MAKISA 9 - Disambi Dipyadipya

¹ KANINGA Saulu, ukiaputa lomo lwa kwana yi kwonda bwalo bwa beyi ba Fumu, akaya kudi bokanda bunene,

² yi akamulomba mikanda ya kuya yinayo ku Damasako ku bixingidilu ; ene, ndo asañana bantu ba bena ncila you, ndo babalumi ndo babakaxi, abacwali basuka ku. Yelusaleme.

³ Pakakwendayi lolo, akafika pepe yi Damasako ; yi obo akalumuka mangwoso padiyi a munda mwa diulu ;

⁴ yi akapona paxi, yi akakwombwa diyi diakamutôyela ene, Saulu, Saulu, kukai ungwakolomona ?

⁵ Akatôya ene, Owe ndo ñani, Fumu ? Yei ene, Meme ndi Yisu, akolomona owe.

⁶ Kate emana, bwela munda mwa bula, munakwambidibwa muxekwenca.

⁷ Mo bantu bakakwenda yinanci bakakwemana nya, bamakwombwa diyi, mo kabamoneni muntu.

⁸ Yi Saulu akakwombuluka paxi, yi pakadipudibwa meso anci akadi kasomona kintu : mo bakamuxiya xiya ku kianca, yi bakamucwala ku Damasako.

⁹ Yi akadi matuku asatu kutena kumona, akadi kasodya, kasonwa.

¹⁰ Ku Damasako lolo kwakadi mweyi, dina dienci ene, Anania. Fumu akamutôyela mu dilu ene, Anania. Yei ene, Mona, meme kayou, Fumu.

¹¹ Yi Fumu akamwambila, ene, Emana, enda ku mwolongo ăbikidibwa ene, Swi, palala muntu mu ncibo a Yudaxi, abikidibwa ene, Saulu, muna Taso ; mona, udi mu kulomba,

¹² amamona muntu abikidibwa ene, Anania amabwela, amabaka kianca kienci kulu kwanci, amoni.

¹³ Mo Anania akapingasa ene, Fumu namakwombwa kudi bantu bangi dia muntu you, mwakakixilayi bena babala bebe bubi bungi ku Yelusaleme ;

¹⁴ kunu lolo kudiyi yi bumanya bwa makanda manene, bwa kusuka bantu boso badi mu kwabila dina diebe.

¹⁵ Mo Fumu akamwambila ene, Enda, bwalo budiyi mpamba musungudibu amene, ndo kucwala dina diamene ku mpala ya mabila, yi ya bafumu, yi ya bana ba Isalele ;

¹⁶ bwalo bunamwebesa munatacilayi dina diamene kutata kungi.

¹⁷ Yi Anania akaya yi akabwela munda mwa ncibo ; akabaka bianca bienci kulu kwanci yi akatôya ene, Muna kwami Saulu, Fumu apungutuma, Yisu, akamoneka kudi mu ncila akalwa owe, bixemona owe, yi bixekwolubixibwa Mwoxixi a babala.

¹⁸ Yi ku meso anci kwakapona mangwoso bea mamba, yi akamona ; akakwemana lolo yi akanumeyebwa ;

¹⁹ akangata bidya yi akadiombwa ngulu. Yi akakala amo matuku yi beyi bakadi mu Damasako.

²⁰ Mu bixingidilu lolo mwakakwambilayi mangwoso dia Yisu, ene, Udi Mwana a Ncembi.

²¹ Yi bungi bwabo bakakwombwa bakakama, bakatôya ene, Ki you akaxipa bantu mu Yelusaleme bamakwabila dina dedi, akalwa kunu kulwa bacwala basuka kudi makanda manene ?

²² Kaninga Saulu akalekola yi ngulu mingi, akabulamisa bena Yuda bakakala ku Damasako, akakwebesa ene, You udi Kalistu.

²³ Pakadi matuku mangi amadika lolo, bena Yuda bakaya nkuku bwalo bwa kumuxipa.

