MAKISA 8 - Disambi Dipyadipya

¹ YI Saulu akakwetabuxila kuxipibwa kwanci. Ku diba dedi kwakabanga kukolomona kungi, bwalo bwa kikokye kiakadi mu Yelusaleme ; yi bakacakanixibwa bungi bwabo ca mu mbata ya Yudiya yi Samalia, kutena batumibwi.

² Yi bantu ba nkwami bakancika Stefano, bakamudidila bidilu bingi.

³ Mo Saulu akasanca sanca kikokye, akabwela mu ncibo mwoso, akaputulula babalumi yi babakaxi, yi akababwesa mu ncibo a lukanu.

⁴ Bobo lolo bakacakanixibwa bakatanga tanga mala, badi mu kwambila diyi.

⁵ Yi Filipi akapweka ku bula bwa Samalia, akabambila dia Kalistu.

⁶ Yi bimbukuma biakanama bintu yi lukanyi lumolumwe biakatôyebwa kudi Filipi, pakakwombwabo, yi pakamonabo bilayixilu biakakwencayi.

⁷ Bwalo bwakapauka bidimu bia mbindu kudi bantu bangi bakadi yinabio, badi mu kwamena yi diyi dikola ; yi bantu bangi bakadi yi mbôyaponde, yi bitumbi, bakapandixibwa.

⁸ Yi ku bula bobu kwakadi kiăngo kingi.

⁹ Kaninga muntu umoumwe akadiko, dina dienci ene, Ximono, akasaka bubuki ku bula kalikali, yi akakamisa bubila bwa Samalia, akaditôyela ene, mikyenci ndo munene :

¹⁰ akakwombwelabo bo-a-bwoso, poi mwamuki pôi mwamukulu ene, You udi ngulu ya Ncembi yabikidibwa ene, Minene.

¹¹ Yi bakamudingila bwalo bwakabakamisayi kikondo kingi ku bubuki bwanci.

¹² Kaninga pakakwetabusabo Filipi udi mu kwambila losangu lunengela lwa bufumu bwa Ncembi yi Iwa dina dia Yisu Kalistu, bakanumeyebwa, yi babalumi yi babakaxi.

¹³ Yi Ximono akakwetabusa mikyenci kabidi  ; yi pakadi amanumeyebwa, akasala yi Filipi  ; yi pakamonayi bilayixilu yi makisa manene a ngulu biakakwencebwa akakama kama.

¹⁴ Pakakwombwa batumibwi bai kadi ku Yelusaleme, ene, Samalia apwangata diyi dia Ncembi, bakabatumina Pita yi Yoano ;

¹⁵ bobo, pakadi bamapweka, bakabalombelela bangati Mwoxixi a babala ;

¹⁶ bwalo butaponayi kulu kwa muntu mwoso abo pô, mo bakanumeyebwa mu dina dia Fumu Yisu.

¹⁷ Kunyuma bakabaka makaci abo kulu kwabo, yi bakangata Mwoxixi a babala.

¹⁸ Kaninga pakamona Ximono ku kubaka kwa makaci a batumibwi kwakapebwa Mwoxixi a babala, akabalonga mpalata

¹⁹ ene, Mpi meme kabidi bumanya bobu, bixeangata muntu mwoso Mwoxixi a babala ungwabaka makaci.

²⁰ Mo Pita akamwambila ene, Mpalata yebe yifwi yinebe, bwalo bwapwenca kwangata dilongi dia Ncembi ku mpalata.

²¹ Kuna yi kicini ndo yi dikapa ku bwalo bobu, bwalo butena mucima ěbe yi nkwami ku mpala a Ncembi.

²² Mbwôso udibeli mikyebe bwalo bwa bubi bwebe bobu noku, lombela Fumu, ndo ambeci lukanyi lwa mucima ěbe lunakulekyelebwa ;

²³ bwalo bunkwamona wapwakala mu lusangu lwa bululu yi mu muxinga ă kwona.

²⁴ Yi Ximono akapingasa ene, Nungulombeleli kudi Fumu, bitaxenguponena bwalo bumobumwe bwa malo anwamatôya.

²⁵ Mbwôso pakadi bamatôbôla, yi bamatôya diyi dia Fumu, bakapifiana ku Yelusaleme, yi bakakwambila losangu lunengela mu mala mangi a bena Samalia.

²⁶ Mo mwangele a Fumu akatôyela Filipi, ene, Emana, yaka ku bolongya bwa Sudu, mu ncila a kupweka ku Yelusaleme kuya ku Ngasa ; koku kudi mbata a kanana.

²⁷ Yi akakwemana yi akaya. Yi mona muna Etiopia, Saludi, niuna kikupu kinene muxi mwa Kandaki, fumu a babakaxi a bena Etiopia, akanama bima bienci bioso, akamalwa ku Yelusaleme kulwa xingila ;

²⁸ akadi utanapifiana, uxikamini pa kicwadilu kienci ; udi mu kubala mudimuxi Esaya.

²⁹ Yi Mwoxixi akatôyela Filipi ene, Kokyeia, sangila yi kicwadilu kieki.

³⁰ Yi Filipi akaya iubilu, akamwombwa udi mu kubala mudimuxi Esaya, yi akatôya ene, Wakyendula lolo bwalo butanabala ?

³¹ Yei ene, Ape nkyenduli beci, kutena muntu unangwebesa ? Yi akalomba Filipi, abandi kulwa xikama yinanci.

³² Kidi lolo kia mukanda ă Ncembi kiakabalayi ndo kieki ene, Akaxiyibwa bea mukwakwa ku kixipilu ; yi bea bidi mwana a mukwakwa kimeme ku mpala a mukuludi a nyonyi, ndo biakadi yei, akadi kasodipula musuku ănci.

³³ Ku kupwexebwa kwanci kwakancudibwa kimu kienci ; nkumbu yenci, ñani unayibala ? Bwalo bwamancudibwa môyo ănci paxi.

³⁴ Yi Saludi akapingasa Filipi ene, Ungwambilipo, dia nani diaputôya mudimuxi noku ? dia mikyenci ndo dia munga muntu ?

³⁵ Yi Filipi akadipula musuku ănci, akabanga pa mukanda ou, yi akamwambila dia Yisu.

^36-37 Yi pakakwendabo mu ncila, bakafika pakadi mai ; yi Saludi akatôya ene, Mona, mai ; kiñani kingwakanda kinumeyebwi ?

³⁸ Yi akatôya ene, kicwadilu kiemani ; yi bakapweka munda mwa mai yi Filipi yi Saludi, yi akamunumeya.

³⁹ Yi pakabandabo mu mai, Mwoxixi a Fumu akancimisa Filipi ; yi Saludi kamumona kabidi pô, bwalo bwakakwendayi mu ncila anci yi kiango.

⁴⁰ Mo Filipi akasokoloka ku Asoto ; yi pakatanga tangayi, akakwambila losangu lunengela mu mala moso, biakafikayi ku Kyesalia.