MATEYO 13 - Disambi Dipyadipya

¹ KU dituku dedi kwakabatuka Yisu mu ncibo, akaxikama paxi pepe yi diele.

² Yi bimbukuma binene biakamukokamina, biakakondelayi mu kibusu mikyenci, yi akaxikama, yi bungi bwa bimbukuma bakakwemana ku mbongo.

³ Yi akabambila bintu bingi ku miele ene, Numoni, mukuni akaya kuya kuna.

⁴ Pakakunayi, minga mitongu yakapona pa ncila, yi nyonyi yakalwa yidya nya.

⁵ Minga yakapona pa bidi bia mabwe, pakasakayo loboko lungi, yakamena mangwoso, bwalo bwakadiyi kayina yi loboko lungi ; kaninga pakancuka diba, yakanyungula ;

⁶ yi bwalo bwakakwayilayi macina, yakakwoma.

⁷ Minga yakapona ku mieba, yi mieba yakalunda, yakayifina ;

⁸ minga lolo yakapona pa loboko lunengela, yakalelañana masangu, munga nkama, munga masangi asambomo, munga masangi asatu.

⁹ You udi yi macu, aombwi.

¹⁰ Yi beyi bakalwa, bakamwambila ene, Kukai ubatôyela mu miele ?

¹¹ Yi akabapingasa ene, Bwalo bwamanupebwa ndo kulubukwa malo mancibika a bufumu bwa diulu, kaninga kakusobapebwa.

¹² Ku bwalo bwa muntu mwoso apwangata, kunamupebwa, yi unakala yi bintu bongonco ; kaninga you utasoangata, kudiyi kunancudibwa isanga bintu biapwakalayi yinabio.

¹³ Ndo binamabambila ku miele, bwalo butasomonabo isanga badi yi meso ; yi kabasokwombwa yi kabasolubukwa, isanga badi yi macu ;

¹⁴ yi ku bwalo bwabo kwamafika kidimuxilu kia Esaya, kiatôya ene, Pa kwombwa, nunakwombwa yi kanunalubukwa pô ; yi pa kumona, nunamona, yi kanunaxingulula pô ;

¹⁵ bwalo bwamabulunda mucima ă bantu baba, yi macu abo adi maxitu, yi bamancibika meso abo, ximbi baxemona ku meso, yi baxekwombwa ku macu, yi baxelubukwa ku mucima, yi baxekulumuka, yi meme nxebapandisa.

¹⁶ Mo meso enu adi malwangwasana, bwalo bwamonao, yi macu enu bwalo bwombombwao ;

¹⁷ bwalo bunwatôyela sôsôlwo ene, badimuxi bangi yi bena nkwami bamakyeba kumona bintu binwamona, yi kabamoneni, yi bamakyeba kwombwa bintu binwombombwa, yi kabombweli.

¹⁸ Mbwôso nonu nwombwi mwele ă mukuni.

¹⁹ Pombombwa muntu diyi dia bufumu, yi kasolembetela, you a bubi ulolwa kulwa ncula diyi diakakunibwa mu mucima ănci ; you ndo yei akakunibwa ku mwanca ă ncila.

²⁰ Mo you akakunibwa ku bidi bia mabwe,—you ndo yei ombombwa diyi, apudiangata yi kiango mangwoso,

²¹ kaninga kiena yi dicina munda mwanci, kate amamana kakondo katupu ; yi palolwa ndo mpeya ndo kukolomonebwa ku mucwe ă diyi, amanyungula mangwoso.

²² Yei lolo amakunibwa kudi mieba —you ndo yei ombombwa diyi, yi mutete ă mwociya ou, yi lodimbu lwa bima biamafina diyi ; yei lolo kasopya.

²³ Kaninga you amakunibwa ku loboko lunengela—you ndo yei ombombwa diyi, udialembetela, amakama kabidi, amalelañana, munga nkama, munga masangi asambomo, munga masangi asatu.

²⁴ Munga mwele ndo ăkabambilayi, ene, Bufumu bwa diulu bwamafwañanana yi muntu akakuna masangu anengela mu kibidi kienci ;

²⁵ mo pakadi bantu bamalala tulu, pakalwa mutandanani yinanci kulwa kuna bilo (luna Ngiliki, sisanya) munda mwa masangu, yi akancuka.

²⁶ Mo pakadi malwa amamena, amancuka masangu, sisanya lolo yakamoneka kabidi.

²⁷ Yi basadi ba muna ncibo bakalwa mwambila, ene, Mukyelengi, kwakakuna mitongu yinengela mu kibidi kiebe ? ape sisanya yamalwa kupai ?

²⁸ Yi akabambila ene, Muntu atanda yinami ndo amakwenca noku. Yi basadi bakamwambila ene, Wananga lolo tunaya yitula ?

²⁹ Mo yei akatôya ene, Kañana ; ximbi, binwasokola sisanya, nuxekondola masangu yinayo ndongo.

