MAKISA 7 - Disambi Dipyadipya

¹ YI bokanda bunene bwakatôya ene, Bintu bebi biapwakala noku ?

² Yei akatôya ene, Bena kwecu yi batete, nwombwi. Ncembi a dikai akamoneka kudi tetecu Abalami pakakalayi mu Mesopotamia, buxi bwakakalayi mu Alana,

³ yi akamutôyela ene, Batuka mu mbata ebe, kudi bulungu bwebe ; lwaka ku mbata unakwebesa.

⁴ Yei lolo akabatuka mu mbata a bena Kaladia, yi akasala mu Alana ; yi Ncembi akamuncula koku, pakadi tetenci amafwa, kulwa ku mbata you kunwakala nonu nkyekyu.

⁵ Yi akadi kasomupa mwokito momu, kumoni isa kinyacilu kia dikasa dienci ; yi akamuxiyila kilaka kia kumupayi, mbata anci yi a bana banci kunyuma kwanci, pakadi ukidi kiena yi mwana.

⁶ Yi Ncembi akatôya noku, ene, Bana banci baxeakala benyambango mu mbata a babene, baxebapwesaku bupika, baxebafina mbula nkama inai ;

⁷ yi Ncembi akatôya ene, Nakubela bubila bunabapwesa ku bupika ; yi kunyuma kwa bintu bebi, banabatuka kulwa ngusadila mu kidi kieki.

⁸ Yi akasambika yinanci disambi dia bwadi kwelebwa ; nako akalela Isaka yi akamwela bwadi ku dituku dia yenana ; yi Isaka akalela Yakobo, yi Yakobo akalela batete becu disangi yi babidi.

⁹ Batete lolo, bakakwombwela Yosefe mwokunyo, bakamwodisa kuya ku Ecipito. Yi Ncembi akakala yinanci,

¹⁰ yi akamupaula mu maxitu anci moso, akamupa dikasa dinengela yi bwinu ku meso a Falowa, fumu a Ecipito ; yei lolo akamudikisa kulu kwa Ecipito yi kwa bungi bwa ncibo anci.

¹¹ Kaninga lukombo lwa ncala lwakalwa mu bungi bwa mbata a Ecipito yi a Kyenene, yi buxitu bungi, yi batetecu bakadi kabasosañana bidya.

¹² Mo pakakwombwa Yakobo ene, miebele idiko mu Ecipito, akatuma batetecu buxi ;

¹³ yi ku diya diamubidi kwakakwebexebwa Yosefe kudi bena kwanci, yi Yosefe bulungu bwanci bwakalubukibwa kudi Falowa.

¹⁴ Yosefe lolo akatuma kuya bikila tetenci Yakobo kudiyi, yi bungi bwa bulungu bwanci, mpala masangi sambwali yi mpala itano.

¹⁵ Yi Yakobo akapweka ku Ecipito yi akafwa, yei yi batetecu,

¹⁶ yi bakacwadibwa ku Xekyeme, bakatekyebwa lolo mu lukita lwakakwola Abalami ku diso dia mpalata kudi bana ba Amolo ku Xekyeme.

¹⁷ Kaninga pakalwa kikondo kia kilaka pepe kiakatôyela Ncembi Abalami, bantu bakalunda yi bakalelañana bungi mu Ecipito,

¹⁸ biakakwemana munga fumu kulu kwa Ecipito utalubukili Yosefe.

¹⁹ You akakwencela bubila bwecu yi mancanga, akafina fina batetecu, becikisi bana babo kabakadi yi môyo.

²⁰ Ku kikondo kieki kwakalelebwa Mosese, akadi yi lwoxixi ku mesô a Ncembi, akanamibwa ngondo isatu mu ncibo a tetenci.

²¹ Pakakwecikixibwayi lolo, mwana a Falowa a babakaxi akamwangata yi akamubungula akali mwananci.

²² Yi Mosese akakweyexebwa bwinu bwoso bwa bena Ecipito, yi akadi yi ngulu mingi ku meyi anci yi ku makisa anci.

²³ Yi pakakalayi yi mbula yenci masangi anai, mu mucima ănci mwakalwa lukanyi lwa kuya mona bena kwanci, bana ba Isalele ;

²⁴ yi pakamonayi muntu utanakolomonebwa, akamusamunina, akasombola you akafinibwa, yi akaxipa muna Ecipito.

²⁵ Bwalo bwakakisayi ene, bena kwanci bamalubukwa ene, Ncembi utanabapandisa ku kianca kienci. Mo bakadi kabasolubukwa.

²⁶ Ku diba diamubidi lolo kwakadiebesayi mikyenci kudibo pakatandañanabo, yi uxebaxikika polo ene, Babalumi, nonu badi bana ba tete, kukai nwafinañana ?

²⁷ Kaninga you akadi mu kufina muna kwanci akamwatola ene, Ñani apukuteka fumwecu ndo musambodi ecu ?

²⁸ Owe wakyeba kunguxipa bea biakaxipa muna Ecipito mankyelo ?

²⁹ Yi Mosese akacina pa diyi dedi, akaya akala mwenyambango mu mbata a Midiana, mwakalelayi bana babidi.

³⁰ Pakadi lolo mbula yamadika masangi anai, mwangele akamoneka kudiyi mu mbata a kisobe a ku lupongo lwa Sinai, mu mwanga ă mudilu mu dibunca.

