MATEYO 26 - Disambi Dipyadipya

¹ YI pakadi Yisu amamana mambi moso aa, akakwambila beyi banci ene,

² Nwalubukwa ene, kunyuma kwa matuku abidi kunakala Kidikixilu, yi Mwana a Muntu unakwengebwa ndo kukopekyebwa ku nkulusu.

³ Ku kikondo kieki kwakakokama makanda manene yi babakulu ba bantu ku lumbu lwa bokanda bunene bwakabikilabo ene, Kayafa,

⁴ yi bakakwelañana nkanyi bixekwatabo Yisu yi bwanya ndo kumuxipa.

⁵ Mo bakatôya ene, Kumoni ku kitula ximbi baxeteka muyengi kudi bantu.

⁶ Kaninga pakadi Yisu utani ku Betani ku ncibo a Ximono muna sudi,

⁷ pakalwa mwamukaxi kudiyi, udi yi mulondo ă alabasta, ă manyi a ncobo a diso dikola, yi akapangulula kulu kwa mucwe ănci pakaxikamayi ku mesa.

⁸ Mo pakamona beyi, bakanyungula ene, Kukai kwecikisa kwa noku ?

⁹ Bwalo buxekwodixibwao ku diso, ndo kupebwa bakombi.

¹⁰ Mo Yisu akalubukwa akabambila ene, Kukai nwamanyingisa mwamukaxi, bwalo bwamangukixilayi dikisa dinengela.

¹¹ Bwalo bunwakala yi bakombi yinenu matuku moso, kaninga kanusoakala yinami mikyemi matuku moso.

¹² Papupangululayi manyi aa ku mumbidi ămene, amakwenca nako bwalo bwa kincikilu kiamene.

¹³ Nwatôyela sôsôlwo ene, Kwoso kunakwambidibwa losangu lolu lunengela ku bungi bwa loboko, kunatôyebwa kabidi mwapwenca mwamukaxi you, kimonenu ku bwalo bwanci.

¹⁴ Yi muntu lolo a disangi yi babidi, akabikidibwa ene, Yudaxi a Ixikalioto, akaya kudi makanda manene

¹⁵ yi akatôya ene, Nonu nwamananga kumpa kai, yi meme nakunulongolayi ? Yi bakamwelekyexela mpalata masangi asatu.

¹⁶ Yi pôi kikondo kieki pakapalalayi kipoma kinengela kia kumulongola.

¹⁷ Ku dituku lolo dia buxi dia mampa atena kiolubixilu, kwakalwa beyi kudi Yisu ene, Kupai kwakyeba tukulungikili kwa kudya Kidikixilu ?

¹⁸ Yi akatôya ene, Nuyi munda mwa bula kudi you noku, numwambili ene, Mweyexi ene, Kikondo kiamene kitani pepe ; ngwanama Kidikixilu ku kidi kiebe yi beyi bamene.

¹⁹ Yi beyi bakakisa mwakabatôyela Yisu, yi bakalungika Kidikixilu.

²⁰ Yi pakakwela butuku, yei akaxikama ku mesa yi disangi yi babidi.

²¹ Yi pakadyabo, yei akatôya ene, Nwatôyela sôsôlwo ene, muntu umoumwe udi yinenu unangwenga.

²² Yi bakadi yi buxitu bungi, yi bakabanga kumwapangusa, muntu mikyenci muntu mikyenci, ene, Meme, Fumu ?

²³ Kaninga yei akapingasa ene, You asopa kianca kienci yinami mu dilonga, kayou unangwenga.

²⁴ Mwana a Muntu uyeya sôsôlwo byekyene biakamufundidibwa ; kaninga mpeya kudi muntu you unakwengebwa Mwana a Muntu kudiyi ; kunengela ndo muntu you kaxelelebwa pô.

²⁵ Yi Yudaxi, akamwenga, akakulumuna ene, Meme, Labi ? Akamwambila ene, Waputôya.

²⁶ Pakadi batanadya, Yisu akangata dimpa, akalombela, akadinyowa ; akapa beyi banci, yi akatôya ene, Nwangati, nudi ; dedi ndo mumbidi ămene.

²⁷ Yi akangata mpamba, akaxinga, yi akabapa ene, Nunwi bungi bwenu.

