MATEYO 22 - Disambi Dipyadipya

¹ YI Yisu akakulumuna yi akabambila miele kabidi ene,

² Bufumu bwa diulu bwamafwañanana yi luna fumu akalungikila mwananci kitula k a dibakwa,

³ yi akatuma basadi banci kuya bikila bantu bamaswadibwa ku kitula, yi bakanyañana kulwa.

⁴ Yi akatuma banga basadi kabidi ene, Nutôyeii bantu bamaswadibwa ene, Numoni, namalungika bidya biamene ; nombi yamene, yi nyama yamene minene yamaxipibwa, yi bintu bioso biamapya ; nulwi ku kitula kia dibakwa.

⁵ Kaninga bakakixeka, yi bakaya, you ku kibidi kienci, you ku kisalu kienci.

⁶ Yi banga bakabamba basadi banci, bakabakolomona yi bakabaxipa.

⁷ Yi fumu akadi yi bisusu, yi akatuma masalai anci, akaxipa bondi baba yi akakwosa bula bwabo.

⁸ Yi akatôyela lolo basadi banci, ene, Kitula kia dibakwa kiamapya, kaninga bobo bakaswadibwa bakadi kabasolelekyela ;

⁹ mbwôso nuyi ku meso a ncila, yi bantu boso banunasañana, nubaswali ku kitula kia dibakwa.

¹⁰ Yi basadi baba bakaya mu ncila, yi bakakokyeya boso bakasañanabo yi babi yi banengela ; yi kitula kiakakukibwa bantu.

¹¹ Yi pakabwela fumu, kulwa mona bena kitula, akamona muntu momu utalacili kifunda kia kitula.

¹² Yi akamwambila ene, Kimbila, wamabwela momu beci ? kutena wamalata kifunda kia kitula. Kaninga yei akapudikila nya.

¹³ Fumu lolo akatôyela basadi ene, Numusuki makasa yi makaci, numutenyeki ku mwedima ă kunci ; koku kunakala bidilu yi kukuya kwa meno.

¹⁴ Bwalo bwamabikidibwa bangi, mo babende bamasungudibwa.

¹⁵ Ku kikondo kieki kwakaya baFalixi nkuku bixemuponesabo ku kutôya kwanci.

¹⁶ Yi bakatuma beyi babo kudiyi yi bena Elodo ene, Mweyexi, twalubukwa ene, owe udi sôsôlwo, weyesa eyesa mwosambu ă Ncembi sôsôlwo, kusocina muntu umoumwe, bwalo butasoxixima mumbidi ă muntu ;

¹⁷ mbwôso utwambilipo mwakanyakanya ; Kwalelekyela yi bwadi ndo kulambula Kyesa mulambu, ndo kumoni ?

¹⁸ Mo Yisu akalubukwa bubi bwabo, akatôya ene, Kukai nwamangwelekyesa, bena mancanga ?

¹⁹ Nungwebesi mpalata a mulambu. Yi bakamulonga denalio.

²⁰ Akabambila ene, Kieki kifwanisa ndo kia ñani ? yi meyi mafunda kulu ?

²¹ Bakamwambila ene, Kia Kyesa. Akabambila lolo ene, Mbwôso nulambuli Kyesa milambu ya Kyesa ; yi nulambuli Ncembi milambu ya Ncembi.

²² Yi pakakwombwabo, bakakama, yi bakamuxiya, yi bakancuka.

²³ Ku dituku dedi kwakalwa baSaduki kudiyi, batôya ene, kubixibwa kwa bafu kakunako ; yi bakamwapangusa

²⁴ ene, Mweyexi, Mosese akatôya ene, ndo muntu amafwa utena yi bana, mwakunyenci unangata mukasanci dibakwa, yi unangacila mukulwanci bana.

²⁵ Kwecu lolo kwakadi bana ba mama sambwali ; yi mwamukulu akangata dibakwa akafwa, yi bwalo bwakadiyi kasoakala yi bana, akaxiyila mwakunyenci mukasanci.

²⁶ Mo nako kabidi you amubidi yi amusatu, pôi you a sambwali.

²⁷ Yi kunyuma kwabo bungi bwabo kwakafwa mwamukaxi kabidi.

²⁸ Mbwôso ku kubixibwa kwa bafu yei unakala mukaxi a ñani a sambwali, bwalo bwakamwangata bungi bwabo ?

²⁹ Mo Yisu akabapingasa ene, Nwonona, bwalo bunutasolubukwa ndo mukanda ă Ncembi ndo ngulu ya Ncembi.

³⁰ Bwalo butasobakananabo mabakwa ku kubixibwa kwa bafu ; yi kabasopebwa mabakwa, kate bakala bea bangele mu diulu.

³¹ Mo ku bwalo bwa kubixibwa kwa bafu, nonu kanwabala mwakanutôyelebwa kudi Ncembi, ene,

³² Meme ndi Ncembi a Abalami, yi Ncembi a Isaka, yi Ncembi a Yakobo ? Ncembi kiena Ncembi a bafu, kate a bena môyo.

³³ Yi pakakwombwa bimbukuma bakakamina kweyesa kwanci.

³⁴ Kaninga baFalixi, pakakwombwabo ene, amabulamisa baSaduki, bakasangilañana.

³⁵ Yi umoumwe, musakodi a bwadi, akakwapangusa ndo kumwelekyesa, ene,

³⁶ Mweyexi, mulangu kai ămadika munene ă bwadi ?

³⁷ Yi akamwambila ene, Unananga Yeoba Ncembi ebe yi mucima ě be muncimancima, yi kidimo kiebe kincimancima, yi lukanyi lwebe luncimancima.

³⁸ Ou ndo mulangu munene ă buxi.

³⁹ Amubidi lolo ulexi ene, Unananga muna kwebe bea mikyebe.

⁴⁰ Ku milangu ibidi yei noku kwamalembelela bwadi buncima bwabu, yi meyi a badimuxi.

⁴¹ Yi pakadi baFalixi bamasangila, Yisu akabapangusa

⁴² ene, Nonu nwencenca beci dia Kalistu ? Udi mwana a nani ? Bakamwambila ene, A Dafidi.

⁴³ Yei akabatôyela ene, Ape kukai Dafidi umwabikila Fumu ku kidimu kienci ene,

⁴⁴ Yeoba akatôyela Fumwami ene, Xikama pa kidyo kiamene binakupwesa bantu muxi mwa makasa ebe bamatanda yinebe ?

⁴⁵ Mbwôso ndo Dafidi umwabikila Fumu, udi mwananci beci ?

⁴⁶ Yi kakwakadi muntu ubili kumupingasa diyi, yi pôi dituku dedi kapakadi muntu a kumwapangusa binga bintu nyô.