MAKISA 27 - Disambi Dipyadipya

¹ MO pakakwencebwa ene, tuxeya iwa kibusu kuya ku Italia, bakalongola Paulu yi minga misungi kudi kapalai, dina dienci ene, Yulio, muna kibumbu kia Angusto.

² Bitwakakondela lolo mu kibusu kia ku Andalamitio, kixeya namata namata ku mala a ku mbata a Asia, twakanamuka. Yi Alistako, muna Makyedonia a ku Tesalonika akadi yinecu.

³ Ku diba lolo diamubidi twakanamata ku Sidono ; yi Yulio akakwenca yi Paulu loko, akamulekyela ayi kudi bimbila bienci kuya dikolesa mikyend.

⁴ Patwakancuka koku twakaya ku kwabanda kwa Kupuloso, bwalo bwakakandañana mpepele.

⁵ Patwakamana kwenda mu mai a Kilikia yi Pamañlia, twakalwa fika ku Mila mu Lukia.

⁶ Yi kapalai kakasañana kibusu koku kia ku Alesandalia kidi mu kwenda kuya ku Italia ; yi akatukondelesa momu.

⁷ Pakadi twamakwenda bikyebikye matuku mangi, yi twamalwa yi lwěndo lukola ku mpala a Kinidu, lupepele Iwakatukanda koku, yi twakaya kwabanda kwa Kyelete ku mpala a Salamone ;

⁸ twakadika dika lolo yi lwendo lukola, yi twakalwa ku kidi kiabikidibwa ene, Mbongo yinengela, kitani yi bula bwa Lasea pepe.

⁹ Yi pakamapwa kikondo kingi, yi ku lwendo kwakadi kukola kungi bwalo bwamadika kikondo kia Luncilu, Paulu akabadimusa

¹⁰ yi akatôya ene, Bakyelengi, ngwalembetela ene, lwendo lunakala yi kipoma kibi yi kinkambili kia bubi, kumoni ku bwalo bwa bintu bitupu yi kibusu, kate bwa mieyo yecu kabidi.

¹¹ Kaninga kapalai kakakwombwa mukobi a kibusu yi fumu a kibusu, kumoni mwakatôyebwa kudi Paulu.

¹² Yi bwalo butakadi mbongo loko ndo kwakala momu ku ngondo ya maxika, bobo bakadika bungi bakakwenca kuncuka koku, ambeci kufika ku Feniki ndo kuxikama koku ku ngondo ya maxika ; kudi mbongo a mu Kyelete adingila bolongya bwa Nôdo-Este yi bwa Sudu-Este.

¹³ Yi pakapupuya lupepele lwa Sudu bikyebikye, bakakisa ene, lukanyi lwabo lwamafika, bakasomona ngindu, yi bakaya pa bule bwa Kyelete pepe yi mbata.

¹⁴ Kaninga kunyuma kwa kakondo kabende kwakalwa lupepele lwa ngiembi lwabikidibwa ene, Eulakulo ;

¹⁵ yi pakakwacibwa kibusu, kakibiyi kwenda ku mpala a lupepele, twakakilekyela yi twakapumbuxibwa.

¹⁶ Yi bitwakadika muxi mwa kisala kiabikidibwa ene, Kolôda, katwalubukwa kukondelesa kabusu kabende, kutena yi mudimo ukola ;

¹⁷ yi pakadi bamakombulula bakakasuka yi mixinga ya kudinga kibusu kinene ; yi bwalo bwakacinabo ambeci banasakibwa pa Sutisi bakapwesa mbuxa kulu, yi mo nako ndo mwakapumbuxibwabo.

¹⁸ Bitwakatanda lolo yi ngiembi kungi kungi, mankyelo bakabanga kwecikisa mixete ya munda,

¹⁹ yi ku diba diamusatu bakakwecikisa bintu binga bia mu kibusu yi makaci abo mikyeabo.

²⁰ Biakadi lolo diba kadisomoneka matuku mangi ndo mitoto, yi ngiembi ya bubi yakatanda yinecu, ku sula, mudingidulu mwoso ă kupandixibwa môyo ăkancudibwa.

²¹ Pakadi bamasala kikondo kingi kutena kudya, kunyuma Paulu akakwemana pakacikaci pabo, yi akatôya ene, Bakyelengi, nuxengwombwa, kumoni kuncuka ku Kyelete kulwa pomanañana yi kipoma kibi kieki yi kinkambili.

