MAKU 10 - Disambi Dipyadipya

¹ YI akancuka koku, akalwa ku mbata a Yudiya, yi ku dixia dia Yôdana. Yi bimbukuma biakakokama kabidi kudiyi, yi akabeyesa kabidi bea biakadi mwosambu ănci.

² Yi banga baFalixi bakalwa kudiyi bakamwapangusa ene, Kwalelekyela yi bwadi muntu kuncula mukasanci ? badi mu kumwelekyesa.

³ Mo yei akabapingasa ene, Mosese akanulanga beci ?

⁴ Bobo ene, Mosese akamufundisa mukanda ă dibakwa difu, yei kumuncula.

⁵ Mo Yisu akabapingasa ene, Akanufundila mulangu ou bwalo bwa micima yenu kukola.

⁶ Mo pôi bubangabanga bwa kupangibwa kwa bintu, Ncembi akabapanga mwamulumi yi mwamukaxi.

⁷ Ku mucwe ou kunaxiya muntu tetenci yi mamanci, yi unanamata kudi mukasanci ;

⁸ yi babidi baba banakala munyu umoumwe ; bitasoakalabo babidi nyô, kate munyu umoumwe.

⁹ Mbwôso bintu biamasambika Ncembi, muntu kabinamuni.

¹⁰ Yi mu ncibo kabidi mwakamwapangusa beyi banci ku bwalo bobu.

¹¹ Yi akabatôyeia ene, Muntu mwoso unancula mukasanci yi unangata munga dibakwa amamwonena bwalo bwa budibi.

¹² Yi ndo mwamukaxi unancula bayenci yi unaya kudi munga mwamalumi dibakwa, udi yi kwona kwa budibi.

¹³ Yi bakacwala bana babende kudiyi, ababaki bianca bienci. Mo beyi bakabakama makamu bakabacwala.

¹⁴ Mo pakamona Yisu, akanyungula ku mucima, yi akabatôyela ene, Nulekyeli bana babende, balwi kundi ; kanubakandi ; bwalo budi bufumu bwa diulu bwa bena noku.

¹⁵ Nwatôyela sôsôlwo ene, Muntu utasoangata bufumu bwa Ncembi bea luna mwana mubende, kanabwek momu pô.

¹⁶ Yi pakadi amabangata mu biboko bienci yi amabaka bianca bienci kulu kwabo, akabalwangwasana.

¹⁷ Yi pakadi utanakwenda mu ncila muntu akalwa kudiyi lubilu, akakonya binu ku mpala anci yi akakwapangusa ene, Mweyexi unengela nkisi kai ndo kukita môyo ă kô kô ?

¹⁸ Yisu lolo akamutôyela ene, Kuka ungwabikila ene, Kunengela ? Kakuna muntu udi kunengela utena umoumwe, Ncembi.

¹⁹ Owe ubili milangu ene, Kuxipi. Kwendedi mukaxi abene. Kwebi. Kudimbididi muntu. Kudimbi. Nemeka tetebe yi mabebe.

²⁰ Yei akamupingasa ene, Mweyexi, namanama bintu bebi bioso pôi bwabuki bwamene.

²¹ Yi Yisu akamutebela, yi akamunanga nyinga ; yi akamutôyela ene, Ukiasaka yi kintu kimokimwe ; yaka ya odisi bintu bioso bidi yinebe, paka lolo bakombi, yi unakala yi bodidi munda mwa diulu ; yi lwaka, lwa ngulandudili meme.

²² Mo yei akapinda ku mpala anci bwalo bwa diyi dedi, akancuka yi buxitu, bwalo bwakadiyi muna bima bingi.

²³ Yisu lolo akakyabuka, yi akatôyela beyi banci ene, Kai kukola, bobo badi yi madidi kubwela mu bufumu bwa Ncembi.

²⁴ Yi beyi bakakamina meyi anci. Mo Yisu akabakulumuna kabidi ene, Bana, kai kukola, bobo bamakwetabuxila madidi kubwela mu bufumu bwa Ncembi.

²⁵ Xamo kubwela mu diso dia ndongo kudi kulebela, mo mwodidi kubwela mu bufumu bwa Ncembi kudi kukola.

²⁶ Yi bakakama kukama kungi, yi bakatôya ene, Ape ñani ubili kupandixibwa ?

²⁷ Mo Yisu akabatebela, yi akatôya ene, Ku bwalo bwa bantu, nako kwamapila, kate ku bwalo bwa Ncembi, kumoni ; bwalo bwamalubukibwa bintu bioso kwencebwa kudi Ncembi.

²⁸ Yi Pita akabanga kumwambila ene, Mona, coco twamaxiya bintu bioso yi twamakulandudila.

