MAKU 5 - Disambi Dipyadipya

¹ YI bakalwa ku dixia dia mai, ku mbata a baNgadala.

² Yi pakasabukayi mu kibusu, mwamuiumi akapomana yinanci mangwoso amalwa mu kidi kia nkita, amakwacibwa kudi kidimu kia mbindu ;

³ akadi yi kidi kienci mu kidi kia nkita, yi kakwakadi muntu ubili kumusuka nyô, kumoni isanga yi lukanu ;

⁴ bwalo bwakamasukibwayi masuka mangi yi bipiko ku makasa, yi nkanu ; yi nkanu yakatudibwa yi bipiko bia makasa biakatetebwa bicini bicini, yi kakwakadi muntu udi yi ngulu ya kumuncincidisa.

⁵ Yi matuku moso ku butuku yi ku munyinya akadi mu kwamena amena diyi yi mu kuditapa ku mabwe, ku kidi kia nk ta yi ku mpongo.

⁶ Kaninga pakamonayi Yisu kulekule, akaya lubilu yi akamuxingila ;

⁷ yi akakwamena yi diyi dikola ene, Ndi yinebe bwalo kai, Yisu, Mwana a Ncembi a kulu ? Nkwalanga ku dina dia Ncembi, kungutatixi.

⁸ Bwalo bwakamutôyelayi ene, Owe kidimu kia mbindu, batuka mundu mwa muntu you.

⁹ Yi akamwapangusa ene, Dina diebe didi nani ? Yei akapingasa ene, Kibumbu ndo dina diamene, bwalo bututani bungi bungi.

¹⁰ Yi akamulomba kungi bitaxebinculayi kunci kwa mbata you.

¹¹ Koku lolo kwakadi kibumbu kinene kia ngulubi ya mbuxi idi mu kudya ku kipulumukilu kia lupongo ;

¹² yi bidimu biakamulomba ene, Ututumi munda mwa ngulubi ya mbuxi, tubweli munda mwayo.

¹³ Yi Yisu akabetabuxila. Yi bidimu bia mbindu biakabatuka yi biakabwela mu ngulubi ya mbuxi ; yi kibumbu kiakatuka mbilu ku lupongo tule, munda mwa mai, lwedi lwa nkone ibidi, yi yakafwa mu mai.

¹⁴ Yi bobo bakayidisa bakacina yi bakacwala losangu ku bula yi ku mbata. Yi bakaya mona kipoma kiakapona.

¹⁵ Yi bakalwa kudi Yisu, yi bakamona you akakwacibwa yi bidimu bibi amaxikama, amalata kilamba, udi yi lukanyi lwa nkwami, isanga you akadi amakwacibwa kudi kibumbu ; yi bakacina bowa.

¹⁶ Yi bobo bakamona bakabambila mwakaponena you akakwacibwa kudi bidimu bibi, yi bwalo bwa ngulubi ya mbuxi.

¹⁷ Yi bakabanga kumulomba ancuki ku mbata abo.

¹⁸ Yi pakadi utanakondela ku kibusu, you akakwacibwa kudi bidimu bibi akamulomba dia kwakala yinanci.

¹⁹ Yi akadi kasomwetabuxila, kate akamutôyela ene, Yaka ku ncibo ebe kudi bena kwebe, ubambili lolo dia bintu binene biamakwencela Fumu, yi mwakakwombwelayi mwengo.

²⁰ Yi akancuka, yi akabanga kwammbila mu Dekapolo dia bintu binene biakamwencela Yisu ; yi bungi bwabo bakakama kama.

²¹ Yi pakasabuka Yisu kabidi mu kibusu ku dixia, kimbukuma kinene kiakakokama kudiyi ; yi yei akadi pepe yi mai.

²² Yi munga fumu a bafumu ba kixingidilu akalwa kudiyi, dina dienci ene, Yailusu ;

²³ yi pakamumonayi akapona ku makasa anci ; yi akamulomba kungi ene, Mwanami mubende a babakaxi udi pepe yi kufwa ; nkwalomba unalwapo mubaka bianca biebe kulu kwanci apandi ; yi unakala yi môyo.

²⁴ Akaya lolo yinanci, yi kimbukuma kinene kia bantu bakamulanda yi bakamufina.

²⁵ Yi mwamukaxi, akatata kusama kutanancuka ncuka maxi mbula disangi yi ibidi,

²⁶ yi akatata bintu bingi kudi bananga bangi, akadi amamana lolo bintu bioso biakadi yinanci, kutena kuncincila pô, kate kusama kwanci kwakadika kulunda ;

²⁷ pakadi amakwombwa dia Yisu, akalwa mu kimbukuma kia bantu kunyuma kwanci, yi akabaka kifunda kienci kianca.

²⁸ Bwalo bwakatôyayi ene, Ndo nakubaka isa bilamba bienci kianca, nakupandixibwa.

²⁹ Yi mpokolo a maxi anci akakwoma mangwoso, yi akalembetela mu mumbidi ănci ene, amapandixibwa kusama koku kubi.

³⁰ Yi Yisu akalubukwa munda mwanci mangwoso dia ngulu yamancuka kudiyi, akakulumuka mu kimbukuma ene, Ñani apubaka bilamba biamene kianca ?

³¹ Beyi banci bakamwambila ene, Wamona kimbukuma kia bantu bakwafina fina, yi Owe watôya ene, Ñani apungubaka kianca ?

³² Yi akakwela meso ndo kumumona yei akakwenca nako.

³³ Mo mwamukaxi, akacina yi akalukuta lukomba, akalubukwa mwakamuponena, akalwa yi akapona paxi ku mpala anci yi akamusakolela sôsôlwo bundma bwanci.

³⁴ Yei lolo akamwambila ene, Mwana, kwetabusa kwebe kwamakupandisa ; yaka polo, ikala loko ku bwalo bwa kusama kwebe kubi.

³⁵ Pakadi ukiatôya, pakalwa bantu kwa fumu a kixingidilu ene, Mwanebe amafwa ; kukai wanyingisa Mweyexi kabidi ?

³⁶ Mo Yisu akakwombwa diyi diakatôyebwa akakwambila fumu a kixingidilu ene, Kucini, mo etabusa.

³⁷ Yi akadi kasosangisa muntu mwoso yinanci kutena Pita yi Yakobo yi Yoano, Yakobo mwakunyenci.

³⁸ Yi bakalwa ku ncibo a fumu a kixingidilu ; yi akamona muyengi, yi bantu badi mu kuncula masonci yi badi mu kudila kungi.

³⁹ Pakabwelayi, akabatôyela ene, Nwateka muyengi yi nwadila ku bwalo kai ? Mwana kafwili, kate amalala tulu.

⁴⁰ Yi bakamuxeka. Mo yei, pakadi amababatusa bungi bwabo, akangata tete a mwana, yi mamanci, yi bobo bakadi yinanci, yi akabwela munda mwakalala mwana.

⁴¹ Yi pakadi amakwata kianca kia mwana, akamwambila ene, Talita kumi, (pa kusakolebwa ene, Muxika nkwatôyela ene, Bika).

⁴² Yi muxika akabika mangwoso yi akakwenda ; bwalo bwakadiyi muna mbula disangi yi ibidi. Yi bakakama kama mangwoso kukama kungi.

⁴³ Yi akabalanga kungi ene, Muntu kalubukwi bwalo bobu ; yi akatôya ene, bamupi kintu kia kudya.