MAKU 6 - Disambi Dipyadipya

¹ YI akancuka koku yi akalwa ku mbata anci, yi beyi banci bakamulandudila.

² Yi pakalwa Sabado pakabangayi kweyesa mu kixingidilu, yi bantu bangi bakakwombwa bakakama ene, You amangata bintu bebi kupai ? Yi bwinu bwamamupebwa budi bwa beci ? Yi makisa aa noku a ngulu amakwencebwa ku makaci anci ?

³ Ki yei ndo musongi a mici, mwana a Mali, mukulu a Yakobo yi Yosese yi Yudaxi yi Ximono ? Bangasananci lolo kabena badi yinecu kunu ? Yi bakaponexebwa ku bwalo bwanci.

⁴ Yi Yisu akabatôyela ene, Mudimuxi kasosaka yi lotumbu kutena ku mbata anci yi kudi bilungu bienci, yi ku ncibo anci.

⁵ Yi akadi kabiyi kwenca dikisa dioso dia ngulu koku, kutena amabaka makaci anci kulu kwa bena mabombu babende yi amabapandisa.

⁶ Akakama kama lolo bwalo bwakakwayilabo yi kwetabusa. Yi akacimba mu mala, ku bula ku bula, udi mu kweyesa eyesa bantu.

⁷ Yi akabikila beyi disangi yi babidi kudiyi ; akabanga kubatuma ku babidi ku babidi, yi akabapa bumanya kulu kwa bidimu bia mbindu ;

⁸ yi akabatôyela ene, kabacwadi kintu kioso bwalo bwa lwendo, kitena mulangala mutupu ; kumoni bidya, kumoni mwosokye, kumoni mpalata mu ndengi yabo ;

⁹ mo balati sabato yi kabalaci binkutu bibidi.

¹⁰ Yi akabatôyela ene, Kwoso kununabwela mu ncibo, nusali koku binunancuka ku bula bobu.

¹¹ Yi kidi kioso kinakala kakisonwangata, yi kabasonwombwa, pa kuncuka koku nukupululi yimbwi idi muxi mwa makasa enu ndo kubatôbôlela ntôbô.

¹² Yi bobo bakancuka yi bakakwambila ene, Bantu badibeli.

¹³ Yi bakatenyeka bidimu bibi bingi, yi bakaxinga bena mabombu bangi manyi, yi bakabapandisa.

¹⁴ Yi fumu Elodo akakwombwa, bwalo bwakatumba dina dienci, yi akatôya ene, Yoano Munumeyi amabika kudi bafu, yi ku mucwe ou kwamakisañana makisa aa a ngulu munda mwanci.

¹⁵ Banga pako bakatôya ene, Udi Eliya. Yi banga bakatôya ene, Udi mudimuxi, luna banga badimuxi.

¹⁶ Mo pakakwombwa Elodo, yei akatôya ene, Yoano unakaxaka mucwe ănci, kayou amabika kudi bafu.

¹⁷ Bwalo bwakatuma Elodo mikyenci yi akakwata Yoano, yi akamusuka mu ncibo a nkanu bwalo bwa Elodiasa, mukaxi a Filipi mwakunyenci, bwalo bwakamwangatayi dibakwa.

¹⁸ Yoano lolo akatôyela Elodo ene, Kakusolelekyela yi bwadi owe kwakala yi mukaxi a mwakunyebe.

¹⁹ Yi Elodiasa akamutekyela mwoxingi, yi akakyeba kumuxipa, yi akadi kabiyi,

²⁰ bwalo bwakacina Elodo Yoano, akalubukwa ene, udi muna nkwami yi muna babala, yi akamubumba loko. Yi pakadi amamwombwa akakwenca bintu bingi, yi akamwombwa yi kiango.

²¹ Yi pakalwa dituku dia kipoma, diakakwelabo kulelebwa kwa Elodo lukanyi, yei akalungikila bena bikupu banci kidyaki, yi baKiliaka, yi bantu banene ba ku Ngalili.

²² Yi pakadi mwana a Elodiasa a babakaxi amabwela, akasa masa yi akaxekyelesa Elodo yi bantu bakadi yinanci ku bidya. Yi fumu akatôyela muxika ene, Ungulombi kintu kioso kiananga, yi meme nakukupakio.

²³ Yi akamuteyela kiteyi ene, Kintu kioso kinangulomba nakukupakio, isanga bufumu bwamene pakacikaci.

²⁴ Yi akabatuka, akatôyela mamanci ene, Ndombi kai ? Yei ene, Mucwe ă Yoano Munumeyi.

²⁵ Yi akabwela nkyekyu nkyekyu kudi fumu mangwoso, yi akalomba ene, Ngwananga unampa mangwoso mucwe ă Yoano Munumeyi mu dilonga.

²⁶ Yi fumu akadi yi buxitu bungi, kaninga bwalo bwa kiteyi kienci, yi bwa bantu bakaxikama ku bidya yinanci, akadi kasoli kumunyafiana.

