MAKISA 4 - Disambi Dipyadipya

^1-2 YI pakakwambilabo bantu pakalwa makanda kudibo yi kapitene ka tempelo yi baSaduki, bakatepexebwa bwalo bwakakweyesabo bantu yi bwalo bwakasakolabo kudi Yisu dia kwombuluka kudi bafu ;

³ yi bakabakwata, bakabateka ku kidi kia lukanu pôi lubangu ; bwalo bwakadi bwelu nkyekyu.

⁴ Kaninga bantu bangi bakakwombwa diyi bakakwetabusa, yi lubadi lwa bantu lwakalwa bea nkone itano.

⁵ Ku lubangu kwakasangila bantu babo banene yi babakulu yi bafundi ba mikanda ku Yelusaleme,

⁶ yi Anasa bokanda bunene, yi Kayafa, yi Yoano, yi Alesanda, yi bantu bakadi ba bulungu bwa bokanda bunene ;

⁷ yi pakadi bamabateka pakacikaci bakakwapangusa ene, Ku ngulu kai, ndo ku dina kai kunwamakwenca noku ?

⁸ Pita lolo, akakwolubixibwa yi Mwoxixi a babala, akabambila ene, Bantu banene ba bantu, yi babakulu,

⁹ ndo twamakwapanguxibwa lelo dia dikisa dinengela diamakixidibwa muna kitumbi, mwapupandixibwayi,

¹⁰ nulubukwi bungi bwenu, yi bungi bwa bena Isalele, ene, ku dina dia Yisu Kalistu a Nasalete unwakaxipa nonu ku nkulusu, akabisa Ncembi kudi bafu, kwamakwemana you ku mpala yenu loko.

¹¹ Yei ndo dibwe diakakyecebwa kunudi babaki ba ncibo, diamalwa dibwe dia ku ilunga basodi.

¹² Yi mu munga muntu kamuna kipandilu kia môyo ; bwalo butenako dinga dina muxi mwa diulu, diamapebwa bantu, dituxepandixibwa kudidio.

¹³ Mo, biakamonabo mucima ă Pita yi ă Yoano, yi biakalubukwabo ene, badi bantu bamasaka yi kweya yi kweyexebwa, bakakama kama ; yi bakabalembetela bamasangila yi Yisu.

¹⁴ Yi pa kumona mwamulumi apupandixibwa amakwemana yinabo, bakadi kabena yi mbata kwelesa.

¹⁵ Mo pakadi bamabatôyela ene, bancuki mu kikokye kiabo bakakwelañana nkanyi

¹⁶ ene, Tunakwenca kai yi bantu baba ? bwalo bwamakwencebwa kilayixilu kia sôsôlwo kudibo, kiamalubukibwa kudi bantu boso bakala ku Yelusaleme, yi coco katubiyi kwelesa mbata.

¹⁷ Kate, bitaxelelañana bwalo kudi bantu, tubalangi mulangu ene, Kabambidi muntu kabidi nyô ku dina dedi.

¹⁸ Yi bakababikila, yi bakabatôyela ene, kabatôyi pô, kabeyexi mu dina dia Yisu.

¹⁹ Mo Pita yi Yoano bakabapingasa ene, Ndo kwapwakala yi nkwami ku mesô a Ncembi kunwombwela nonu, kutena kwombwela Ncembi, nonu nusamboli ;

²⁰ mo coco katusolubukwa kulekyela kutôya dia bintu bitwamamona yi bitwamakwombwa.

²¹ Kaninga bobo, pakadi bamabalanga kabidi, bakabalekyela bwalo butamonabo mwa kubakuma, ku mucwe ă bantu, bwalo bwakatumbisa bantu boso Ncembi bwalo bwa dikisa diakakixibwa.

²² Bwalo bwakadi muntu you yi mbula yenci yamadika masangi anai, akakixidibwa kilayixilu kieki kia kupandixibwa.

²³ Yi pakalekyelebwabo bakalwa ku kibumbu kiabo mikyeabo, yi bakasakola dia bintu bioso biakabatôyela makanda manene yi babakulu.

²⁴ Bobo lolo, pakakwombwabo, bakabandisa diyi diabo bo-a-bwoso kudi Ncembi, yi bakatôya ene, Fumu, Owe ndo yei akapanga diulu yi loboko yi mai manene, yi bintu bioso bidi momu ;

²⁵ akatoya kudi Mwoxixi a babala ku musuku ă tetecu Dafidi musadi ebe, ene, Kukai mabila amalemowa yi kukai bantu belelañana kimbombo nkanyi ?

²⁶ Bafumu ba loboko bamakwemana, yi bantu banene bamaya nkuku ndo kutanda yi Fumu yi Kalistu anci.

²⁷ Bwalo bwamasangilañana sôsôlwo ku bula bobu Elodo yi Pontio Pilata, yi mabila, yi bantu ba Isalele, ndo kutanda yi Musadi ebe a babala, Yisu, akaxinga Owe manyi,

²⁸ ndo kwenca kintu kioso kiakalungika kianca kiebe buxi yi lukanyi lwebe kwencebwa.

²⁹ Nkyekyu, Fumu, mona mianu yañanabo, yi tôyesapo basadi bebe diyi diebe yi mucima mwoso,

³⁰ pa kuxombola kianca kiebe ndo kupandisa bantu, bilayixilu pako yi bikamakama biencebwi ku dina dia Musadi ebe a babala, Yisu.

³¹ Yi pakadi bamalomba, kidi kiakasangilabo kiakanyinga nyinga, yi bakakwolubixibwa Mwoxixi a babala bungi bwabo, yi bakatôya diyi dia Ncembi yi mucima.

³² Yi kibumbu kia bantu bakakwetabusa kiakadi yi mucima umoumwe yi kidimu kimokimwe ; kakwakadi muntu a kutôya dia kintu kioso kiakadiyi yinakio ene, kidi kienci mikyenci, kate bintu bioso biakakwabanyibwa abanyibwa.

³³ Ku ngulu mingi lolo kwakatôbôla batumibwi ntôbô dia kwombuluka kwa Fumu Yisu, yi lwoxixi lungi lwakadi yinabo bungi bwabo.

³⁴ Kakwakadi muntu umoumwe yinabo amakwayila ; bantu bakadi bena bibidi ndo bena ncibo bakabiodisa, yi bakacwala maso a bintu biakakwodixibwa,

³⁵ yi bakateka ku makasa a batumibwi ; yi dikapa diakakwabanyibwa muntu mwoso amakwayila.

³⁶ Yosefe lolo, akakwenyikibwa kudi batumibwi ene, Banabasa, (ndo kusakolebwa ene, Mwana a Kibondelu), muna Lebi, akalelebwa mu Kupuloso,

³⁷ akadi yi kibidi, akakiodisa, akacwala diso yi akaditeka ku makasa a batumibwi.