MATEYO 9 - Disambi Dipyadipya

¹ YI akakondela mu kibusu, akasabuka, yi akalwa ku bula bwanci.

² Yi mona, bakacwala kudiyi muna mbôyaponde, uxembamini pa bolelo ; yi Yisu, pakamonayi kwetabusa kwabo, akatôyela muna mbôyaponde ene, Kolesa mucima, mwana ; mabi ebe adi malekyela.

³ Yi mona, banga bena mikanda bakaditôyela ene, You muntu atangola Ncembi.

⁴ Yisu lolo akalubukwa nkanyi yabo akatôya ene, Kukai nonu nwakanyakanya malo mabi mu micima yenu ?

⁵ Kinani kiamadika lungwoso ; ndo kutôya ene, Mabi ebe adi malekyela ; sungu ene, Bika, enda ?

⁶ Kaninga, binuxelubukwa dia Mwana a Muntu ene, udi yi bumanya paxi bwa kulekyela mabi (akatôyela lolo muna mbôyaponde), ene, Bika, ongula bolelo bwebe, yaka ku ncibo ebe.

⁷ Yi akabika, yi akaya ku ncibo anci.

⁸ Mo pakamona bimbukuma bakadi yi bowa, yi bakatumbisa Ncembi akapa bantu bumanya bwa noku.

⁹ Yi Yisu, pakadikayi koku, akamona mwamulumi uxikamini mu ncibo a milambu, dina dienci ene, Mateyo, yi akamwambila ene, Unguiandudili. Yi akakwemana, akamulandudila.

¹⁰ Yi pakadi amaxikama ku mesa mu ncibo, mona basangi ba milambu bangi yi boni bakalwa xikama ku mesa yi Yisu yi beyi banci.

¹¹ Pakamona baFalixi bakatôyela beyi banci, ene, Kukai Mweyexi enu udedya yi basangi ba milambu yi boni ?

¹² Kaninga pakakwombwayi, yei ene, Bobo badi yi mpinyu kabasokwabila ñanga ; kate bobo badi yi kusama.

¹³ Mo nuyi eya kikoma kieki, ene, Ngwakyeba mwengo, kumoni dilongi ; bwalo buntasolwa kulwa bikila bena nkwami, kate boni.

¹⁴ Kunyuma beyi ba Yoano bakalwa kudiyi ene, Kukai coco bamancila bidya mancila mangi, yi baFalixi, mo beyi bebe kabasoncila ?

¹⁵ Yi Yisu akabambila ene, Bana ba ncibo a dibakwa babili kudila pakala mwangaci a dibakwa ukidi yinabo ? Mo matuku analwa anabancudibwa mwangaci a dibakwa ; kunyuma lolo kunancilabo.

¹⁶ Kaninga muntu kasobaka kibakilu kia mbuxa mupyamupya ku kilamba kinyanyuki, bwalo bunancuka kibakilu ku kilamba, yi ditundu dinadika bunene.

¹⁷ Bantu kabidi kabasoteka finyo mupyamupya mu bixeba bia kalikali, ximbi bixeba bixetondoka, yi finyo unacakana, yi bixeba binafwa ; kate bantu bateka finyo mupyamupya mu bixeba bipyabipya, yi bintu biamabumbibwa bubidi bwabio.

¹⁸ Pakadi utanabambila bintu bebi, mona, fumu munga akalwa muxingila ene, Mwanami a babakaxi utani pa kufwa mo nkyekyu ; kate belwa baka kianca kiebe kulu kwanci, unapanda.

¹⁹ Yi Yisu akabika, yi akamulabela yi beyi banci.

²⁰ Yi mona, mwamukaxi akadi yi kusama kutanancuka ncuka maxi, kwa mbula disangi yi ibidi, akalwa kunyuma kwanci yi akabaka mwombangi ă kifunda kienci kianca ;

²¹ bwalo bwakaditôyelayi munda mwanci, ene, Ndo nakubaka isa kifunda kienci kianca nakupanda.

²² Mo Yisu akakulumuka, yi pakamumonayi, akatôya ene, Kolesa mucima, mwana ; kwetabusa kwebe kwapukupandisa. Yi mwamukaxi akapanda pa ola you.

²³ Pakafika Yisu ku ncibo a fumu, akamona bena mixembi yi bantu batanateka mulaku,

²⁴ yi akatôya ene, Nubatuki, bwalo butena muxika mufu, kate amalala tulu. Yi bakamukyeca.

²⁵ Kaninga pakabatuxibwa bantu, yei akabwela, yi akakwata kianca kienci ; yi muxika akabika.

²⁶ Yi mwoximo aku akacakana ku bungi bwa mbata you.

²⁷ Pakadika Yisu koku, bafofo babidi bakamulanda, badi mu kudila ene, Utwombwelapo mwengo, Mwana a Dafidi.

²⁸ Pakafikayi lolo ku ncibo, bafofo bakalwa kudiyi. Yi Yisu akabatôyela ene, Nonu nwapwetabusa ene, meme mbili kukisa noku ? Bakamwambila ene, E Fumu.

²⁹ Yei lolo akabaka meso abo bianca ene, Lwedi lwa kwetabusa kwenu lunukixidibwi.

³⁰ Yi meso abo akadipudibwa ; yi Yisu akabalanga ene, Nuncili ndo kulubukisa muntu.

³¹ Kaninga bakabatuka, yi bakakumbula kumbula dina dienci mu mbata you, bungi bwanci.

³² Mo pakadi baba batanancuka, mona, bakacwala kudiyi muna kimeme amakwacibwa kudi kidimu kibi.

³³ Yi pakadi kidimu kibi kiamapaudibwa, muna kimeme akatôya. Yi bimbukuma biakakama ene, Nako kakwamonebwa pô mu Isalele.

³⁴ Kaninga baFalixi bakatôya ene, Yei ndo apaula bidimu bibi kudi fumu a bidimu bibi.

³⁵ Yi Yisu akatanga bungi bwa mala yi tunkyenda, udi mu kweyesa eyesa mu bixingidilu biabo, udi mu kwambila ambila losangu lunengela lwa bufumu, udi mu kuncula ncula kusama kwoso yi bubombu bwoso bwa mumbidi.

³⁶ Mo pakamonayi bimbukuma akabasambanina, bwalo bwakapwangwabo ; yi bakakadeyebwa bea luna mikwakwa yitena yi kalama.

³⁷ Akatôyela beyi banci lolo, ene, Masangu amapya adi mangi sôsôlwo, kaninga basadi badi bunya ;

³⁸ mbwôso nuxenguii Fumu a masangu atumi basadi ku masangu anci.