MATEYO 28 - Disambi Dipyadipya

¹ KU butuku lolo bwa sabado, biakalanda kuncuka diba dia Lumingu, kwakalwa Mali a Mangadala yi munga Mali kulwa tebela lukita.

² Yi mona, kwakadi kutepa kunene kwa loboko, bwalo bwakapweka mwangele a Fumu mu diulu, akalwa bungulusa dibwe, yi akaxikama kulu kwadio.

³ Mpala anci akadi luna kapenya, yi kilamba kienci susu bea bukula bwa mbula.

⁴ Yi ku bwalo bwa bowa bwanci kwakalukuta banami yi bakatulowa bea luna bafu.

⁵ Yi mwangele akakulumuna yi akakwambila babakaxi ene, Kanucini nonu, bwalo bungwalubukwa ene, nwapalala Yisu akaxipibwa ku nkulusu.

⁶ Kiena ndo kunu, bwalo bwamabixibwayi mwakatôyayi. Nu lwi mona kidi kiakalala Fumu.

⁷ Yi nuyi mangwoso kuya ambila beyi banci ene, amabixibwa kudi bafu ; yi mona, uyeya ku buxi bwenu kuya ku Ngalili kununamumona. Numoni, meme namanwambila.

⁸ Yi bakabatuka mangwoso ku lukita yi bixesa yi kiango kingi, yi bakaya mbilu kuya cwadila beyi banci diyi.

⁹ Yi, mona, Yisu akapomana yinabo ene, Môyo ! Yi bakalwa mukwata ku makasa yi bakamuxingila.

¹⁰ Yisu lolo akabambila ene, Kanucini ; nuyi ambila bakunyi bamene, ene, bayi ku Ngalili ; koku ndo kunangumonabo.

¹¹ Yi pakakwendabo, mona banga banami bakaya munda mwa bula, yi bakakwambila makanda manene bintu bioso biakapona.

¹² Yi pakasangilabo yi babakulu yi bakadi bamakwelañana nkanyi, bakapa masalai sayi minene ya mpalata

¹³ ene, Nutôyi ene, beyi banci bakalwa ku butuku yi bakamweba pakadi coco twamalala tulu.

¹⁴ Yi ndo bwalo bunalwa ku macu a fumu, coco tunamwetabuxisa, yi tunanuncudila nonu bwalo bwoso.

¹⁵ Yi bakangata mpalata yi bakakwenca mwakakweyexebwabo. Yi losangu lolu lwamadikanana kudi bena Yuda pôi dituku dedi.

¹⁶ Kaninga beyi disangi yi umoumwe bakaya ku Ngalili ku lupongo lwakabambila Yisu.

¹⁷ Yi pakamumonabo bakamuxingila ; mo bamo bakaxitaxita.

¹⁸ Yi Yisu akalwa kudibo, yi akabambila ene, Bumanya bwoso bwamangupebwa mu diulu yi pa loboko.

¹⁹ Mbwôso nuyi eyesa beyi kudi mabila moso, nubanumeyi ku dina dia Tete, yi dia Mwana, yi dia Mwoxixi a babala ;

²⁰ nunabeyesa banami bintu bioso binamanwambila. Yi numoni, meme ngwakala yinenu matuku moso, pôi ku sula kwa mwociya.