MAKU 11 - Disambi Dipyadipya

¹ YI pakakokyelabo pepe yi Yelusaleme padi Betefange yi Betani, ku lupongo lwa Olife, akatuma beyi banci babidi

² yi akabatôyela ene, Nuyi mu kala kabende kadi ku mpala yenu, yi pa kubwela momu nunasañana mwana a mpundu mangwoso musuka, utawapema muntu mwoso kulu kwanci pôi nkyekyu ; numusuli, numucwali kunu.

³ Yi ndo muntu mwoso unwatôyela ene, Nwencenca noku kukai ? nutôyi ene, Fumu umwabila ; yi unamutuma mangwoso.

⁴ Yi bakancuka yi bakasañana mwana a mpundu musuka ku mbelo kunci ku diso dia ncila, yi bakamusula.

⁵ Banga lolo bakakwemana koku bakabatôyela ene, Nwencenca kai ? nudi mu kusula mwana a mpundu.

⁶ Yi bakabatôyela bea biakatôya Yisu ; yi bobo bakabalekyela.

⁷ Yi bakafikisa mwana a mpundu kudi Yisu, yi bakapula bifunda biabo kulu kwanci, yi yei akakwapema kulu kwanci.

⁸ Yi bantu bangi bakakwadisa bilamba biabo pa ncila ; banga lolo mabunca akakalabo mu bibidi.

⁹ Yi bobo bakaya buxi yi bobo bakalwa kunyuma bakakwamena meyi ene, Osana ; you atumbixibwi ulolwa ku dina dia Fumu.

¹⁰ Bufumu butumbixibwi bulolwa bwa tetecu Dafidi. Osana mu kidi kiadika kulu.

¹¹ Yi akabwela mu Yelusaleme munda mwa tempelo ; yi pakadi amaxexela bintu bioso, bwalo bwakadi kutani nkyekyu pa dyololo, akaya ku Betani yi disangi yi babidi.

¹² Mankyelo lolo, pakadi bamabatuka mu Betani, yei akadi yi ncala.

¹³ Yi pakamonayi kikuyi kia maxika kulekule kiakadi yi malwa, akalwa ndo ambeci uxesañana dimoma koku. Yi pakafikayi kudikio, akasañana kumoni kintu mo malwa matupu, bwalo butakadi kikondo kia mamoma a kikuyi.

¹⁴ Yi akakulumuna yi akautôyela ene, Muntu kadi mamoma kudi pôi nkyekyu kô kô. Beyi banci lolo bakakwombwa.

¹⁵ Yi bakalwa ku Yelusaleme, yi yei akabwela mu tempelo, akabanga kubatenyeka bakakwodisa yi bakakwola mu tempelo, akatudeya mesa a basumbanyi ba mpalata, yi nkwasa ya bantu bakakwodisa bimbenga ;

¹⁶ akadi kasokwetabuxila muntu mwoso dia kucwala kintani kioso mu tempelo.

¹⁷ Yi akakweyesa ene, Ki kwamafundibwa ene, Ncibo amene unatambibwa ncibo a kulomba bwalo bwa mabila moso ? Mo nonu nwamamukulumuna kisokomenu kia befi.

¹⁸ Yi makanda manene yi bafundi ba mikanda bakakwombwa, yi bakapalala muxemuxipabo ; bwalo bwakamucinabo, bwalo bwakakamina kimbukuma bungi bwakio kweyesa kwanci.

¹⁹ Yi pakalwa bwelu, akabatuka kunci kwa bula.

²⁰ Yi pakadikabo ku butwatuku pexe bakamona kikuyi kiamakwoma pôi ku macina.

²¹ Pita lolo akakwela lukanyi, akamwambila ene, Labi, mona, kikuyi kiakafinga Owe kiamakwoma.

²² Yisu akabapingasa ene, Nwakali yi kwetabusa kudi Ncembi.

²³ Nwatôyela sôsôlwo ene, Muntu mwoso unatôyela lupongo lolu ene, Ncudibwa, elebwa mu mai, yi kanaxitaxita mu mucima ănci, kate unakwetabusa ene, diyi diatôyay dinafika, unakala yi kintu kiatôyayi

²⁴ Mbwôso nwatôyela ene, Bintu bioso binwalomba yi binwapangusa nwetabusi ene, nwamabiangata, yi nunakala yinabio.

^25-26 Yi binwemanayi kulomba, ndo nudi yi muntu mwoso bwalo, numulekyeli, bixenulekyela Tetenu kabidi udi mu diulu mona enu.

²⁷ Yi bakalwa kabidi ku Yelusaleme. Yi pakakwendakanayi mu tempelo, makanda manene akalwa kudiyi yi bafundi ba mikanda yi babakulu ;

²⁸ yi bakamutôyela ene, Ku bumanya bwa beci kwencenca Owe bintu bebi ? Yi ñani akakupa bumanya bobu bwa kwenca bintu bebi ?

²⁹ Yi Yisu akabapingasa ene, Nakunwapangusa nonu diyi dimodimwe, yi nungupingasi diyi ; yi nakunwambila dia bumanya bungwencenca bintu bebi yinabu.

³⁰ Kunumeya kwa Yoano kwakadi ndo kwa diulu ndo kwa bantu ? Nungupingasi diyi.

³¹ Yi bakakwelañana nkanyi ene, Ndo tuxetôya ene, Kwa diulu, yei unatôya ene, Mbwôso kukai nwakadi kanusomwetabusa ?

³² Kaninga ndo tuxetôya ene, Kwa bantu . . . . bakacina bantu ; bwalo bwakakisa bantu boso dia Yoano ene, udi mudimuxi sôsôlwo.

³³ Yi bakapingasa Yisu ene, Katusolubukwa. Yisu akabambila ene, Meme kabidi kisonwambila dia bumanya bungwencenca bintu bebi yinabu.