MATEYO 5 - Disambi Dipyadipya

¹ PAKAMONAYI lolo bimbukuma, akabanda pa lupongo, yi pakadi amaxikama, beyi banci bakalwa kudiyi ;

² yi akadipula musuku ănci yi akabeyesa ene,

³ Balwangwasanibwi ndo bakombi ku micima, bwalo budi bufumu bwa diulu bwabo.

⁴ Balwangwasanibwi ndo bobo badila, bwalo bunabondebwabo.

⁵ Balwangwasanibwi ndo bena diedya, bwalo bunakitabo loboko.

⁶ Balwangwasanibwi ndo bobo batani yi ncala yi nyota ya nkwami, bwalo bunakwokutabo.

⁷ Balwangwasanibwi ndo bena mwengo, bwalo bunasambaninibwabo.

⁸ Balwangwasanibwi bobo badi yi babala ku micima, bwalo bunamonabo Ncembi.

⁹ Balwangwasanibwi ndo basungwi, bwalo bunatambibwabo ene, bana ba Ncembi.

¹⁰ Balwanngwasanibwi ndo bobo bamafinibwa ku mucwe ă nkwami ; bwalo budi bufumu bwa diulu bwabo.

¹¹ Balwangwasanibwi nonu, oka bamanutangola yi bamanufina, yi bamanudimbidila bwalo bwoso bubi butena sôsôlwo ku mucwe ămene.

¹² Nuxekyeleli yi nwakali yi kiango kingi, bwalo budi sayi yenu minene mu diulu ; bwalo bwakafinabo badimuxi nako bakadi ku buxi bwenu.

¹³ Nonu nudi mukyeli ă loboko ; kaningă mukyeli ndo ămasaluka, unacudibwa yi kai ? Kausolelekyela kunyuma yi mudimo mwoso, kaninga unakwelebwa mutu yi unanyacibwa kudi bantu, muxi mwa makasa.

¹⁴ Nonu nudi obo a loboko ; bula bwatekabo kulu kwa lupongo kabubiyi kusokokyebwa.

¹⁵ Bantu lolo kabasonamika mwinda ndo kuuteka muxi mwa dikumbu, kate kulu kwa muci ă mwinda, yi unatekyela bantu boso obo badi mu ncibo.

¹⁶ Obo enu akali mo nako ku meso a bantu, bixemonabo makisa enu anengela, bixetumbisabo Tetenu utani mu diulu.

¹⁷ Kanukixi ene, meme napulwa kulwa xipa bwadi ndo meyi a badimuxi ; kiluli kuxipa pô, kate kufikisa.

¹⁸ Bwalo bunwatôyela sôsôlwo ene, Pôi dituku dinancuka diulu yi loboko, kapanadika kantobo kamokamwe pô ndo kaxidi kamokamwe ka bwadi, pôi kikondo kinafikixibwa bintu bioso.

¹⁹ Mbwôso muntu mwoso unaxipa mulangu umoumwe ă milangu yei mibende yi unakweyesa bantu noku unatambibwa mubende mu bufumu bwa diulu ; kaninga muntu mwoso unakwenca, yi unakweyesa milangu yei, unatambibwa munene mu bufumu bwa diulu.

²⁰ Bwalo bunwatôyela ene, kutena nkwami yenu yamadika nkwami ya bafundi ba mikanda yi baFalixi, kanunabwela mu bufumu bwa diulu pô.

²¹ Nwamakwombwa mwakakwai mbidibwa bena kalikali ene, Kuxipi ; Mo muntu mwoso axipa unalelekyela yi lopelo.

²² Meme pako nwatôyela ene, muntu mwoso alemowela muna kwanci kanana unalelekyela yi lopelo ; mo muntu mwoso unatôyela muna kwanci, ene, Laka (diyi dia lupolo), unakala yi bwalo kudi kikokye kia babakulu ; kaninga muntu mwoso unatôya ene, Mubolu, unalelekyela yi dilundu dia mudilu.

²³ Aka lolo owe walonga dilongi diebe ku kilongolelu, yi welela muna kwebe lukanyi koku utani yinebe bwalo,

²⁴ xiya dilongi diebe koku ku buxi bwa kilongolelu, yaka ya bondanani yi muna kwebe buxi, kunyuma pako unalwa longa dilongi diebe.