²⁹ Yisu akatôya ene, Nkwatôyela sôsôlwo ene, Ewalo bwa muntu mwoso amaxiya ncibo, ndo bakunyi, ndo bangasana, ndo tete, ndo mama, ndo bana, ndo mbata, ku mucwe ămene yi ku mucwe ă losangu lunengela ;

³⁰ muntu a noku kanakodya kwangata nkama nkama nkyekyu ku kikondo kieki ; ncibo, yi bakunyi, yi bangasana, yi bamama, yi bana, bi mbata, yi kukulomonebwa ndongo ; yi ku mwociya yiwa ulolwa, môyo ă kô kô.

³¹ Mo bantu bangi badi ku buxi banakala ku sula ; yi badi ku sula banakala ku buxi.

³² Yi bakadi mu ncila a kuya ku Yeusaleme ; yi Yisu akadi mu kuya ku buxi bwabo ; yi bakakama kama yi bakacina biakalandabo. Yi akangata disangi yi babidi kabidi, yi akabanga kubatôyela dia bipoma bixemuponena ;

³³ ene, Numoni, tutanaya ku Yelusaleme, yi Mwana a Muntu unalongolebwa kudi makanda manene yi kudi bafundi ba mikanda ; yi banamubela lopelo lwa kufwa, yi banamulongola kudi mabila ;

³⁴ banamukyeca lolo, banamukuma bintu, banamwela mati, yi banamuxipa ; yi kunyuma kwa matuku asatu kunabikayi kabidi.

³⁵ Yi Yakobo yi Yoano, bana ba Sebede, bakalwa kudiyi ene, Mweyexi, twakyeba uxetwencela kintu kioso kitunakulomba.

³⁶ Yei akabambila ene, Binwananga nukixili bidibeci ?

³⁷ Yi bakamwambila ene, Utupi noku, tuxikami, umoumwe ku kidyo kiebe yi umoumwe ku kimoso kiebe, ku dikai diebe.

³⁸ Mo Yisu akabatôyela ene, Kanusolubukwa binwalomba. Nonu nwamaponyañana yi kunwa mpamba unonwa meme ? Ndo kunumeyebwa yi kunumeyebwa kungwanumeyebwa ?

³⁹ Yi bakamwambila ene, Twamaponyañana. Yisu akabambila ene, Mpamba unonwa meme, nonu nunamunwa ; yi kunumeyebwa kungwanumeyebwa meme, nonu nunanumeyebwa yinaku ;

⁴⁰ mo kuxikama ku kidyo kiamene ndo ku kimoso kiamene kakuna bwalo bwamene kupa, kutena kudibo bamalungikidibwaku.

⁴¹ Yi pakakwombwa beyi disangi, bakabanga kunyungula ku micima bwalo bwa Yakobo yi Yoano.

⁴² Mo Yisu akababikila kudiyi, yi akabambila ene, Nwalubukwa bobo balelekyela yi kubumba mabila badi yi bufumu kulu kwabo ; yi bantu babo banene babadika bumanya.

⁴³ Mo kakusoakala nako kunudi. Kate muntu mwoso akyeba kwakala munene kunudi unakala musadi enu ;

⁴⁴ yi muntu mwoso akyeba kwakalaku buxi bwenu unakala mupika a bantu boso.

⁴⁵ Bwalo butatuli isanga Mwana a Muntu kulwa sadidibwa kate kusala, kupela bantu bangi môyo ănci, mpiku ya kubapikula.

⁴⁶ Yi bakalwa ku Yeliko ; yi pakadi utanabatuka ku Yeliko, yi beyi banci yi kimbukuma kinene, Batimayo, mwana a Timayo, mulombanani akadi mufofo, akadi mu kixikama ku mwanca ă ncila.

⁴⁷ Yi pakakwombwayi ene, Kudi Yisu a Nasalete, akabanga kwamena ene, Yisu, Mwana a Dafidi, ungwombwelipo mwengo.

⁴⁸ Yi bantu bangi bakamukama makamu, akali polo. Kaninga yei akadika kwamena kungi kungi, ene, Mwana a Dafidi, ungwombwelipo mwengo.

⁴⁹ Yi Yisu akakwemana yi akatôya ene, Numubikili. Yi bakabikila mufofo ene, Kolesa mucima, emana, ukwabikila.

⁵⁰ Yei akakwecikisa mucwala ănci, akabika mangwoso, yi akalwa kudi Yisu.

⁵¹ Yi Yisu akamupingasa ene, Kiñani kiakyeba nkukixili ? Yi mufofo ene, Laboni, ngwangati meso amene.

⁵² Yisu akamutôyela ene, Yaka, kwetabusa kwebe kwamakupandisa. Yi akangata meso anci mangwoso, yi akamulandudila mu ncila.