MAKU 1 - Disambi Dipyadipya

¹ BUBANGABANGA bwa losangu lunengela lwa Yisu Kalistu, Mwana a Ncembi ;

² bea biakafundibwa kudi Esaya mudimuxi ene, Mona, meme ngwatuma mukyenci amene ku mpala ebe, unalungika ncila ebe.

³ Diyi dia muntu amadila mu mbata a kisobe ene, Nulungiki ncila a Fumu, nuxembeyi bidikilu bienci swi.

⁴ Yoano akalwa, akanumeya numeya bantu mu mbata a kisobe, akakwambila dia kunumeyebwa kwa kudibela bwalo bwa kulekyelebwa kwa mabi.

⁵ Yi bungi bwa mbata a Yudiya bakabatuka kuya kudiyi, yi bungi bwa bena Yelusaleme ; yi bakanumeyebwa kudiyi mu ncedi a Yôdana, badi mu kusakola mabi abo.

⁶ Yoano akalata nyonyi ya xamo, yi mwokaba ă dikoba ku makondu anci, yi akadya minkumbi yi buki bwa mutu.

⁷ Yi akakwambila ene, Muntu ulolwa kunyuma kwamene amangudika ngulu, untasolelekyela yi kwenama yi kusula mixinga ya makaka anci.

⁸ Meme namanunumeya mu mai, mo yei unanunumeya yi Mwoxixi a babala.

⁹ Ku matuku yia kwakalwa Yisu ku Nasalete a Ngalili, yi akanumeyebwa kudi Yoano mu Yôdana.

¹⁰ Yi pakasabukayi mangwoso mu mai, akamona diulu ditanasambudibwa, yi Mwoxixi utanapweka kulu kwanci bea kimbenga ;

¹¹ yi diyi diakalwa mu diulu ene, Owe udi Mwanami munangibwi ; kudi Owe ndo kunamaxekyelela.

¹² Yi Mwoxixi akamwendesa mangwoso ku mbata a kisobe.

¹³ Yi akadi mu mbata a kisobe matuku masangi anai, amakwelekyexebwa kudi Satana ; yi akakala yi nyama ya makitu ; yi bangele bakamusadila.

¹⁴ Yi pakadi Yoano amalongolebwa, Yisu akalwa mu Ngalili, udi mu kwambila ambila losangu lunengela lwa bufumu bwa Ncembi,

¹⁵ ene, Kikondo kiamafika, yi bufumu bwa Ncembi bwamakokyela pepe ; nudibeli, nwetabuxili losangu lunengela.

¹⁶ Yi pakadi udi mu kudika pepe yi Mai a Ngalili, akamona Ximono, yi Andelo Ximono mwakunyenci, badi mu kwela matei mu mai, bwalo bwakadibo yi mudimo ă yixi kukwata.

¹⁷ Yisu akabatôyela ene, Nungulandudili yi nakunukulumuna ku bakwaci ba bantu.

¹⁸ Yi bakaxiya matei abo mangwoso yi bakamulandudila.

¹⁹ Yi pakadi amadika ku buxi kubende, akamona Yakobo, mwana a Sebede, yi mwakunyenci Yoano, bakadi mu kibusu kabidi badi mu kutombola matei abo.

²⁰ Yi akababikila mangwoso ; bobo lolo bakaxiya teteabo Sebede mu kibusu yi bena midimo, yi bakamulandudila.

²¹ Yi bakaya munda mwa Kapenaumu. Akabwela mu kixingidilu mangwoso ku dituku dia Sabado yi akakweyesa.

²² Yi bakakamina kweyesa kwanci, bwalo bwakabeyesayi bea muntu yi bumanya, kumoni bea bafundi ba mikanda.

²³ Mu kixingidilu kiabo mwakadi muntu lolo amakwacibwa kudi kidimu kia mbindu, yi akakwamena,

²⁴ ene, Tudi yinebe bwalo kai, Yisu a Nasalete ? Owe wamalwa kulwa tuncimisa ? Namakulubukwa ; udi muna babala a Ncembi.

²⁵ Yi Yisu akamukama dikamu ene, Pudikila ; pauka munda mwanci.

²⁶ Kidimu lolo kia mbindu, pakadi kiamamuponesa yi dicwi, kiakakwamena yi diyi dikola, yi kiakapauka munda mwanci.

²⁷ Yi bungi bwabo bakakama kama, biakakwelesañanabo mbata ene, Kifiani kieki ? Kai kweyesa kupyakupya! Ku bumanya ndo kwalangayi isanga bidimu bia mbindu, yi biamamwedeya.

²⁸ Yi lotumbu lwanci lwakacakana mangwoso ku bidi bioso ku bungi bwa mbata a Ngalili.

²⁹ Yi bakabatuka ku kixingidilu mangwoso, yi bakabwela yi Yakobo yi Yoano mu ncibo a Ximono yi Andelo.

³⁰ Yi Ximono mukwanci a babakaxi akalala yi kusama kwa mudilu. Yi bakamutôyela mangwoso ku bwalo bwanci.

³¹ Yei lolo akalwa yi akakwata kianca kienci, akamubisa ; mudilu pako ăkamuncuka yi yei akabasadila.

³² Pa bwelu, pakadi diba diamabwela, bakacwala kudiyi bungi bwa batati ba masama yi bobo bakakwacibwa kudi bidimu bibi.

³³ Yi bungi bwa bula bakasangilañana ku mbelo.

³⁴ Yi akapandisa bantu bangi bakatata masama a ntonga yi ntonga ; akatenyeka lolo bidimu bibi bingi, yi akadi kasotôyesa bidimu bibi, bwalo bwakamulembetelabio.

³⁵ Ku butwatuku pexe, buxi butasokya butuku kikondo kingi, akabika yi akabatuka, yi akancuka kuya ku kidi kitena bantu, yi akalomba koku.

³⁶ Ximono lolo yi bobo bakadi yinanci bakamulanda ;

³⁷ yi pakadi bamamusañana bakamutôyela, ene, Bantu boso bakwapalala.

³⁸ Akabambila ene, Cuyi kunga ku mala mabende adi pepe, binxekwambila diembi koku kabidi, bwalo bunamalwa ku mucwe ou.

³⁹ Yi akakwenda, udi mu kwambila ambila diembi mu bixingidilu biabo mu bungi bwa Ngalili, yi udi mu kutenyeka tenyeka bidimu bibi.

⁴⁰ Yi muna sudi akalwa kudiyi, akamulomba, akamukumina binu paxi ene, Ndo wananga, ubili kungususula babala.

⁴¹ Yi Yisu akakwombwa mwengo, akaxombola kianca kienci yi akamubaka kianca ene, Ngwananga ; susuka.

⁴² Yi pakatôyayi, kusama kwa sudi kwakamuncuka mangwoso yi akasusuka.

⁴³ Yi akamulanga, yi akamuncula mangwoso

⁴⁴ ene, Mona, kutôyedi muntu mwoso diyi, kate yaka ya diebesi mikyebe kudi bokanda, yi longa malongi bwalo bwa kususuka kwebe, akatôya Mosese, bwalo bwa ntôbô kubatôbôlela.

⁴⁵ Kaninga akabatuka, yi akabanga kusakola sakola kungi, yi kucakanisa diyi, bitalubukwa Yisu kubwela mu bula kabidi ku mpala ya bantu, mo akakala kunci mu bidi bitena bantu ; yi bakalwa kudiyi ku mwanca mwoso.