²⁵ Bondañana yi muntu mangwoso udi yinebe bwalo, pakala ukidi yinanci mu ncila, ximbi muna bwalo yinebe uxekulongola kudi musambodi a malo, yi musambodi uxekulongola kudi munami a misungi, yi owe uxekwelebwa mu ncibo a lukanu.

²⁶ Nkwatôyela sôsôlwo ene, kunabatuka momu pô binakala wamafuta mpalata nya.

²⁷ Nwamakwombwa mwakakwambidibwa ene, Kwendedi mukaxiabene.

²⁸ Kaninga meme nwatôyela, ene, muntu mwoso elela mwamukaxi meso ndo kumukyeba ku bwefi, amamwendela isanga nkyekyu mu mucima ănci.

²⁹ Aka lolo diso diebe dia kidyo dikwakumisa ndebwe, udipokoli, udiecikisi kudi ; bwalo budi yinebe loko ndo kiebe kicini kimokimwe kinafwa, kumoni mumbidi ěbe muncimancima kwelebwa ku dilundu.

³⁰ Aka lolo kianca kiebe kia kidyo kikwakumisa ndebwe, ukikali, ukiecikisi kudi ; bwalo budi yinebe loko ndo kiebe kicini kimokimwe kinafwa, kumoni mumbidi ebe muncimancima kwelebwa ku dilundu.

³¹ Kwakakwambidibwa kabidi ene, Muntu mwoso unancula mukasanci, amupi mukanda ă dibakwa diamafwa.

³² Kaninga meme nwatôyela ene, muntu mwoso ancula mukasanci kutena ku mucwe ă budibi, amamuteka kidibi ; yi muntu mwoso unangata you muncudibwi dibakwa udi yi budibi.

³³ Nwamakwombwa kabidi mwakakwambidibwa bena kalikali ene, Kudimbi pa kuteya ; encela Fumu biteyi biaputeya.

³⁴ Kaninga meme nwatôyela ene, Kanuteyi kiteyi pô ; kumoni kia diulu, bwalo budidio lukwasa lwa Ncembi ;

³⁵ kumoni kia loboko, bwalo budilu katanda ka makasa anci ; kumoni kia Yelusaleme, bwalo budibu bula bwa Fumu munene.

³⁶ Kuteyi kabidi kiteyi kia mucwe ěbe, bwalo butabiyi kukulumuna lunyonyi lumolumwe ndo ku susu ndo ku tululu.

³⁷ Kaninga diyi dienu diakali ene, ya, ya ; kanana, kanana ; diyi dioso diamadika dedi noku didi dia you a bubi.

³⁸ Nwamakwombwa mwakakwambidibwa ene, Diso ku diso, yi dinu ku dinu.

³⁹ Kaninga meme nwatôyela ene, kanutandi yi bubi kitumba ; kate muntu mwoso ukwakuma lupi ku ditama dia kidyo umukulumunini dinga kabidi ;

⁴⁰ you lolo akyeba kuya yinebe ku bwalo, kuya ncula mucwala ebe, umuxiyili kifunda kiebe kabidi.

⁴¹ Muntu mwoso unakubamba dibambu dia kuya yinanci kilometa kimokimwe, yaka yinanci bibidi.

⁴² You ukwalomba kintu, umupi ; you akyeba kukusombwa kintu, kumwedi nyuma.

⁴³ Nwamakwombwa mwakakwambidibwa ene, unananga muna kwebe, unanyañana you atanda yinebe.

⁴⁴ Kaninga meme nwatôyela ene, Nubanangi batanda yinenu, nubalwangwasani banwafinga, nubenceli kunengela banwanyañana, nubalombeli banwatangola, banwakolomona,

⁴⁵ binuxeakala bana ba Tetenu utani mu diulu ; bwalo bwabandisayi diba dienci kulu kwa bantu babi yi banengela, yi atuma mbula kudi bena nkwami yi bena kwona.

⁴⁶ Nonu ndo nwamananga bantu banwananga, nudi yi sayi kai ? Basangi ba milambu ka bencenca noku ?

⁴⁷ Aka lolo nwelela bena kwenu môyo batupu nwamadika banga bantu beci ? Basenci kabidi ka bakisa nako ?

⁴⁸ Mbwôso nonu nwakali bwokokya bea bidi Tetenu bwokokya udi mu diulu.