MAKISA 6 - Disambi Dipyadipya

¹ KANINGA ku matuku yia, biakayiba beyi bungi, kwakapindula bena Yuda ba ku Ngiliki bwalo bwa bena Ebeleo, ku mucwe ă bakaxi ba bafu babo bakakwelebwa bwilwa ku kiabanyilu kia matuku moso.

² Yi disangi yi babidi, pakabikilabo kibumbu kia beyi kudibo, bakatôya ene, Kakuna loko, coco kukadeya diyi dia Ncembi, ndo kusadila mesa.

³ Mbwôso bena kwecu, nusunguli babalumi sambwali badi yinenu, bena mena anengela, bamakwolubila yi Mwoxixi a babala yi bwinu, batunateka ku mudimo ou ;

⁴ mo coco tunakwekyela yi kulomba yi mudimo ă diyi.

⁵ Yi diyi diakaxekyelesa kibumbu bungi bwakio ; yi bakasungula Stefano, mwamulumi amakwolubila yi kwetabusa yi Mwoxixi a babala, yi Filipi, yi Polokolo, yi Nikanôlo, yi Timono, yi Pamenasa, yi Nikolao, mwetabusanani yi bena Yuda a ku Antioko,

⁶ bakatekabo ku mpala ya batumibwi ; yi pakadi bamafomba, bakabaka bianca biabo kulu kwabo.

⁷ Yi diyi dia Ncembi diakadikanana, yi lubadi lwa beyi ba ku Yelusaleme fwakalundixibwa bongonco, yi kibumbu kinene kia makanda akakwedeya kwetabusa.

⁸ Stefano lolo, amakwolubila yi lwoxixi yi ngulu, akakwenca bikamakama yi bilayixilu binene kudi bantu.

⁹ Mo bamo bakakwemana, bena kixingidilu kiabikidibwa kixingidilu kia baLibetini, yi baKulene, yi baAlesandalia, yi bena Kilikia, yi bena Asia, bamakwelesa yi Stefano mbata.

¹⁰ Yi bakadi kababiyi kutanda yi bwinu yi Mwoxixi bwakatôyayi yinabu.

¹¹ Kunyuma bakakwela bantu kibutuku, bakatôya ene, Twakamwombwa udi mu kutangola Mosese yi Ncembi meyi a mietangu.

¹² Yi bakanyingisa bantu yi babakulu yi bafundi ba mikanda, yi bakalwa mukwata yi bakamucwala ku bwalo.

¹³ Yi bakateka batôbôdi ba mancanga bakatôya ene, You muntu kasolekyela kutôya meyi mabi bwalo bwa kidi kieki kia babala yi bwa bwadi ;

¹⁴ bwalo butwamamwombwa udi mu kutôya ene, Yisu you a ku Nasalete unancimisa kidi kieki, unapeteya miesambu yakatuxiyila Mosese.

¹⁵ Yi bungi bwabo bwa bantu bakaxikama ku bwalo, bakamudingila sosonyi, bakamona mpala anci bea luna mpala a mwangele.