ; mbwôso nwemani bô, kanubambibwi kabidi yi dibambu dia bupika.

² Mona, meme Paulu nwatôyela ene, ndo nonu nwamakwelebwa bwadi, Kalistu kananutetowesa pô.

³ Yi ngwatôbôlela muntu mwoso elebwa bwadi ene, udi muna mbata ndo kukisa bwadi buncimancima.

⁴ Nwamalengolebwa bwalo bwa Kalistu, nonu bamasuwixibwa ku bwadi ; nwamasaluka bwalo bwa lwoxixi.

⁵ Bwalo ku kwetabusa ndo kutwakunga mudingidilu ă nkwami kudi Mwoxixi.

⁶ Bwalo butasoakala bwadi bwalo munda mwa Kalistu ndo mwontonto ; kate kwetabusa kwamakwencafiana yi nyinga kudi bwalo.

⁷ Nonu nwakakwenda loko ; ñani amanukanda binutaxekwedeya sôsôlwo ?

⁸ Kwetabuxixibwa kwa noku kakusolwa kudi you amanubikila.

⁹ Kiolubixilu kibende kiamakwolubisa kimona kincimancima kia dimpa.

¹⁰ Ndi yi kwetabusa kwa Fumu ku bwalo bwenu, ene, kanunakala yi lunga lukanyi ; mo you unwanyingisa unakala yi lopelo lwanci ; ndo nani ndo ñani.

¹¹ Kaninga meme bakunyi, ndo nkiambila dia bwadi, kukai namakolomonebwa pôi nkyekyu ? mbwôso kiponexelu kia nkulusu kiamancudibwa.

¹² Nxenanga ku bwalo bwabo bamanutepesa ene, badixaki mikyeabo.

¹³ Bwalo bunwakabikidibwa nonu bakunyi ku bwana bwa bula ; mo kanwakadi yi bwana bwenu bwa bula ndo kukixisa munyu ; kate nusadilafiani yi nyinga.

¹⁴ Bwalo bwamakukixibwa bungi bwa bwadi mu diyi dimodimwe ; kadedi ; ene, Unananga muna kwebe bea mikyebe.

¹⁵ Mo ndo nwasumafiana yi nudedyafiana, nudingili ximbi nuxencimisañana.

¹⁶ Mo ngwatôya ene, Nwendi kudi Mwoxixi, yi kanunafikisa nyinga ya munyu pô.

¹⁷ Bwalo bwatanda munyu yi Mwoxixi ku nyinga yau, yi Mwoxixi ndo atanda yi munyu ; mbwôso bubidi bwabo badi bimpakampaka, binutaxekwenca bintu bebi binwamakyeba kwenca.

¹⁸ Mo ndo nwamaxiyibwa kudi Mwoxixi, kanuna muxi mwa bwadi.

¹⁹ Makisa lolo a munyu ndo amoneka ku mpala ; adi diendela, lobindu, luxindilu,

²⁰ kixingilu kia ngixi, disombo, nkyetekyete, bitumba, miekunyo, bisusu, mbata, bixe bixe,

²¹ mietumbu, nkolwa ya malufu, masa, yi bintu bia noku ; binwadimusa meme, bea binakanudimusa buxi ene, bobo bencenca bintu bia noku kabanakita bufumu bwa Ncembi mwokito.

²² Mo dimoma dia Mwoxixi didi nyinga, kiango, polo, kicwandundu, bonkangi, kunengela, kibaku kia malo,

²³ diedya, mulangu ku mucima ; ku bwalo bwa malo a noku bwadi kabunako.

²⁴ Yi bobo badi bena Kalistu Yisu bamakopeka munyu ku nkulusu, yi masama au yi nyinga yau.

²⁵ Coco ndo twakala yi môyo kudi Mwoxixi, twendi kabidi kudi Mwoxixi.

²⁶ Katwakadi bena disasa, ndo kukokolafiana ndo kwombwelafiana mwokunyo kumoni.