MATEYO 21 - Disambi Dipyadipya

¹ PAKAKOKYELABO pepe yi Yelusaleme, bakafika ku Betefange ku lupongo lwa Olife, yi Yisu akatuma beyi babidi,

² ene, Nuyi mu bula budi ku mpala enu, nunasañana mpundu mangwoso musuka, yi mwananci yinanci ; nubasuli, nubacwali kundi.

³ Yi ndo muntu mwoso unwatôyela kintu, nunatôya ene, Fumu ubakyeba, yi unabatuma mangwoso.

⁴ Mo bwalo bwakadi noku bixefikixibwa diyi diakatôyebwa kudi mudimuxi ene,

⁵ Nutôyeli mwana a Siono a babakaxi ene, Mona fumwebe ulolwa kudi, ulebela, amaxikama kulu kwa mpundu, yi kwa mwana a mpundu.

⁶ Yi beyi bakaya yi bakakwenca mwakabatôyela Yisu,

⁷ bakacwala mpundu yi mwana, yi bakakwadisa bifunda biabo kulu kwabo ; yei lolo akaxikama kulu kwabo.

⁸ Mo kimbukuma kinene kiakakwelelela bifunda biabo pa ncila, yi banga bakakala kala mabunca a mici yi bakakwadisa adisa pa ncila.

⁹ Yi bimbukuma biakamulwangwala, yi biakamulanda biakakwamena ene, Osana kudi Mwana a Dafidi ; you atumbixibwi ulolwa ku dina dia Fumu ; Osana mu kidi kiadika kulu.

¹⁰ Yi pakabwelayi mu Yelusaleme, bungi bwa bena bula bakatepa ene, Nani you ?

¹¹ Yi bimbukuma biakatôya ene, You ndo Yisu, mudimuxi a ku Nasalete mu Ngalili.

¹² Yi Yisu akabwela mu tempelo a Ncembi, yi akatenyeka bantu boso bakakwodisa yi bakakwola mu tempelo, yi akatudeya mesa ya basumbanyi ba mpalata, yi nkwasa yabo bakakwodisa bimbenga.

¹³ Yi akabambila ene, Kwamafundibwa ene, Ncibo amene unatambibwa ncibo a kulomba momu, kaninga nonu nwamamukulumuna ku kisokomenu kia befi.

¹⁴ Yi bafofo yi bena bitumbi bakalwa kudiyi mu tempelo, yi akabapandisa.

¹⁵ Yi makanda manene yi bafundi ba mikanda pakamonabo bikamakama biakakwencayi, yi bana badi mu kutôya mu tempelo, ene, Osana ku Mwana a Dafidi, bakanyungula,

¹⁶ yi bakamwambila ene, Owe wombombwa mwatôyabo ? Yi Yisu akabambila ene, Ya ; nonu kanwabala pô ene, Ku musuku ă babaki yi ă bana ba kiedi ndo kwamakwameyebwa kwembikisa ?

¹⁷ Yi akabaxiya, yi akancuka mu bula kuya ku Betani ; yi akadikisa butuku koku.

¹⁸ Mo ku butwatuku, biakapifianayi munda mwa bula, kwakakwombwayi ncala.

¹⁹ Yi pakamonayi kikuyi kia maxika mu ncila, akalwa kudikio, akakisañana kanana, mo malwa matupu. Yi akakitôyela, ene, Mamoma kakulundidi kabidi pô. Yi kikuyi kiakakwoma mangwoso.

²⁰ Pakamona beyi bakakama, ene, Kikuyi kiamakwoma mo nkyekyu.

²¹ Yi Yisu akabapingasa ene, Nwatôyela sôsôlwo ene, Nonu ndo nwakala yi kwetabusa, yi kanusoxitaxita, kanunakwenca mwamakwencebwa ku kikuyi mutupu, kate ndo nuxetôyela isanga lupongo lolu, ene, Ncudibwa, elebwa mu mai, kunafika nako.

²² Yi bintu bioso binwalomba pa kulomba, ndo nunakwetabusa, nunangata.

²³ Yi pakalwayi mu tempelo, pakalwa makanda manene yi babakulu ba bantu kudiyi pakakweyesayi, ene, Wencenca bintu bebi ku bumanya bwa beci ? Yi ñani akakupa bumanya bobu ?

