MAKU 13 - Disambi Dipyadipya

¹ YI pakadi utanabatuka mu tempelo, munga mweyi anci akamwambila ene, Mweyexi, tebela ; kai mabwe aa kai ncibo yei

² Yi Yisu akamupingasa ene, Wamona ncibo yei minene ? Kunu kakunasala dibwe dimodimwe kulu kwa dinga ditasokwelebwa paxi.

³ Yi pakadi utanaxikama kulu kwa lupongo lwa Olife ku mpala a tempelo bakamwapangusa ku busoko kudi Pita yi Yakobo yi Yoano yi Andelo,

⁴ ene, Utwambilipo, ku kikondo kai kunakala bintu bebi ? Yi kilayixilu kinakala beci kia kikondo kidi bintu bebi bioso pepe yi kufikixibwa ?

⁵ Yi Yisu akapingasa yi akabanga kubambila ene, Nudimuki ximbi muntu mwoso uxenuungisa.

⁶ Bantu bangi banalwa mu dina diamene ene, Meme kayou ; yi banaungisa bantu bangi.

⁷ Mo panunakwombwa dia mbita yi ngindu ya mbita, kanunyingixibwi, bwalo buxelwa bintu bebi, kate ku sula kakuna ku noku.

⁸ Bwalo bunatombokyela bubila bubila, yi bufumu bufumu ; yi ku bidi binga kunakala matepa a loboko, yi nkombo ya ncala yinalwa, yi minyungu ; bintu bebi bidi bubangabanga bwa masama.

⁹ Kaninga nudimuki bwalo bwenu mikyenu, bwalo bunanulongolabo ku bimu ; yi nunakumibwa mu bixingidilu ; yi nunacwadibwa ku mpala ya milopwe yi ya bafumu ku mucwe ămene, bwalo bwa ntôbô kubatôbôlela.

¹⁰ Yi losangu lunengela luxekwambidibwa buxi kudi mabila moso.

¹¹ Oka lolo banwacwala yi banwalongola, kanwakadi yi mutete buxi, munuxetôya ; kate diyi dioso dinanupebwa ku ola you, nuditôyi dedi ; bwalo bunutasotôya nonu, kate Mwoxixi a Babala.

¹² Yi mwana a mama unalongola mwana a mama ku lufu, yi tete unalongola mwana ; yi bana banabatombokyela bamabalela yi banabaxipisa.

¹³ Yi nunanyananibwa kudi bantu boso ku mucwe ă dina diamene. Mo you unakala amakwemana pôi ku sula, yei unapandixibwa.

¹⁴ Oka lolo nwamona yangonye ya lusancu yamakwemana kutaxekwemanayi (you abala alembeteli), bobo lolo badi mu Yudiya bacini ku mpongo ;

¹⁵ yi you udi kulu kwa ncibo kapweki munda, kabwedi momu ndo kuncula kintu kioso mu ncibo anci ;

¹⁶ you lolo udi mu kibidi kapinani kuya angata kifunda kienci.

¹⁷ Mo mpeya kudibo badi yi mafu, yi kudibo banusa bana ku matuku yia.

¹⁸ Nulombi lolo ene, kakuxeakala noku ku ngondo ya maxika.

¹⁹ Bwalo bunakala matuku yia buxitu bea bitakadi nako pôi bubangabanga bwa kipangu kiakapanga Ncembi pôi nkyekyu, yi kabunakala nako kabidi nyô.

²⁰ Yi kutena Fumu amaxikisa lwedi lwa matuku yia, kakuxepandixibwa munyu mwoso ; kaninga ku mucwe ă basungudibwi bakasungulayi ndo kwamaxikisayi matuku yia.

²¹ Yi ku kikondo kieki, ndo muntu mwoso unanutôyela ene, Numoni, kunu kudi Kalistu ; ndo ene, Numoni, yikwa ; kanwetabuxi.

²² Bwalo bunakwemana baKalistu ba mancanga yi badimuxi ba mancanga, banakwebesa bilayixilu yi bikamakama, bixeungisabo (ximbi bamalubukwa nako), isanga basungudibwi mikyeabo.

²³ Mo nonu nudimuki ; numoni, namanutôyela bintu bioso ku buxi.

²⁴ Kate ku matuku yia, kunyuma kwa buxitu bobu, kunapindixibwa diba, yi ngondo kanateka mwexi ănci paxi ;

²⁵ mitoto lolo ya diulu yinasomoka, yi bikupu bidi mu diulu binatepexebwa.

²⁶ Yi ku kikondo kieki kunamonabo Mwana a Muntu ulolwa mu mabaxi yi ngulu mingi yi dikai dingi.

²⁷ Yi ku kikondo kieki, kunatumayi bangele yi unakokyeya basungudibwi banci pôi mpepele inai, pôi ku sula kwa loboko pôi ku sula kwa diulu.

²⁸ Kaninga nweyi mwele ă muci ă kikuyi kia maxika  ; panakala dibunca dienci dilolwa kulebela, ditanapandika malwa, nwalubukwa ene, ngondo ya minyinya itani pepe.

²⁹ Mo nako nonu kabidi, binwamona bintu bebi bitanapona, nulubukwi ene, kudi pepe, isanga ku mbelo.

³⁰ Nwatôyela sôsôlwo ene, Mwociya ou kaunadika pôi kikondo kinakala bintu bioso bebi noku biamafika.

³¹ Diulu dinadika yi loboko, mo meyi amene kanadika pô.

³² Mo ku bwalo bwa dituku dedi ndo bwa ola you, kakuna muntu umoumwe amalubukwa, kumoni isanga bangele mu diulu, kumoni Mwana, mo Tete.

³³ Nudimuki, nutebeli, yi nulombi ; bwalo bunutasolubukwa kikondo bidikio.

³⁴ Kulexi yi muntu amancuka ku mbata, amaxiya ncibo anci yi amapa basadi banci bumanya, yi amapa muntu mwoso mudimo ănci, yi amatôyela munami a mbelo, ene, adingili.

³⁵ Mbwôso nudingili, bwalo bunutasolubukwa palolwa fumu a ncibo ; ndo ku bwelu, ndo ku butuku pakacikaci, ndo ku ntala mubedi, ndo ku lubangu ;

³⁶ ximbi uxelwa kimpwaxa pwa, uxenusañana nudi mu kulala tulu.

³⁷ Mo diyi dinwatôyela nonu, ngwatôyela bantu boso ene, Nudingili.