³¹ Yi pakamona Mosese, akakama pa kumona ; yi pakakokyelayi pepe kuya tebela pakalwa diyi dia Fumu

³² ene, Meme ndi Ncembi a batetebe, Ncembi a Abalami, yi a Isaka, yi a Yakobo. Yi Mosese akalukuta, akacina kutebela.

³³ Fumu lolo akamwambila ene, Sula sabato ku makasa ebe, bwalo budi kidi kiapwemana loboko lwa babala.

³⁴ Namamona sôsôlwo kufinibwa kwa bantu bamene badi mu Ecipito, namakwombwa mukabanu ăbo, namapweka lolo kulwa bapaula ; nkyekyu, lwaka, nakukutuma ku Ecipito.

³⁵ Mosese you akanyañanabo ene, Ñani amakuteka fumu yi musambodi ? Ncembi akamutuma, yei akali fumu yi mupaudi kudi mwangele akamoneka kudiyi ku dibunca.

³⁶ You akababatusa, pakadi amakwenca bikamakama yi bilayixilu mu mbata a Ecipito, yi ku Mai a Kakula, yi ku mbata a kisobe mbula masangi anai.

³⁷ Yei ndo Mosese you akatôyela bana ba Isalele, ene, Ncembi unanubandixila mudimuxi kudi bena kwenu bea mikyemi.

³⁸ You ndo yei akadi mu kikokye mu mbata a kisobe, yi mwangele akatôya yinanci ku lupongo lwa Sinai, yi batetecu ; akangata mambi a môyo a kutupa coco ;

³⁹ utakwedeyela batetecu, kate bakamwatola kudibo, yi bakapinana ku Ecipito ku micima yabo,

⁴⁰ bakatôyela Alono ene, Utupangili ngixi yinakwenda ku buxi bwecu ; bwalo bwa Mosese you, akatubatusa mu mbata a Ecipito, katusolubukwa kinani kiamamuponena.

⁴¹ Yi bakapanga ñombi ku matuku yia, yi bakalongolela ngixi dilongi, yi bakaxekyelela makisa a makaci abo.

⁴² Mo Ncembi akakulumuka, akabakadeya basadili kibumbu kia diulu ; bea biakafundibwa mu mukanda ă badimuxi ene, Ki nwamangulongola meme nyama mixipa yi malongi mosa mbula masangi anai mu mbata a kisobe, nkumbu a Isalele ?

⁴³ Ape nwakakwombulula ncibo a mbuxa a Moloko, yi mutoto ă ngixi Lefana, bifwanisa binwakapanga ndo kubixingila ; yi nakunututula pôi ku buxi bwa Babelono.

⁴⁴ Batetecu bakadi yi ncibo a bixeba a ntôbo mu mbata a kisobe, bea biakatôya you akakwambila Mosese ene, amupangi luna kifwanisa kiakamonayi ;

⁴⁵ ncibo akabwesa batetecu biabo kabidi yi Yoxua, pakakitabo mabila mwokito akakwapata Ncembi ku mpala ya batetecu pôi matuku a Dafidi.

⁴⁶ You akamonebwa yi dikasa dinengela ku meso a Ncembi, yi akakwapangusa dia kupaladila Ncembi a Yakobo ncibo.

⁴⁷ Mo Solomono akamwabakila ncibo.

⁴⁸ Kate Ncembi a kulu kasoakala mu ncibo yamapangibwa ku makaci ; bea biamatôya mudimuxi ene,

⁴⁹ Diulu didi lukwasa Iwamene yi loboko ludi katanda ka makasa amene : Fumu aputôya ene, nunangwabakila ncibo kai ? Kupai lolo kudi kidi kia kwomowa kwamene ?

⁵⁰ Ki kianca kiamene kiamakwenca bintu bebi bioso ?

⁵¹ Nonu bena xingu kukola, bena mientonto ku mucima yi ku macu, nonu nwapidya pidya Mwoxixi a babala matuku moso, bea biakakisa batetenu, ka nonu kabidi.

⁵² Ñani udiko a badimuxi utakolomona batetenu ? Bakaxipa lolo bobo bakakwambila buxi dia kulwa kwa you a nkwami, unwapwakala nonu nkyekyu bengi yi bondi ;

⁵³ bapwangata bwadi bulungika kudi bangele, yi kanubunamini pô.

⁵⁴ Biakakwombwabo malo aa, bakakadibwa ku micima, yi bakamubambakanyina meno abo.

⁵⁵ Kaninga yei akakwolubilañana yi Mwoxixi a babala, akatebela lwa diulu sosonyi, akamona dikai dia Ncembi, yi Yisu emanini ku kianca kia Ncembi kia kidyo,

⁵⁶ yi akatôya ene, Mona, ngwamona diulu diamadipudibwa, yi Mwana a Muntu amakwemana ku kianca kia Ncembi kia kidyo.

⁵⁷ Kaninga bakakwamena yi diyi dikola, yi bakabamba macu abo, yi bakamwotunukila bo-a-bwoso ;

⁵⁸ yi bakamupaula kunci kwa bula, yi bakamwela mabwe. Yi batôbôdi ba ntôbô bakabotaka bilamba biabo ku makasa a dipulwa diakatambibwa ene, Saulu.

⁵⁹ Yi bakakwela Stefano mabwe, udi mu kwabila Ncembi, yi kutôya ene, Fumu Yisu, angata kidimu kiamene.

⁶⁰ Yi akakuma binu paxi, akakwamena yi diyi dikola ene, Fumu kubabambakanyini kwona koku noku. Pakadi lolo aputôya noku, akalala tulu.