²⁷ Yi fumu akatuma disalai mangwoso dia banami banci, yi akatôya ene, mucwe ănci ucwadibwi. Yei lolo akabatuka yi akaxaka mucwe ănci mu ncibo a nkanu ;

²⁸ yi akacwala mucwe ănci mu dilonga, yi akapa muxika ; yi muxika akapa mamanci.

²⁹ Yi pakakwombwa beyi banci, bakalwa ombulula mumbidi ănci, yi bakauladika mu lukita.

³⁰ Yi batumibwi bakasangila kudi Yisu. Yi bakamwambila bintu bioso, isanga kintu kioso kiakakwencabo, yi kintu kioso kiakakweyesabo.

³¹ Yi akabatôyela ene, Nulwi mikyenu batupu ku kidi kitena bantu, nwomowi kakondo kabende. Bwalo bwakadi bantu bangi mu kulwa yi kuya, yi bakadi kabasomona kikondo isa kia kudya bidya.

³² Yi bakancuka mu kibusu kuya ku kidi kitena bantu, mikyeabo batupu.

³³ Yi bantu bangi bakabamona badi mu kuya, yi bakabalembetela, bakaya mbilu mbilu lwa mukidi ku mala moso, yi bakafika koku buxi bwabo.

³⁴ Yi akasabuka yi akamona kimbukuma kinene kia bantu, yi akabombwela mwengo, bwalo bwakadibo luna mikwakwa yitena yi kalama. Yi akabanga kubeyesa malo mangi.

³⁵ Yi pakaxekaxeka munyinya, pakalwa beyi banci kudiyi yi bakatôya ene, Kidi kieki kakina bantu, yi munyinya ămadika kuxekaxeka ;

³⁶ ubanculi bayi ku mbata yi ku mala adi pepe, badiodili bidya bia kudya.

³⁷ Mo yei akabapingasa ene, Nonu nubapi, badi. Bakamutôyela ene, Tuxeya lolo kuya ola mampa lwedi lwa denalio nkama ibidi, tubapi, badi ?

³⁸ Yei akabatôyela ene, Nudi yi mampa anga ? Nuyi mona. Pakalubukwabo bakatôya ene, Atano, yi yixi ibidi.

³⁹ Yi akabalanga ene, babaxikiki paxi pa maxindi, bibumbu bibumbu.

⁴⁰ Yi bakaxikama ku loici ku loici, bantu nkama nkama, yi bantu masangi atano masangi atano.

⁴¹ Yi akangata mampa atano yi yixi ibidi, yi akatebela lwa diulu ; akaxinga yi akanyowa mampa ; akapa lolo beyi banci ndo kuteka ku mpala yabo. Yi akababanyila bungi bwabo yixi ibidi.

⁴² Yi bakadya bungi bwabo yi bakakwokuta.

⁴³ Yi bakakwongula bicini binyoki biakakuka bibata disangi yi bibidi tô, yi bicini bia yixi kabidi.

⁴⁴ Bobo lolo bakadya mampa bakadi babalumi nkone itano.

⁴⁵ Yi akabamba beyi banci dibambu mangwoso dia kukondela mu kibusu, bayi ku buxi pôi ku Betesaida ku dixia, pakala yei mikyenci udi mu kuncula kimbukuma.

⁴⁶ Yi pakadi amabalayisa, akaya ku lupongo kuya lomba.

⁴⁷ Yi pakakwela butuku, kibusu kiakadi pakacikaci pa mai, yi yei akadi mikyenci ku mbata.

⁴⁸ Yi akabamona batanakamba kamba yi kufuba bwalo bwakapupuya lupepele ku mpala yabo ; yi akalwa kudibo ku kilo kiamunai kia butuku, udi mu kwenda pelu pa mai, yi uxebadika.

⁴⁹ Mo bobo, pakamumonabo udi mu kwenda pelu pa mai, bakakwenca ene, Ud muncengi ; yi bakakwamena,

⁵⁰ bwalo bwakamumonabo bungi bwabo, yi bakatepa ku micima yabo. Mo yei akatôya yinabo mangwoso, akabambila ene, Nukolesi micima ; meme kayou ; kanucini.

⁵¹ Yi akabanda kudibo mu kibusu yi lupepele Iwakalekyela. Yi bakakama kama kukama kungi munda mwabo ;

⁵² bwalo butalembetelabo bwalo bwa mampa aa ; bwalo bwakasubixibwa mucima ăbo.

⁵³ Yi pakadi bamasabuka bakalwa ku mbata a Ngenesalete, yi bakabaka kibusu.

⁵⁴ Yi pakadi bamancuka mu kibusu, bantu bakamulembetela mangwoso ;

⁵⁵ yi bakatanga mbata muncimancima, bakabanga kucwala ku malelo batati boso ba masama, kwoso kwakakwombwabo ene, Yei udiko.

⁵⁶ Yi kwoso kwakabwelayi, ndo mu tula tubende ndo ku mala manene ndo ku mbata, bakaladika bena masama mu mabanca a bisalu, yi bakamulomba ene, babaki isa mwombangi ă kifunda kienci bianca ; yi bungi bwa bantu bakamubaka bianca bakapandixibwa masama.