²⁴ Kaninga kipola kiabo kiakalubukibwa kudi Saulu. Bakadingila bibwelelu kabidi munyinya yi butuku bixemuxipabo ;

²⁵ kaninga beyi bakamwangata ku butuku, yi bakamufundusa pa kididi kia bula, bakamupwesa mu kisakwa.

²⁶ Pakafikayi ku Yelusaleme akapalala kunamata yi beyi, yi bakamucina bungi bwabo, bakadi kabasokwetabusa ene, udi mweyi.

²⁷ Kaninga Banabasa akamwangata, akamucwala kudi batumibwi, yi akabambila mwakamonayi Fumu mu ncila, akatôya yinanci ; mwakakwambilayi lolo yi mucima ku Damasako mu dina dia Yisu.

²⁸ Yi akadi yinabo yi kubwela yi kubatuka ku Yelusaleme,

²⁹ akakwambila yi mucima mu dina dia Fumu. Akatôya lolo yi akakwelesa mbata yi bena Yuda ba ku Ngiliki ; kaninga bobo bakapalala kumuxipa.

³⁰ Pakalubukwa bakunyi noku, bakamucwala ku Kyesalia yi bakamutuma kuya ku Taso.

³¹ Nako kikokye kiakadi yi polo, ku bungi bwa Yudiya yi Ngalili yi Samalia, yi kiakakwabakibwa ; kiakakwenda lolo mu bowa bwa Fumu, yi mu kibondelu kia Mwoxixi a babala, kiakalundixibwa.

³² Yi pakadi Pita udi mu kutanga bungi bwa mbata, akapweka kabidi kudi bena babala bakakala ku Lida.

³³ Yi akasañana muntu koku, dina dienci Ainea, akamalala ku ntangi mbula yenana, akadi muna mbôyaponde.

³⁴ Yi Pita akamwambila ene, Ainea, Yisu Kalistu ukwapandisa ; ombuluka, adisa ntangi ebe. Yi akakwombuluka mangwoso.

³⁵ Yi bungi bwabo bakakala ku Lida yi ku Salono bakamumona, yi bakakulumuka kudi Fumu.

³⁶ Ku Yopa lolo kwakadi mweyi a babakaxi, dina dienci ene, Tabita, ndo ene, Dôkasa (sakolo ene, Nkulupa) ; you akalekola yi makisa anengela yi makisa a mwengo akakisa kisayi.

³⁷ Yi akatata kusama ku matuku yia, yi akafwa ; yi pakadi bamamukusula bakamuladika mu ngumbu a kulu.

³⁸ Yi bwalo bwakadi Lida yi Yopa pepe, beyi, pakakwombwabo ene, Pita udi koku, bakatuma babalumi babidi kudiyi kuya mulomba ene, Kwopixi kulwa kutudi.

³⁹ Yi Pita akakwombuluka yi akaya yinabo ; pakadi amafika, bakamubandisa mu ngumbu a kulu ; yi bungi bwa bakaxi ba bafu bakakwemana padiyi, badi mu kudila masonci, yi bakamwebesa binkutu yi bilamba biakakwenca Dôkasa pakadiyi yinabo.

⁴⁰ Mo Pita akabapaula bungi bwabo, akakuma binu paxi, yi akalomba ; akakulumuka lolo kwakadi mufu, yi akatôya ene, Tabita, bika. Yi akadipula meso anci, yi pakamonayi Pita, akaxikama.

⁴¹ Yi akamulonga kianca kienci, yi akamwombulula ; yi pakadi amabikila bena babala yi bakaxi ba bafu, akamwebesa udi yi môyo.

⁴² Yi losangu lwakakwombwebwa mu bungi bwa Yopa, yi bantu bangi bakakwetabuxila Fumu.

⁴³ Yi akasala matuku mangi mu Yopa, kwa Ximono, mweni a makoba.