MATEYO 19 - Disambi Dipyadipya

¹ PAKADI Yisu amamana meyi aa, akancuka mu Ngalili yi akalwa ku mbata ya Yudiya dixia dia Yôdana,

² yi bimbukuma binene biakamulanda ; yei lolo akabapandisa masama koku.

³ Yi baFalixi bakaiwa mwelekyesa ene, Kwamălelekyela yi bwadi ndo muntu unancula mukasanci ku bwalo bwoso ?

⁴ Mo akabapingasa, ene, Nonu kanwabala ene, you akabapanga ku bubangabanga akabapanga mwamulumi yi mwamukaxi,

⁵ yi akatôya ene, Ku mucwe ou kunaxiya muntu tetenci yi mamanci, yi unasambikibwa yi mukasanci ; yi babidi baba banakala munyu umoumwe ;

⁶ bitasoakalabo babidi nyô, kate munyu umoumwe. Mbwôso bintu biamasambika Ncembi, muntu kabinamuni.

⁷ Bakamwambila ene, Kukai lolo Mosese akalanga dia kupa mukanda ă dibakwa difu, yi kumuncula ?

⁸ Akabambila ene, Bwalo bwa kukola kwenu ku micima, ndo bwakanuncudisa Mosese bakaxi benu ; kaninga pôi bubangabanga kapakadi noku.

⁹ Kaninga nwatôyela, ene, muntu mwoso unancula mukasanci kutena ku mucwe ă diendela, yi unangata munga dibakwa, udi muna budibi ; yi you umwabaka amancudibwa dibakwa udi muna budibi.

¹⁰ Beyi banci bakamwambila ene, Ndo bwalo budi noku bwa muntu yi mukasanci, kakuna loko kwangata dibakwa.

¹¹ Kaninga akabambila ene, Bantu boso kababiyi kwangata diyi dedi, kate bobo bamapebwadio ;

¹² bwalo budiko banciki bamalelebwa noku pôi difu dia mamabo ; banga badi banciki bamatekyebwa banciki kudi bantu ; yi banga banciki badiko bamaditeka mikyeabo banciki ku mucwe ă bufumu bwa diulu. You ubili kwangata, angati.

¹³ Ku kikondo kieki kwakacwadibwa kudiyi bana babende, bixebakayi bianca bienci kulu kwabo, yi bixebalombelayi ; mo beyi bakabakama.

¹⁴ Kaninga Yisu ene, Nulekyeli bana babende, balwi kundi, kanubanyanani ; bwalo budi bufumu bwa diulu bwa baba noku.

¹⁵ Yi pakadi amabaka bianca bienci kulu kwabo, akancuka koku.

¹⁶ Yi mona, muntu akalwa kudiyi ene, Mweyexi, nakwenca kintu kai kinengela binxeakala yi môyo ă kô kô ?

¹⁷ Yi akamwambila ene, Kukai ungwapangusa meme dia kunengela ? Umoumwe udi kunengela. Kaninga ndo wakyeba kubwela mu môyo, nama milangu ya bwadi,

¹⁸ Akamwambila ene, Milangu beci ? Yisu ene, Kuxipi, kwendedi mukaxi abene, kwebi, kudimbididi muntu,

¹⁹ nemeka tetebe yi mabebe, yi nanga muna kwebe bea mikyebe.

²⁰ Dipulwa diakamwambila ene, Namanama bintu bebi bioso ; nkiasaka yi kai ?

²¹ Yisu akamwambila ene, Owe ndo wakyeba kukuka dyendeli, yaka ya odisi bintu bioso bitani yinebe, paka lolo bakombi, yi unakala yi bima munda mwa diulu ; lwaka lolo lwa ngulandudili.

²² Kaninga pakakwombwa dipulwa diyi, akancuka yi buxitu, bwalo bwakadiyi yi bima bingi.

²³ Yi Yisu akakwambila beyi banci ene, Nwatôyela sôsôlwo ene, Mwodidi kubwela mu bufumu bwa diulu kudi kukola ;

²⁴ yi nwatôyela kabidi ene, Mwodidi kubwela mu bufumu bwa Ncembi kwamadika xamo kukola kubwela mu diso dia ndongo.

²⁵ Yi pakakwombwa beyi bakakama kukama kungi, ene, Ape, nani unapandixibwa ?

²⁶ Mo Yisu akabatebela, yi akabambila ene, Bwalo bwa bantu, nako kwamapila ; kaninga bwalo bwa Ncembi, bintu bioso biamalubukibwa kwencebwa.

²⁷ Kunyuma Pita akapingasa yi akamwambila ene, Mona, coco twamaxiya bintu bioso, yi twamakulandudila ; mbwôso tunakala yi kiñani ?

²⁸ Yi Yisu akabambila ene, Nwatôyela sôsôlwo, ene, Nonu nwamangulandudila, ku kibangilu kipyakipya kinaxikama Mwana a Muntu ku lukwasa lwanci lwa dikai, nonu kabidi nunaxikama ku nkwasa disangi yi ibidi, nunasambola sambola maiungu disangi yi abidi a Isaiele.

²⁹ Yi muntu mwoso ndo amaxiya ncibo, ndo bana ba mama, ndo bangasana, ndo tete, ndo mama, ndo mukaxi, ndo bana, ndo bibidi, ku mucwe ă dina diamene, unangata nkama nkama, yi unakita mwokito ă môyo ă kô kô.

³⁰ Kaninga bantu bangi bena buxi banakala ku nyuma, yi bena nyuma ku buxi.