MAKU 15 - Disambi Dipyadipya

¹ YI ku butwatuku, makanda manene yi babakulu yi bafundi ba mikanda yi kikokye kincimancima bakakwelafiana nkanyi mangwoso ; yi bakasuka Yisu yi bakamuncula yi bakamulongola kudi Pilata.

² Pilata lolo akamwapangusa ene, Owe udi Fumu a bena Yuda ? Akamupingasa ene, E.

³ Yi makanda manene akamusanya malo mangi.

⁴ Yi Pilata akamwapangusa kabidi ene, Kusopingasa diyi ? Ombwa mukwasanyabo malo mangi.

⁵ Mo Yisu akadi kasopingasa diyi pô, biakakama kama Pilata.

⁶ Mo ku kitula akadi yi mwosambu ă kubalekyelela musungi umoumwe, muntu mwoso akalombabo.

⁷ Munga akadiko lolo, dina dienci ene, Balaba, akadi amasukibwa yinabo bakatomboka, yi bantu bakakwonda monda ku kikondo kiakatombokabo.

⁸ Yi kimbukuma kia bantu bakakokyela, yi bakabanga kumulomba ene, akisi bea luna matuku moso.

⁹ Mo Pilata akabapingasa ene, Nwakyeba nulekyeleli Fumu a bena Yuda ?

¹⁰ Bwalo bwakalubukwayi ene, ku bwalo bwa mwokunyo ndo kwakamulongola makanda manene.

¹¹ Mo makanda manene akanyingisa kimbukuma bixetungayi kubalekyelela Balaba.

¹² Pilata lolo akabapingasa kabidi ene, Ape nkisi beci yi you unwabikila ene, Fumu a bena Yuda ?

¹³ Yi bakakwamena kabidi ene, Umukopeki ku nkulusu.

¹⁴ Pilata akabatôyela ene, Kukai ? Apwenca bubi kai ? Mo bakadika kwamena yi ngulu ene, Umukopeki ku nkulusu.

¹⁵ Pilata lolo, akananga kuxekyelesa kimbukuma, akabalekyelela Balaba, yi akalongola Yisu pakadi amamukuma bintu, akopekyebwi ku nkulusu.

¹⁶ Yi masalai akamucwala munda mwa lumbu,—lolu ndo lumbu lwa fumu,—yi bakabikila kibumbu kia masalai kincimancima.

¹⁷ Yi bakamulatisa kifunda kia tululu a bwinu, yi pakadi bamaluka kilongo kia mieba, bakakiapeya kulu kwanci.

¹⁸ Yi bakabanga kumubisa, ene, Bwatetela, Fumu a bena Yuda.

¹⁹ Yi bakakuma mucwe ănci kanonge, yi bakamwela mati, yi pakadi bamamukumina binu paxi, bakamuxingila.

²⁰ Yi pakadi bamamukyeca, bakamuncula kifunda kia tululu a bwinu, yi bakamulatisa bilamba bienci. Yi bakamubatusa kuya mukopeka ku nkulusu.

²¹ Yi bakabamba muntu dibambu udi mu kudika, Ximono, muna Kulene, ayi yinabo, aombululi nkulusu anci. Yei akadi utanalwa ku mbata, akadi Alesanda yi Lufusu teteabo.

²² Bakamucwala lolo ku kidi kiabikidibwa ene, Ngolongota, sakoio anci ene, Kidi kia kibwongwasa.

²³ Yi bakamulonga malufu a finyo maputola yi ncobo a bululu ; mo akadi kasoangata.

²⁴ Yi bakamukopeka ku nkulusu, yi bakakwabanyañana bilamba bienci, badi mu kucwa lubexi bwalo bwa kilamba kixeangata muntu mwoso.

²⁵ Kwakadi lolo ola amusatu, yi bakamukopeka ku nkulusu.

²⁶ Yi mukanda ăkafundibwa kulu ă kusanyibwa kwanci ene, FUMU A BENA YUDA.

^27-28 Yi bakakopeka yinanci befi babidi, umoumwe ku kidyo yi umoumwe ku kimoso.

²⁹ Yi bobo bakadika dika bakamutangola, badi mukunyingisa micwe yabo, badi mu kutôya ene, Ai ! Owe waxipa tempelo, umwabaka mu matuku asatu,

³⁰ udipandisi mikyebe ; pweka ku nkulusu.

³¹ Yi makanda manene kabidi akaxekafiana yi bafundi ba mikanda ene, Akapandisa banga bantu ; kabiyi ndo kudipandisa mi kyenci.

³² Kalistu, Fumu a Isalele, apweki nkyekyu ku nkulusu bituxemona, bituxekwetabusa. Yi bobo bakakopekyebwa yinanci bakamukisa kabidi.

³³ Yi pakalwa ola amusambomo, pakalwa mwedima ku bungi bwa mbata pôi ola dibwa ;

³⁴ yi ku ola dibwa Yisu akakwamena yi diyi dikola ene, Eli, Eli, lama sabakatani ? kulexi yi kutôya ene, Ncembi amene, Ncembi amene, kukai wapungukadeya ?

³⁵ Banga lolo bakakwemana pepe, pakakwombwabo, bakatôya ene, Mona, utanabikila Eliya.

³⁶ Yi munga muntu akaya lubilu, akakwolubisa supunci nnika, akamuteka kulu kwa lukaku, yi akamupa ndo kunwa, ene, Nubekwemana, tumoni ndo Eliya ulolwa kulwa mupwesa.

³⁷ Yisu lolo, pakadi amakwamena diyi dikola, akakica.

³⁸ Yi mbuxa a ngumbu a tempelo akasambudibwa balalala pôi kulu pôi paxi.

³⁹ Yi kapalai ka masalai kakakwemana ku mpala anci, pakamonako amafwa nako, kakatôya ene, Sôsôlwo, you muntu akadi Mwana a Ncembi.

⁴⁰ Babakaxi bakadiko kabidi batanadingila kulekule ; Mali a Mangadala akadi yinabo, yi Mali, Yakobo mubende yi Yosese mamabo, yi Salome ;

⁴¹ bobo, pakadiyi mu Ngalili bakamulandudila yi bakamusadila ; yi banga babakaxi bangi bakalwa yinanci ku Yelusaleme.

⁴² Yi pa bwelu, (bwalo bwakadi dituku dedi kilungikilu, dituku didi buxi bwa Sabado),

⁴³ pakalwa Yosefe a Alimatia, nkolomo a kikupu kinene, akadi mikyenci mu kudingidila bufumu bwa Ncembi, akalwa bwela kudi Pilata yi mucima, yi akalomba mumbidi ă Yisu.

⁴⁴ Pilata lolo akakama kama pa kwombwa ene, amakica isanga nkyekyu ; yi pakadi amabikila kapalai, akamwapangusa ndo amafwa kikondo.

⁴⁵ Yi pakalubukwayi kudi kapalai, akapa Yosefe mumbidi.

⁴⁶ Yi akakwola mbuxa munene a susu, yi pakadi amamupwesa, akamudinga mbuxa munene a susu, yi akamuladika mu lukita lwakadi Iwamakuludibwa mu lubwe, yi akabungulusa dibwe ku mbelo a lukita.

⁴⁷ Mali a Mangadala lolo yi Mali, Yosese mamanci, bakamona kidi kiakaladikibwayi.