²² Nkyekyu nwatôyela ene, nukolesi micima, bwalo butasoncimina môyo ă isanga muntu umoumwe udi yinenu, kaninga kibusu.

²³ Bwalo bwapwemana mwangele pandi ku butuku bobu, a Ncembi you undi muntu anci, ungwasadila,

²⁴ ene, Kucini, Paulu, uxekwemana ku mpala a Kyesa ; yi, mona Ncembi amakupa bantu boso bayeya yinebe lwa kibusu.

²⁵ Mbwôso, bakyelengi, nukolesi micima ; bwalo bunamakwetabusa Ncembi, ene, kunakala mo nako bea biapungwambidibwa.

²⁶ Kaninga tuxekwelebwa pa kisala kinga.

²⁷ Mo pakafika butuku bwa disangi yi inai, bitwakakwendexebwa mpala kunu mpala koku mu mai a Adalia, pakacikaci pa butuku bena kibusu bakakisa ene, badi mu kukokyela pepe yi mbata ;

²⁸ yi bakakwelekyesa yi bakasañana maboko masangi abidi a mai ; yi kunyuma kwa kakondo, bakakwelekyesa kabidi yi bakasañana maboko disangi yi atano.

²⁹ Yi bwalo bwakacinabo ambeci tunakwelebwa pa kidi kitani mabwe, bakapwesa ngindu inai ku nyuma yi bakadila lubangu.

³⁰ Yi pakapalala bena kibusu kucina mu kibusu, yi bakadi bamapwesa kabusu kabende mu mai bea bixenangabo kwela minga ngindu ku ntôi a buxi,

³¹ Paulu akatôyela kapalai yi masalai, ene, Kutena baba basala mu kibusu, kanunalubukwa kupandixibwa môyo.

³² Masalai pako akakala miekulu ya kabusu kabende yi akakalekyela dyendeli.

³³ Pakalanda butuku, kukya Paulu akababondabonda bungi bwabo dia bidya kudya ene, Lelo ndo diba dia disangi yi inai, dinwamasala mu kudingila dingila, kutena kudya kantu.

³⁴ Mbwôso nwabondabonda, ene, nwangati bidya ; nako bwalo bwa diyangu dienu enu bwalo butasonuncimina lunyonyi lwa ku mucwe ă muntu mwoso udi yinenu.

³⁵ Pakadi amatôya noku, akangata dimpa, akaxinga Ncembi ku mpala yabo ya bungi bwabo, akadinyowa yi akabanga kudya.

³⁶ Yi micima yabo ya bungi bwabo yakaxekyelela, yi mikyeabo kabidi bakangata bidya.

³⁷ Twakadi munda mwa kibusu bantu nkama ibidi yi masangi sambwali yi bantu basambomo.

³⁸ Pakakwokutabo, bakateka kibusu bosala, bakakwecikisa masangu munda mwa mai.

³⁹ Yi pakalwa lubangu, bakadi kabasolembetela mbata ; mo bakamona bea dibete yi mbongo, yi bakakwelañana nkanyi, ambeci kwendesa kibusu papa noku.

⁴⁰ Yi pakalekyelabo ngindu bakayixiya munda mwa mai, yi bakalekyela miekulu ya bikobelu ndongo ; bakabandisa lolo mbuxa a ntôi yi bakakwenda lwa mbongo.

⁴¹ Mo pakafikabo ku kidi kiakitelañana mai abidi bakakwomesa kibusu ; ntôi lolo akasuba yi akasala kutena kwenda, kaninga kicini kia nyuma kiakabanga kumwangalaka ku buxitu bwa diele.

⁴² Yi masalai akadi ene, tuxipi misungi, ximbi muntu uxekwowa diakwa kuya ongoloka.

⁴³ Kaninga kapalai kakakyeba kusamunina Paulu kakabaximbila lukanyi lwabo ; yi kakatôya ene, bobo babili makwa badieli mikyeabo mu mai kuya buxi ku mbata ;

⁴⁴ yi bena kwabo, banga ku mabaya yi banga ku bintani bia mu kibusu. Mo nako bakasabuka bungi bwabo ngengele ngengele ku mbata.