MAKU 9 - Disambi Dipyadipya

¹ YI akabatôyela ene, Nwatôyela sôsôlwo ene, Bwalo bwa banga badiko bamakwemana kunu, kabanakikisa lufu pô binakala bamamona bufumu bwa Ncembi bwamalwa yi ngulu.

² Yi kunyuma kwa matuku asambomo Yisu akangata yinanci Pita yi Yakobo yi Yoano, yi akabacwala Kulu kwa lupongo lulelule mikyeabo batupu. Yi akatulolebwa mumbidi ku meso abo ;

³ bilamba bienci biakapiluka susu obo, bitasolubukwa muxingi mwoso a lupemba kubisusula nako.

⁴ Yi Eliya akamoneka kudibo yi Mosese, yi bakadi mu kwambilañana yi Yisu.

⁵ Yi Pita akapingasa Yisu ene, Labi, kudi kunengela coco kwakala kunu ; tukisi bitanda bisatu, kimo kiebe kimo kia Mosese, kimo lolo kia Eliya.

⁶ Bwalo butalubukwayi mwa kutôya, bwalo bwakakwombwabo bowa bungi.

⁷ Yi dibaxi diakalwa babukila, yi diyi diakalwa munda mwa dibaxi ene, You udi Mwanami munangibwi ; numwombweli yei.

⁸ Yi pakadi bamakwela meso mangwoso, bakadi kabasomona muntu mwoso nyô, utena Yisu mutupu yinabo.

⁹ Biakapwekabo ku lupongo, akabalanga kabambidi muntu mwoso bintu biakamonabo, kutena Mwana a Muntu uxeakala amakwombuluka kudi bafu.

¹⁰ Yi bakabumba diyi dedi, badi mu kwapangusañana bwalo bwa kwombuluka kudi bafu.

¹¹ Yi bakamwapangusa ene, Kukai batôya kudi bafundi ba mikanda ene, Eliya uxelwa buxi ?

¹² Yi akabapingasa ene, Eliya ulolwa buxi sôsôlwo, unapingasa bintu bioso loko. Yi kwamafundibwa dia Mwana a Muntu beci ene, uxetata kungi, yi uxetamunibwa ?

¹³ Kaninga nwatôyela ene, Eliya amalwa, yi bamamwencela mwoso mwakanangabo, bea biamafundibwa ku bwalo bwanci.

¹⁴ Yi pakalwabo kudi beyi banga bakamona kimbukuma kinene kiamabadinga, yi bafundi ba mikanda badi mu kwelesa yinabo mbata.

¹⁵ Yi bungi bwa kimbukuma pakamumonabo bakakama kama mangwoso, yi bakaya kudiyi mbilu yi bakamwela môyo.

¹⁶ Yi akabapangusa ene, Nwelesa yinabo mbata a kai ?

¹⁷ Yi muntu umoumwe a mu kimbukuma akapingasa ene, Mweyexi, napucwala mwanami kudi, udi yi kidimu kia kimeme ;

¹⁸ yi kiamamuntuntula paxi kwoso kwamamukwatakio ; amancula lolo mpulolu yi amabambakanya meno anci, yi ondonda dionda ditupu. Yi nakakwambila yi beyi bebe bakitenyeki, yi bakadi kababiyi.

¹⁹ Kaninga yei akabapingasa ene, Mwociya utena kwetabusa ; nakwakala yinenu pôi kikondo kai ? Nakwekyela yinenu kiekyelo pôi kikondo kai ? Numucwali kundi.

²⁰ Yi bakamucwala kudiyi. Yi pakamumonayi, kidimu kiakamunyenga mangwoso ; yi akapona paxi akadifunda funda, udi mu kuncula mpulolu ku musuku.

²¹ Yi akakwapangusa tetenci ene, Kikondo kidi beci kiapwakala nako yinanci ? Yei ene, Pôi bwabuki bwanci ;

²² yi kiamamwela mela mangi yi mu mudilu yi mu mai ndo kumuxipa ; kate Owe ndo ubili kwenca kintu kioso, utwombwelipo mwengo, utusadisi.

²³ Yi Yisu akamutôyela ene, Ndo ubili! Bintu bioso bibili kwencebwa kudi you aetabusa.

²⁴ Yi tete a mwana you akakwamena mangwoso ene, Namakwetabusa ; ungusadisi bwalo bwa mwoxituxitu ămene.

