NGALATIA 3 - Disambi Dipyadipya

¹ BENA Ngalatia batasokwela nkanyi, ñani akanulowa, bakakwebexebwa Yisu Kalistu ku meso enu, muxipibwi ku nkulusu ?

² Ngwakyeba mo kwombwa kunudi ; Nonu nwakangata Mwoxixi ku makisa a bwadi, sungu ku kwombwa kwa kwetabusa ?

³ Nonu nwasaka nkanyi nako ? Binwamabanga mu Mwoxixi, nutanasudeyebwa mu munyu ?

⁴ Nonu nwakatata matata mangi noku kanana ? ndo kwakadi kanana sôsôlwo kabidi ?

⁵ Mbwôso you amanulongola Mwoxixi yi amakisa kisa makisa a ngulu kunudi, kudi lolo ku makisa a bwadi kwakisayi noku ? sungu ku kwombwa kwa kwetabusa ?

⁶ Bea biakakwetabusa Abalami Ncembi, yi kwakamubadidibwa nkwami.

⁷ Mbwôso nulubukwi ene, bobo bakala bena kwetabusa, ka baba badi bana ba Abalami.

⁸ Yi mukanda ă Ncembi ăkalubukwa buxi ene, Ncembi uxesuwisa bena mabila ku kwetabusa, ăkakwambila Abalami losangu lunengela buxi ; ene, Munda mwebe munalwangwasanibwa mabila moso.

⁹ Mbwôso bobo badi bena kwetabusa bamalwangwasanibwa yi mwetabuxi Abalami.

¹⁰ Bwalo bantu boso badi bena makisa a bwadi badi muxi mwa difingu ; bwalo bwakafundibwa ene, Muntu mwoso afingibwi utasoxina mu bintu bioso biamafundibwa mu mukanda ă bwadi ndo kubikisa.

¹¹ Mo ku bwalo bwa bwadi, kumoni muntu umoumwe kusuwixibwa yinabu ku meso a Ncembi kwamonebwa mangwoso ; ene, Muna nkwami unakala yi môyo ku kwetabusa.

¹² Mo bwadi kabuna muna kwetabusa ; kate ene, Mukisañani a bintu bebi unakala yi môyo kudibio.

¹³ Kalistu akatupikula bwalo bwa difingu dia bwadi, bwalo bwakafingibwayi difingu ku micwe yecu ; bwalo bwakafundibwa ene, Muntu mwoso afingibwi difingu amakopekyebwa ku muci ;

¹⁴ bixefika kulwangwasanibwa kwa Abalami mu Kalistu Yisu kudi mabila ; bituxeangata kilaka kia Mwoxixi ku kwetabusa.

¹⁵ Bakunyi, ngwatôya yi mutôyelu ă muntu ; isanga ku bwalo bwa disambi dia muntu, kaninga panakala diamasubixibwa, kakuna muntu unadilengola, ndo muntu unabodeya manga malo munda kumoni.

¹⁶ Mo kudi Abalami pdo kwakaxiyidibwa bilaka yi kudi mwananci. Kasotôya ene, Kudi bana, luna kutôya dia bantu bangi ; kate kudi umoumwe ene, Kudi mwanebe ; you lolo ndo Kalistu.

¹⁷ Mbwôso ngwatôya ene, Bwalo bwa disambi diakasubixibwa kudi Ncembi, bwadi bwakalwa kunyuma lwedi lwa mbula nkama inai yi mbula masangi asatu kabusodilengola, ndo kuteka kilaka kanana.

¹⁸ Ndo mwokito udi bwalo bwa bwadi, kausoakala bwalo bwa kilaka nyô ; mo Ncembi akaupela Abalami ku kilaka.

¹⁹ Ape bwadi lolo kukai ? Bwakabodeyebwa ku mucwe ă mabi pôi kikondo kixelwa mwana akixiyidibwa kilaka, bwamalungikibwa kudi bangele, ku kianca kia musambodi.

²⁰ Mo musambodi kiena bwalo bwa muntu umoumwe ; mo Ncembi udi umoumwe.

²¹ Bwadi lolo bwamatanda yi bilaka bia Ncembi ? Ai, kumoni. Ximbi bwadi bwamapebwa bubili kupañana môyo, nako nkwami kabidi yixeakala kudi bwadi.

²² Kate mukanda ă Ncembi ămabukila bintu bioso muxi mwa bubi, bixepebwa bantu kilaka bamakwetabusa, kilolwa ku kwetabusa kwa Yisu Kalistu.

²³ Mo buxi butaluli kwetabusa, coco twakanamibwa kudi bwadi, twamancibikibwa munda, tudi mu kudingidila kwetabusa kuxekwebexebwa kunyuma.

²⁴ Mbwôso bwadi bwakadi mubungudi ecu pôi Kalistu, bituxesuwixibwa ku kwetabusa.

²⁵ Mo, biamalwa kwetabusa, coco katuna kabidi muxi mwa mubungudi.

²⁶ Bwalo bunudi bana ba Ncembi ku mucwe ă kwetabusa, bungi bwenu, munda mwa Kalistu Yisu.

²⁷ Bwalo nonu bamanumeyebwa bwalo bwa Kalistu bamalata Kalistu.

²⁸ Koku kakuna muna Yuda ndo muna Ngiliki ; koku kakuna mupika ndo mwana a bula ; koku kakuna mwamulumi yi mwamukaxi ; bwalô bunudi bungi bwenu umoumwe mu Kalistu Yisu.

²⁹ Kaninga ndo nudi bena Kalistu, nudi lolo bana ba Abalami, bena mwokito bea biamatôya kilaka.