²⁴ Yi Yisu akabapingasa ene, Meme kabidi nakunwapangusa diyi dimodimwe, yi nonu ndo nunangwambila, meme kabidi nakunwambila pa bumanya bungwencenca bintu bebi yinabu.

²⁵ Kunumeya kwa Yoano, kwakadi kwa beci ? ndo kwa diulu ndo kwa bantu ? Yi bakakwelesañana mbata, ene, Coco ndo tuxetôya ene, Kwa diulu, yei unatutôyela ene, Kukai lolo kanwamwetabuxila ?

²⁶ Kaninga ndo tuxetôya ene, Kwa bantu, twacina kimbukuma, bwalo bwencenca bantu boso ene, Yoano akadi mudimuxi.

²⁷ Yi bakapingasa Yisu ene, Katusolubukwa. Yei kabidi akabambila ene, Meme lolo kisonwambila pa bumanya bungwencenca bintu bebi yinabu.

²⁸ Kaninga nonu nwencenca beci ? Muntu akadi yi bana babidi, yi akalwa kudi mwamukulu ene, Mwana, yaka lelo, ya kisi mu kibidi kiamene kia finyo.

²⁹ Yi yei akapingasa ene, Kinaya ; kaninga kunyuma akakwela lwombixi yi akaya.

³⁰ Yi akalwa kudi you amubidi, yi akatôya mo nako. Yi yei akapingasa ene, Nceya idyanga, yi kayili.

³¹ Nani a babidi baba akakwenca nyinga ya tetenci ? Bobo ene, You a buxi. Yisu akabambila ene, Nwatôyela sôsôlwo ene, Basangi ba milambu yi badibi banwayila buxi mu bufumu bwa Ncembi.

³² Bwalo bwakalwa Yoano kunudi mu ncila a nkwami, yi nonu kanumwetabuxili ; kaninga basangi ba milambu yi badibi bakamwetabusa ; nonu lolo panwakamona, nwakadi kanusokwela lwombixi isanga kunyuma, ndo kumwetabusa.

³³ Nwombwi munga mwele. Muntu akadiko, muna ncibo, akakuna kibidi kia finyo, yi akakidinga lumbu : akakwemba lolo kinyacilu kia finyo, yi akakwabaka bitebelelu, akabanamisakio kudi bena midimo yi akaya ku munga mbata.

³⁴ Kaninga pakafika kikondo kia mamona pepe, pakatumayi basadi banci kudi bena midimo kuya angata mamoma anci.

³⁵ Yi bena midimo bakangata basadi banci, yi bakakuma umoumwe, bakaxipa munga, yi bakakwela munga mabwe.

³⁶ Akatuma banga basadi kabidi bamadika bena buxi bangi, yi bakakwenca yinabo mo nako.

³⁷ Ku sula lolo akabatumina mwananci ene, Bananemeka mwanami.

³⁸ Kaninga bena midimo pakamonabo mwana bakaditôyela munda ene, You ndo muna mwokito ; cuyi, tumuxipi, tunakala yi mwokito ănci.

³⁹ Yi bakamwangata, bakamutenyeka kunci kwa kibidi kia finyo, yi bakamuxipa.

⁴⁰ Mbwôso panalwa fumu a kibidi, unakwenca yi bena midimo baba beci ?

⁴¹ Bakamwambila ene, Unabumisa bantu babi baba nya, yi unabanamisa kibidi kia finyo kudi banga bena midimo, banamulongola mamoma ku bikondo biao.

⁴² Yisu akabambila ene, Nonu kanwabala ku mukanda ă Ncembi ene, Dibwe diakanyaôana babaki ba ncibo,, kadedi diamalwa dibwe dia ku ilungabasodi ; dedi ndo bwalo bwa Fumu, yi ditani kikamakama ku meso ecu.

⁴³ Mbwôso nwatôyela ene, Bufumu bwa Ncembi bunanuncudibwa, yi bunapebwa bubila bunalongola mamoma abu.

⁴⁴ Yi you unapona pa dibwe dedi unanyowebwa ; kaninga muntu mwoso unaponadio kulu kwanci, dinamukuya bukula.

⁴⁵ Yi makanda manene yi baFalixi, pakakwombwabo miele yenci, bakamulembetela amatôya ku bwalo bwabo.

⁴⁶ Yi pakapalalabo kumukwata bakacina bimbukuma bwalo bwakamwencabo ene, udi mudimuxi.