³⁰ Nulekyeli bubidi bwayo yalundanani pôi kikondo kia kubuka, yi ku kikondo kia kubuka, nakwambila babuki ba masangu, ene, Nu, kokyeyi sisanya buxi, nuyisuki bibomba bibomba ndo kuyosa ; kaninga nukokyeyi masangu mu kibumbilu kiamene.

³¹ Munga mwele ndo ăkabambilayi, ene, Bufumu bwa diulu bulexi yi luna mutongu ă mutadi ăkangata muntu, ăkakunayi mu kibidi kienci,

³² ămafwila minga mitongu mioso bunya sôsôlwo ; kaninga panakala ămalunda ămadika bidibwa bioso bunene, ulolwa muci, bilolwa nyonyi ya diulu kulwa xikama ku matamba anci.

³³ Akabambila munga mwele, ene, Bufumu bwa diulu bulexi yi luna kiolubixilu kiakangata mwamukaxi, kiakasokokayi mu ncedi isatu ya bukula biakakwolubila bungi bwabu.

³⁴ Bintu bebi bioso ndo biakakwambila Yisu bimbukuma ku miele, yi kutena mwele kabambidili pô,

³⁵ bixekfiixibwa diyi diakatôyebwa kudi mudimuxi, ene, Nakudipula musuku ămene ku miele ; nakusakola bintu biamasokokyebwa pôi kibangolelu kia loboko.

³⁶ Akaxiya lolo bimbukuma, yi akabwela mu ncibo ; yi beyi banci bakalwa kudiyi ene, Utusakoleli mwele ă sisanya ya kibidi.

³⁷ Yei akabapingasa ene, You akuna mitongu yinengela udi Mwana a Muntu, yi kibidi bidi loboko ;

³⁸ mitongu yinengela lolo idi bana ba bufumu, kaninga sisanya idi bana ba you a bubi ;

³⁹ mutandanani you akayikuna udi diabolo ; yi kibukilu kidi ku sula kwa mwociya ou, yi babuki badi bangele.

⁴⁰ Byekyene biamakokyeyebwa sisanya lolo, yamakwoxebwa mudilu, binakala ku sula kwa mwociya ou.

⁴¹ Mwana a Muntu unatuma bangele banci, yi banasokola biponexelu bioso ku bufumu bwanci, yi bobo bakisa bubi ;

⁴² yi banaela mu dilungu dia mudilu ; momu munakala bidilu yi kukuya kwa meno.

⁴³ Ku kikondo kieki kunamoneka bena nkwami bea munyinya ku bufumu bwa Teteabo. You udi yi macu, aombwi.

⁴⁴ Bufumu bwa diulu kabidi bulexi yi luna ngombo muncika mu mbata, akasañana muntu, akasokokayi ; yi ku kiango kienci kuyeyayi kuya odisa bintu bioso bidi yinanci, ndo kwola mbata you.

⁴⁵ Bufumu bwa diulu kabidi bulexi yi luna muntu, muna maso, apalala palala mabwe a mapiko a lwcxbd ;

⁴⁶ yi pakasañanayi dibwe dimodimwe dia diso dinene, akaya odisa bintu bioso biakadi yinanci, akadiola.

⁴⁷ Bufumu bwa diulu kabidi bulexi yi luna matei akakwelebwa mu mai amadinga ntonga yi ntonga mioso ;

⁴⁸ pakadi amakwolubixibwa, bakaputa ku mbongo, yi bakaxikama ; bakasanga yixi yinengela mu miesokye, kaninga bakakwecikisa mibi.

⁴⁹ Mo nako ku sula kwa mwociya ou ; bangele banabatuka yi banakwatola bena bubi kudi bena nkwami,

⁵⁰ yi banabela mu dilungu dia mudilu ; momu munakala bidilu yi kukuya kwa meno.

⁵¹ Yisu akabambila, ene, nonu nwamalembetela bintu bebi bioso ? Bakamwambila ene, E.

⁵² Yi akabambila, ene, Mbwôso, mufundi mwoso a mikanda amakweyexebwa bufumu bwa diulu ulexi yi luna muntu, muna ncibo, amabatusa mu ngombo anci bintu bipyabipya yi bintu bia kalikali.

⁵³ Pakadi Yisu amamana miele yei akancuka koku.

⁵⁴ Yi pakalwayi mu mbata anci, akabeyesa mu kixingidilu kiabo, biakakamabo, ene, You apwangata bwinu bwa noku yi makisa a noku a ngulu kupai ?

⁵⁵ Ki yei ndo mwana a musongi a mici ? Ki mamanci amabikidibwa ene, Mali, yi bakunyi banci ene, Yakobo, yi Yosefe, yi Ximono, yi Yudaxi ?

⁵⁶ Bangasananci kabidi kabena yinecu bungi bwabo ? Ape you apwangata bintu bebi bioso kupai ?

⁵⁷ Yi bakamunyungudila ku micima. Yi Yisu akabambila ene, Mudimuxi kasosaka kinemu, kutena ku mbata anci, yi mu ncibo anci.

⁵⁸ Yi akadi kakixili makisa mangi a ngulu koku, ku bwalo bwa kunyañana kwabo.