²⁵ Mo pakamona Yisu kimbukuma kitanasangila mbilu, akakama kidimu kia mbindu ene, Kidimu kia kimeme yi kia bicu, meme nkwatôyela ene, Batuka munda mwanci, kubwedi munda mwanci kabidi nyô.

²⁶ Yi pakadi kiamakwamena diyi yi kiamamunyenga kungi, kiakabatuka ; yi mwana akalwa bea luna muntu mufu, biakatôya bantu bangi ene, Afufwa.

²⁷ Mo Yisu akamukwata ku kianca, akamwombulula, yi akakwemana.

²⁸ Yi pakadi amabwela mu ncibo, beyi banci bakamwapangusa ku busoko ene, Kukai coco twakadi katubiyi kukitenyeka ?

²⁹ Yei akabatôyela ene, Kiekio, butonga bwakio, kakibiyi kubatuka kutena ku kulomba.

³⁰ Yi bakancuka koku yi bakakwenda mu Ngalili ; yi akadi kasonanga muntu mwoso uxelubukwa ;

³¹ bwalo bwakakweyesayi beyi banci yi akabambila ene Mwana a Muntu unalongolebwa ku makaci a bantu, yi banamuxipa ; yi panakala amaxipibwa, kunyuma kwa matuku asatu kunabikayi kabidi.

³² Mo bobo bakadi kabasolubukwa diyi dedi, yi bakacina kumwapangusa.

³³ Bakalwa lolo ku Kapenaumu, yi pakadiyi mu ncibo akabapangusa ene, Nwamakwelesa kinani mbata mu ncila ?

³⁴ Yi bakapudikila, bwalo bwakakwelesañanabo mbata mu ncila, dia ñani adika munene.

³⁵ Yi akaxikama, akabikila disangi yi babidi : akabatôyela ene, Ndo muntu ananga kwakala ku buxi, unakala kunyuma kwa bantu boso, yi musadi a bantu boso.

³⁶ Yi akangata mwana mubende, yi akamuteka pakacikaci pabo ; yi pakadi amamwombulula mu biboko bienci akabatôyela ene,

³⁷ Muntu mwoso unangata mwana umoumwe a noku ku dina diamene, ungwangata meme ; yi muntu mwoso ungwangata kasongwangata meme kate you akangutuma.

³⁸ Yi Yoano akamukulumuna ene, Mweyexi, twakamona muntu udi mu kutenyeka bidimu bibi ku dina diebe, yi twakamukanda bwalo butasotulandudilayi.

³⁹ Mo Yisu ene, Kanumukandi ; bwalo butasoakala muntu umoumwe unakwenca dikisa dia ngulu ku dina diameme, yi unalubukwa mangwoso kungutangola.

⁴⁰ You utasotanda yinecu udi muna bwalo bwecu.

⁴¹ Muntu mwoso unanupa mpamba a mai a kunwa ku dina diamene, bwalo bunutani bena Kalistu, nwatôyela sôsôlwo ene, kanakodya kwangata sayi anci pô.

⁴² Yi muntu mwoso unaponesa mwana umoumwe a babaki baba babende bamangwetabuxila, kwamadika loko ku bwalo bwanci ndo dibwe dinene dixesukibwa ku xingu anci yi uxekwelebwa mu mai.

^43-44 Ndo kianca kiebe kiamakuponesa, ukikali ; kudi loko owe kubwela mu môyo kikomo, kumoni kwakala yi bianca bibidi kuya ku dilundu, mu mudilu utasoncimina nyô.

^45-46 Yi ndo dikasa diebe diamakuponesa, udikali ; kudi loko owe kubwela mu môyo kitumbi, kumoni kwakala yi makasa ebe abidi, kwelebwa mu dilundu.

⁴⁷ Yi ndo diso diebe diamakuponesa, udipokoli ; kudi loko owe kubwela mu bufumu bwa Ncembi kipoko, kumoni kwakala yi meso abidi, kwelebwa mu dilundu dia mudilu.

⁴⁸ kutasofwa mwongenyi ăbo, kutasoncimibwa mudilu.

⁴⁹ Bwalo bunacudibwa muntu mwoso yi mudilu, yi dilongi dioso diosa dinacudibwa yi mukyeli.

⁵⁰ Mukyeli udi loko, mo ndo mukyeli ămasaluka nunaucula yi kai ? Nwakali yi mukyeli munda mwenu mikyenu, yi nwakali polo muntu yi muna kwanci.