²⁸ Bwalo budiyi maxi amene a disambi dipyadipya, mancudibu ku micwe ya bantu bangi ku kulekyelebwa kwa mabi.

²⁹ Kaninga meme nwambila ene, kinanwa mamoma aa a finyo kabidi pô, pôi nkyekyu pôi dituku dedi dinanwa yinenu mapyamapya ku bufumu bwa Tetemi.

³⁰ Yi pakadi bamakwembikisa musambu bakabatuka kuya ku lupongo lwa Olife.

³¹ Yisu lolo akabambila ene, Nonu nu-a-bwoso nunaponexebwa ku bwalo bwamene butuku bobu. Bwalo bwamafundibwa ene, Nakukuma kalama, yi mikwakwa ya kibumbu yinacakanixibwa ;

³² mo panakala namabixibwa, nakunulwangwala kuya ku Ngalili.

³³ Yi Pita akamupingasa ene, Isa ndo bantu boso banaponexebwa ku bwalo bwebe, meme kinaponexebwa pô.

³⁴ Yisu akamwambila ene, Nkwatôyela sôsôlwo, ene, ku butuku bobu, buxi butakwela ntala diyi, kunangunyañana owe manyañana asatu.

³⁵ Pita akamwambila, ene, Isanga nxefwa yinebe kinakunyañana pô. Mo nako kwakatôya bungi bwa beyi kabidi.

³⁶ Yi Yisu akalwa yinabo ku kidi kiabikidibwa ene, Ngetesemane, yi akakwambila beyi ene, Nuxikami kunu binakuya lomba yikwa.

³⁷ Yi akacwala yinanci Pita yi bana ba Sebede babidi, yi akabanga kwombwa kusama ku mucima yi buxitu bungi.

³⁸ Yi akabambila lolo ene, Mucima ămene udi yi kusama kungi isanga kwa lufu ; nusali kunu, nutebelanani yinami.

³⁹ Yi akaya ku buxi kubende, yi akapona ku mpala anci, akalomba ene, Tetemi, aka ubili kukisa noku, ungudikixili mpamba you ; kaninga kumoni mwamene munapunanga, katemwebe mwapunanga.

⁴⁰ Yi akalwa kudi beyi, yi akabasañana mu tulu, yi akakwambila Pita ene, Nako, kanusoponyañana yi kutebela yinami ola umoumwe ?

⁴¹ Nutebeli yi nulombi, binutaxebwela mu kielekyexelu ; kidimu kidi loko sôsôlwo, kaninga munyu udi kulebela.

⁴² Yi akaya kabidi diamubidi, yi akalomba ene, Tetemi, aka you kasongudika kutena namamunwa, nyinga yebe yikixibwi.

⁴³ Yi akalwa basañana kabidi mu tulu, bwalo bwakadi meso abo maxitu.

⁴⁴ Yi akabaxiya, akaya lomba kabidi diamusatu, yi akatôya, kabidi meyi aku aa.

⁴⁵ Kunyuma akalwa kudi beyi yi akabambila ene, Nulali tulu nkyekyu, nwomowi kwomowa kwenu ; numoni ola amakokyela pepe, yi Mwana a Muntu amakwengebwa ku makaci a boni.

⁴⁶ Nwombuluki, cuyi ; mona you amangwenga amakokyela pepe.

⁴⁷ Yi pakadi ukiatôya, mona, Yudaxi a disangi yi babidi, akalwa yi kibumbu kinene yinanci yi miele yi mici, bamalwa kudi makanda mănene yi babakulu ba bantu.

⁴⁸ Yei lolo, akamwenga akabapa kilayixilu, ene, You unamunyita, kayou ; numukwati.

⁴⁹ Yi akalwa mangwoso kudi Yisu ene, Môyo, Labi ; yi akamunyita nyita.

⁵⁰ Kaninga Yisu akamwambila ene, Kimbila, ku bwalo kai owe wapulwa ? Yi bakalwa papo yi bakabaka Yisu makaci abo yi bakamubamba.

⁵¹ Yi mona, muntu abo a bantu bakadi yi Yisu, akalonga kianca yi akasomona mwele ănci, akakuma musadi a bokanda bunene, akaxaka dicu dienci.

