MATEYO 3 - Disambi Dipyadipya

¹ KU matuku yia kwakalwa Yoano Munumeyi akakwambila mu mbata a kisobe a Yudiya,

² ene, Nudibeli bwalo butani bufumu bwa diulu pepe.

³ You ndo muntu akatambibwa kudi mudimuxi Esaya ene, Diyi dia muntu adila mu mbata a kisobe ene, nulungiki ncila a Fumu ; nuxembeyi bidikilu bienci swi.

⁴ Yi Yoano mikyenci akadi yi kilamba kienci kia nyonyi ya xamo, yi mwoi kaba ă dikoba ku makondu anci, yi bidya bienci biakadi minkumbi yi buki bwa mutu.

⁵ Bena Yelusaleme lolo bakamubatukila, yi bungi bwa Yudiya, yi bungi bwa mbata udi pepe yi Yôdana,

⁶ yi bakanumeyebwa kudiyi mu Yôdana, badi mu kusakola mabi abo.

⁷ Kaninga pakamonayi baFalixi bangi yi baSaduki batanalwa ku kunumeya kwanci, akabatôyela ene, Bana ba nyoka, ñani apunudimusa nucini bisusu bilolwa ?

⁸ Nukami lolo mamona alelekyela yi kudibela.

⁹ Yi kanwenci ndo kuditôyela munda ene, Coco tudi yi Abalami tetecu, bwalo bunwatôyela ene, Ncembi ubili kubixila Abalami bana kudi mabwe aa.

¹⁰ Nkyekyu lolo soka amatekyebwa ku dicina dia mici ; mbwôso muci mwoso utasokama mamona anengela ka ăxindibwa, ka ělebwa mu mudilu.

¹¹ Meme nwanumeya mu mai sôsôlwo ku kudibela, mo yei ulolwa kunyuma kwamene amangudika ngulu, untasolelekyela yi kucwala sabato yenci ; yei unanunumeya yi Mwoxixi a babala yi mudilu ;

¹² kipumbuxilu kienci kidi ku kianca kienci, yi unakupulula kixengelu kienci dyendeli paxi ; unasanga muxekye ănci mu kibumbilu ; mo unakwosa mangu mu mudilu utasoncimibwa.

¹³ Ku kikondo kieki kwakalwa Yisu mu Ngalili ku Yôdana kudi Yoano, kulwa numeyebwa kudiyi ;

¹⁴ mo Yoano akadi uxemukanda ene, Meme nxenumeyebwa kudi ; owe lolo ulolwa kundi ?

¹⁵ Mo Yisu akamupingasa ene, Ubelekyela nako ; kudi bwalo bwecu nako kufikisa nkwami mioso. Yi akamwetabusa.

¹⁶ Yisu lolo, pakanumeyebwayi, akancuka mangwoso mu mai, yi mona, diulu diakamudipukila yi akamona Mwoxixi a Ncembi udi mu kupweka bea kimbenga, umwakwatamina ;

¹⁷ yi mona, diyi mu diulu ene, You udi Mwanami munangibwi ; kudiyi ndo kunapuxekyelela.