MAKISA 26 - Disambi Dipyadipya

¹ YI Angilipa akatôyela Paulu ene, Wamalekyelebwa ndo kuditôyela mikyebe. Paulu lolo akaxombola kianca kienci yi akakyata ku bwalo bwanci, ene,

² Ngwaxekyelela, Fumu Angilipa, bwalo bwa kukyata ku mpala ebe lelo, ku mucwe ă malo moso anamasanyibwa kudi bena Yuda ;

³ bwalo bwamadika owe kulubukwa miesambu mioso yi miapangusu mioso yakala kudi bena Yuda ; mbwôso nkwalomba ungwombipa bikyebikye.

⁴ Mwosambu ămene lolo pôi bwabuki bwamene, ăkadi yi bubila bwamene ku Yelusaleme pôi bubangabanga, ămalubukwa bungi bwa bena Yuda ;

⁵ bakanguiubukwa pôi ku buxi buxi ndo bananga kutôbôla munakakala muFalixi, yi mwosambu ădika swi ă kixingilu kiecu.

⁶ Nkyekyu lolo napwemana kunu ndo kusambolebwa, bwalo bwa mudingidilu ă kilaka kiakaxiyidibwa batetecu kudi Ncembi ;

⁷ kiakyeba bungi bwa mabila ecu disangi yi abidi kufika kudikio, badi mu kusadila Ncembi yi ku munyinya yi ku butuku. Yi ku bwalo bwa mudingidilu ou, fumu, ndo kunamasanyibwa kudi bena Yuda.

⁸ Kukai nuxekisa ene, bwalo kabuna bwa kwetabuxibwa, ndo Ncembi abisa bafu ?

⁹ Meme nakakwenca mikyemi sôsôlwo, ene, nxekisa bintu bingi ndo kutanda yi dina dia Yisu a Nasalete.

¹⁰ Yi nakakwenca nako kabidi mu Yelusaleme ; yi nakancibika bena babala bangi mu ncibo ya nkanu, bwalo bunakangata bumanya kudi makanda manene ; yi pakaxipibwabo, meme nakapa bilonga.

¹¹ Yi nakabatatisa matata mangi mu bixingidilu bioso, yi nakapalala kubatangolesa mietangu ; yi bwalo bunakabanyungudila kungi kungi, nakabakolomona isanga pôi ku mala a babene.

¹² Yi binakadi noku, nakadi mu kwenda lwa Damasako, yi bumanya yi ngulu kudi makanda manene ;

¹³ yi ku munyinya pakacikaci mu ncila, nakamona, fumu, obo mu diulu adika munyinya dikai, akalumuka kundi yi kudibo bamakwenda yinami.

¹⁴ Yi pakadi twamapona paxi cu-a-bwoso, nakakwombwa diyi diamangutôyela mu ludimi lwa bena Ebeleo, ene, Saulu, Saulu, kukai ungwakolomona ? Kudi kukola ndo wakuma masolo misobi.

¹⁵ Yi nakatôya ene, Owe udi ñani, Fumu ? Yi Fumu akatôya ene, Meme ndi Yisu akolomona owe.

¹⁶ Kate ombuluka, emana pa makasa ebe ; bwalo bunapumoneka kudi, nakadi ene, nakukuteka musadi, yi mutôbôdi a malo apumona yi a malo anamoneka kudi ;

¹⁷ kukusokola kudi bantu yi kudi mabila kunkwatumina,

¹⁸ kuya dipula meso abo bakulumuki ku mwedima ndo kwakala yi obo, yi ku bumanya bwa Satana ndo kwakala yi Ncembi, bangati kulekyelebwa kwa mabi, yi mwokito yinabo bamabalolebwa pa kungwetabuxila meme.

¹⁹ Mbwôso, fumu Angilipa, kitamunini bwalo bunakamona bwa diulu,

²⁰ kate nakasakola ku buxi buxi kudibo badi ku Damasako, yi ku Yelusaleme, yi ku bungi bwa mbata a Yudiya, yi kudi mabila kabidi, ene, badibeli, bakulumuki kudi Ncembi, bakisi makisa alelekyela yi kudibela.

²¹ Ku mucwe ă bintu bebi, kwakangukwata bena Yuda mu tempelo, yi bakapalala kunguxipa.

²² Mbwôso binakapomana yi busamunini bulolwa kwa Ncembi, ka binamakwemana pôi dituku dedi, ndi mu kutôbôlela bantu yi babende yi banene, kutena kutôya bwalo butatôyeli badimuxi yi Mosese ene, bunalwa ;

²³ ene, Kalistu uxetata ; yi ene, yei buxi uxekwambila obo, ku kubisa kwa bafu, kudi bantu yi kudi mabila.

²⁴ Yi pakakyatayi nako, Festo akakwamena yi diyi dikola ene, Paulu, wamapasuka ; bwinu bwebe bungi bukwatulola mwombi.

²⁵ Kaninga Paulu ene, Kisopasuka, Festo munene, kate ngwasakola meyi a sôsôlwo yi a mulangu.

²⁶ Bwalo bwalubukwa fumu bintu bebi, unapwambila kabidi kutena kuxitaxita ; bwalo bungwakisa ene, kakuna kintu kimokimwe kia bintu bebi kiamamusokokyebwa ; bwalo butakwencebwa bwalo bobu ku ilunga basodi.

²⁷ Fumu Angilipa, owe wamakwetabusa badimuxi ? Ngwalubukwa ene, wamakwetabusa.

²⁸ Yi Angilipa akatôyela Paulu, ene, Ku kutôya kubende kuxengwetabuxisa, ntulowi muna Kalistu.

²⁹ Yi Paulu ene, Ngwakyeba kudi Ncembi, ndo ku kutôya kubende ndo kungi, kumoni owe mutupu kate bungi bwabo bamangwombwa lelo, baxetulowa bea luna bindi mikyemi, kutena nkanu yei.

³⁰ Yi fumu akakwombuluka yi mulopwe yi Beniki, yi bobo bakaxikama yinabo ;

³¹ yi pakadi bamaya ku dituku bakakwambilañana ene, You mwamulumi kasokwenca bwalo bwaieiekyela ndo yi kufwa ndo lukanu.

³² Yi Angilipa akatôyela Festo ene, Muntu you uxepaudibwa, kutena amakwabila Kyesa.