⁵² Yisu akamwambila lolo ene, Pingasa mwele ěbe mu kidi kienci ; bwalo bunafwa ku mwele bantu boso bangata mwele.

⁵³ Owe wencenca ene, Kibiyi kwabila Tetemi nykekyu, unangutumina bangele bamadika nkone disangi yi ibidi ?

⁵⁴ Ape lolo mikanda ya Ncembi yixefikixibwa beci, yamatôya ene, kuxeakala noku ?

⁵⁵ Ku ola you kwakatôyela Yisu bibumbu bia bantu ene, Nonu nwa malwa bea kulwa tanda yi mwefi yi miele yi mici ndo kungukwata ? Nakaxikama mu tempelo ku dituku ku dituku ndi mu kweyesa eyesa, yi nwakadi kanusongukwata.

⁵⁶ Kaninga bintu bioso bebi biakalwa bixefikixibwa mikanda ya badimuxi. Yi beyi boso bakamukadeya papo yi bakacina.

⁵⁷ Bobo pako bakabamba Yisu bakamucwala kudi Kayafa bokanda bunene, kwakakokama bafundi ba mikanda yi babakulu.

⁵⁸ Yi Pita akamulabela kulekule, pôi ku ncibo a bokanda bunene, yi akabwela momu, akaxikama yi tupalai ndo kumona ku sula.

⁵⁹ Yi makanda manene yi babakulu yi kikokye bungi bwakio bakapalala ntôbô ya kudimbidila Yisu bixemuxipabo.

⁶⁰ Yi kabasañana noku, isanga badimbididi bangi bakalwa ku mpala.

⁶¹ Kaninga kunyuma kwakalwa badimbididi babidi bakatôya ene, You ene, Meme mbili kuxipa tempelo a Ncembi, yi kumwabaka kabidi ku matuku asatu.

⁶² Yi bokanda bunene bwakakwemana bwakamwambila ene, Kusopingasa diyi ? Kinani kieki kikwatôbôlelabo ?

⁶³ Mo Yisu akapudikila. Yi bokanda bunene bwakamukulumuna ene, Nkwapangukila ku dina dia Ncembi a môyo ene, utwambili ndo owe udi Kalistu, Mwana a Ncembi ?

⁶⁴ Yisu akamwambila ene, Waputôya. Kaninga nwatôyela ene, Kunyuma nunamona Mwana a Muntu amaxikama ku kidyo kia bumanya, ulolwa pa mabaxi a diulu.

⁶⁵ Bokanda bunene bwakasambula lolo bilamba bienci ene, Amatuka Ncembi, tupalali bamo batôbôdi kukai ? numoni, nkyekyu nwamakwombwa lupolo.

⁶⁶ Nonu nwencenca beci ? Yi bakapingasa ene, Udi yi lopelo lwa kufwa.

⁶⁷ Yi bakakwela mati ku mpala anci yi bakamukuma bimbondu, yi banga bakamukuma mapi

⁶⁸ ene, Utudimusi owe Kalistu, ñani you amakukuma ?

⁶⁹ Kaninga Pita akaxikama kunci mu lumbu, yi muxika akalwa kudiyi ene, Owe kabidi wakadi yi Yisu a Ngalili.

⁷⁰ Mo yei akanyañana ku mpala ya bantu boso ene, Kisolubukwa mwatôya.

⁷¹ Yi pakayayi ku kibwelelu, munga akamumona yi akakwambila bantu koku ene, You muntu kabidi akadi yi Yisu a Nasalete.

⁷² Yi akanyañana kabidi yi kiteyi, ene, Kisolubukwa muntu you.

⁷³ Yi kunyuma kwa kakondo kabende, bobo bakakwemana koku bakalwa tôyela Pita ene, Owe ndo muna kwabo sôsôlwo, bwalo bwamakwebesa lubendo lwebe noku.

⁷⁴ Yi akabanga kufinga yi kutenda ene, Kibiyi you muntu. Yi ntala akakwela diyi mangwoso.

⁷⁵ Yi Pita akakwela diyi lukanyi diakatôya Yisu ene, Buxi butakwela ntala diyi, owe unangunyañana manyañana asatu. Yi akabatuka kunci, yi akadila kungi.