MATEYO 17 - Disambi Dipyadipya

¹ YI kunyuma kwa matuku asambomo Yisu akangata yinanci Pita yi Yakobo yi Yoano mwakunyenci, yi akabacwala kulu kwa lupongo mikyeabo batupu.

² Yi akatulolebwa ku meso abo. Mpala anci lolo akasusuka luna diba, yi bilamba bienci biakapiluka susu bea obo ;

³ yi mona, Mosese yi Eliya bakamoneka kudibo, batanakwambilafiana yinanci.

⁴ Yi Pita akakulumuna, akakwambila Yisu ene, Fumu, kudi kunengela ndo kwakala kunu. Ndo wananga, nakukisa kunu bitanda bisatu ; kimo kiebe, kimo kia Mosese, kimo lolo kia Eliya.

⁵ Pakadi ukiatôya, mona dibaxi dia susu obo diakababukila, yi mona. diyi munda mwa dibaxi, ene, You udi Mwanami munangibwi, unapuxekyelela ; numwombweli yei.

⁶ Yi pakakwombwa beyi bakapona ku mpala yabo, yi bakacina kungi.

⁷ Yi Yisu akalwa babaka kianca, yi akatôya ene, Nubiki, kanucini.

⁸ Yi pakasangolabo meso abo bakadi kabasomona muntu ; mo Yisu mutupu.

⁹ Biakapwekabo ku lupongo, Yisu akabatôyela ene, Kanwambidi muntu munwapumona pôi kikondo kinakala Mwana a Muntu amabika kudi bafu.

¹⁰ Yi beyi banci bakamwapangusa ene, Kukai lolo bena mikanda batôya ene, Eliya uxelwa buxi ?

¹¹ Yi yei akabapingasa ene, Eliya ulolwa buxi sôsôlwo, yi unapingasa bintu bioso.

¹² Kaninga nwatôyela ene, Eliya amalwa buxi yi kabamulubukwa, kate bamakwenca yinanci mwoso mwakanangabo. Nako kabidi Mwana a muntu unalwa tata kudibo.

¹³ Beyi lolo bakalembetela ene, amabatôyela dia Yoano Munumeyi.

¹⁴ Yi pakafikabo kudi kimbukuma, pakalwa muntu kudiyi, akakuma binu paxi ku mpala anci ene,

¹⁵ Fumu ombwelapo mwanami mwengo, bwalo budiyi muna mwombi, atata kungi. Bwalo bwapona ponayi mu mudilu mapona mangi, yi munda mwa mai.

¹⁶ Yi nakamucwala kudi beyi bebe, yi bakadi kabasoponya yi kumupandisa.

¹⁷ Yisu akapingasa ene, Mwociya utena kwetabusa, ămaunga unga, nakwakala y nenu kikondo beci ? nakwekyela yinenu kikondo beci ? Numucwali kunu kundi.

¹⁸ Yi Yisu akamulanga, yi kidimu kibi kiakamuncuka, yi mwana akapandixibwa pôi ola you.

¹⁹ Kunyuma beyi bakalwa kudi Yisu ku dituku ene, Kukai coco twakadi katusoponya yi kukipaula ?

²⁰ Akabambila ene, Bwalo bwa kusaka kwenu kwa kwetabusa ; bwalo bunwatôyela sôsôlwo, ene, Nonu ndo nwakala yi kwetabusa kwa luna mutongu ă mutadi, nunatôyela lupongo lolo ene, Tutuka kunu kuya yikwa, lunaditutula ; yi kintu kakinako kinanupidila.

²¹ Kaninga butonga bwa noku kabusobatuka kutena kudi kulomba yi kuncila kwa bidya luncilu.

²² Pakasalabo mu Ngalili Yisu akabambila ene, Mwana a muntu unakwengebwa ku bianca bia bantu,

²³ yi banamuxipa ; yi ku dituku diamusatu kunabixibwayi. Yi bakakwombwa buxitu bungi.

²⁴ Pakalwabo ku Kapenaumu, bobo bakasanga mpalata ya tempelo bakalwa kudi Pita yi bakatôya ene, Mweyexi enu amalambula mpalata ya tempelo  ?

²⁵ Akatôya ene, Sôsôlwo. Pakabwelayi munda mwa ncibo, Yisu akamwambila buxi, ene, Owe wencenca beci, Ximono ? Bafumu ba loboko bangata angata ndo bima ndo mulambu kudi banani ? kudi bana babo mikyeabo, sungu kudi banga bantu ?

²⁶ Pita akamwambila ene, Kudi banga bantu. Yisu akamwambila ene, Mbwôso bana bendenda kanana.

²⁷ Kaninga ximbi tuxebanyungudisa, yaka ku mai, ela lolo dilopo ; angata yixi ulolwa buxi, yi panakala wamadipula musuku ănci unasañana mpalata (luna Ngiliki, “  stater  ”) ; angata you noku, ubapi ku micwe yecu, yi meme yinebe.